KA BUKE NO IOBA 6 - Ka Baibala Hemolele

1 Hōʻike ʻo Ioba, he nui kona ʻeha. 8 ʻO kāna pule e make ia. 14 Aʻo aku ia i kona mau makamaka.

MOKUNA VI.

¹ ¶ ʻŌlelo maila ʻo Ioba, ʻī maila,

² “Inā paha e kaupaona pono ʻia kuʻu luʻuluʻu, A e kau ʻia ma ka mea kaupaona kuʻu ʻehaʻeha!

³ “No ka mea, ʻānō, ua ʻoi kona kaumaha ma mua o ke one o ke kai; No laila, ua ilihia kaʻu mau hua ʻōlelo.

⁴ “No ka mea, ʻo nā pua pana o ka Mea Mana, eia i loko oʻu, A ke inu nei ka wela o ia mau mea i kuʻu ʻuhane; ʻO nā mea weliweli o ke Akua, ke kūʻē mai nei iaʻu.

⁵ “E uē anei ka hoki hihiu i mua o ka weuweu? A ke uō anei ka bipi ma luna o kāna mea ʻai?

⁶ “E hiki anei ke ʻai ʻia ka mea mānanalo, ke ʻole ka paʻakai, He mea ʻono anei ke ēwe o ka hua moa?

⁷ “ʻAʻole au e hiki ke hoʻopā aku, Ua like ia me ka hoʻopailua o koʻu ʻai.

⁸ ¶ “Inā paha e hāʻawi ʻia mai kuʻu mea e noi aku ai, Inā paha e hāʻawi mai ke Akua i kuʻu mea i kuko aku ai!

⁹ “A inā paha e ʻoluʻolu ke Akua e ʻulupā mai iaʻu, Inā e hoʻokuʻu mai ia i kona lima, a e ʻoki mai iaʻu!

¹⁰ “A laila e ʻoluʻolu hou iho nō wau, A e hauʻoli aku au i ka ʻeha; Mai ʻauʻa mai ia; no ka mea, ʻaʻole au i hōʻole i nā ʻōlelo a ka Mea Hemolele.

¹¹ “He aha kuʻu ikaika, i kakali aku ai au? He aha hoʻi kuʻu hope, i hoʻolōʻihi aku ai au i kuʻu ola?

¹² “He ikaika anei koʻu e like me ka ikaika o nā pōhaku? He keleawe anei koʻu ʻiʻo?

¹³ “ʻAʻole anei kaʻu kōkua i loko oʻu? A ua holo aku anei ka mea e pakele ai mai oʻu aku lā?

¹⁴ ¶ “ʻO ka mea ʻehaʻeha e aloha ʻia ʻo ia e kona hoalauna; Akā, ua haʻalele aku ia i ka makaʻu i ka Mea Mana.

¹⁵ “Ua hana hoʻopunipuni mai koʻu mau hoahānau, e like me ke kahawai; Ua nalowale aku lākou, e like me ka waikahe o nā awāwa;

¹⁶ “I uliuli i ka waipaʻa, Ma laila i hūnā ʻia ai ka hau.

¹⁷ “I ka wā e ʻololī ai lākou, ua hoʻopau ʻia lākou; I ke kau wela, ua maloʻo akula mai ko lākou wahi aku.

¹⁸ “Ua huli aʻe nā huakaʻi ma ko lākou ala i laila; Hele lākou a nalowale, a pau.

¹⁹ “Nānā akula, nā huakaʻi hele o Tema, A ʻo nā poʻe hele o Seba, i kakali aku iā lākou.

²⁰ “Ua hoka lākou; no ka mea, ua lana wale ka manaʻo; Hele lākou i laila, a hoʻohilahila ʻia lākou.

²¹ “No ka mea, ua like ʻoukou me ka mea ʻole; Ua ʻike ʻoukou i ka pōpilikia, a makaʻu ihola.

²² “Ua ʻōlelo anei au, ‘E lawe mai noʻu? A e hāʻawi mai i makana noʻu mai loko mai o ko ʻoukou waiwai?

²³ ‘A e hoʻopakele paha ʻoukou iaʻu mai ka lima mai o ka ʻenemi? A e hoʻōla iaʻu, mai ka lima mai o ka poʻe ikaika?’

²⁴ ¶ “E aʻo mai ʻoukou iaʻu, a e noho mālie iho au; E hōʻike mai ʻoukou iaʻu i kuʻu mea i lalau ai.

²⁵ “Nani ka ikaika o nā ʻōlelo ʻoiaʻiʻo! Akā, he aha lā kā ʻoukou ʻōlelo hōʻino e hōʻoiaʻiʻo ai?

²⁶ “Ke manaʻo nei anei ʻoukou e hoʻohewa i nā hua ʻōlelo? A ʻo nā ʻōlelo a ka mea paupauaho, Ua like me ka makani?

²⁷ “ʻOiaʻiʻo, ke hoʻohina nei ʻoukou i ka mea makua ʻole, A ke ʻeli iho ʻoukou i lua no ko ʻoukou hoalauna.

²⁸ “ʻĀnō hoʻi, e noho mālie ʻoukou, e nānā mai iaʻu; No ka mea, ua akāka iā ʻoukou, ke hoʻopunipuni au.

²⁹ “E hoʻi hou, ke noi aku nei au iā ʻoukou, mai hoʻolilo ia i hewa; ʻO ia e hoʻi hou hoʻi, A ʻo koʻu pono aia i loko o ia mea.

³⁰ “He hewa anei i loko o kuʻu alelo? ʻAʻole anei au e ʻike i nā mea hewa?