KA BUKE NO IOBA 5 - Ka Baibala Hemolele

1 Hoʻākāka ʻo ʻElipaza i ka pili ʻana o ka pōʻino me ka hewa, ʻo ka hānau ʻana o ke kanaka no ka pōpilikia. 8 Ka pono o ka ʻimi ʻana i ke Akua, ma ka haʻi aku i kona mana, a me kāna hana kupanaha. 17 No ka pōmaikaʻi o ka poʻe i hōʻeha ʻia, ke manaʻo pono lākou.

MOKUNA V.

¹ ¶ “E kāhea ʻānō, inā paha e pane mai kekahi iā ʻoe; I o wai lā o nā mea laʻa e huli ai ʻoe?

² “No ka mea, ke pepehi nei ka inaina i ka mea naʻaupō, A ke hoʻomake nei ka huhū i ka mea hāwāwā.

³ “Ua ʻike au i ka mea naʻaupō e ulu ana; A hōʻino koke aku au i kona noho ʻana.

⁴ “Ua mamao aku kāna poʻe keiki i ka maluhia, Ua ʻulupā ʻia lākou ma ka puka pā, ʻAʻohe mea nāna e hoʻopakele.

⁵ “ʻO kāna ʻai i ʻohi ʻia ua pau i ka mea pōloli, A ua lawe aku ia mea mai loko mai o nā lāʻau kukū, A kāʻili nā pōā i ko lākou waiwai.

⁶ “No ka mea, ʻaʻole e puka mai ka pōpilikia mai ka lepo mai, ʻAʻole hoʻi e kupu mai ka ʻehaʻeha mai loko mai o ka honua.

⁷ “Akā, ua hānau ke kanaka no ka ʻehaʻeha, E like me nā hunaahi i lele aʻe i luna.

⁸ ¶ “Akā e ʻimi au i ke Akua, A i ke Akua e waiho aku i kuʻu ʻōlelo;

⁹ “ʻO ia ke hana i nā mea nui, a hiki ʻole ke hoʻomaopopo ʻia; I nā mea kupaianaha, a hiki ʻole ke helu ʻia.

¹⁰ “Ka mea e hāʻawi ana i ka ua ma luna o ka honua, A e hoʻouna mai ana i nā wai ma luna o nā kula.

¹¹ “E hoʻokiʻekiʻe i luna i ka poʻe i hoʻowahāwahā ʻia; I kaʻikaʻi ʻia ai i luna i kahi malu ka poʻe e uē ana.

¹² “Ke hoʻokahuli nei ʻo ia i nā manaʻo o ka poʻe maʻalea, A hiki ʻole i ko lākou lima ke hoʻokō i ko lākou mea i manaʻo ai.

¹³ “Ke hei aku nei ʻo ia i ka poʻe akamai i loko o ko lākou maʻalea; A ua hoʻohiolo ʻia ka manaʻo o ka poʻe paʻakikī.

¹⁴ “I ke ao hālāwai lākou me ka pouli, A ke hāhā nei lākou i ka wā awakea, e like me ia i ka pō.

¹⁵ “Akā, ke hoʻopakele nō ia i ka poʻe ʻilihune mai ka pahi kaua mai, mai ko lākou waha mai, A mai ka lima mai o ka mea ikaika.

¹⁶ “No laila, ua loaʻa i ka mea hune ka manaʻolana, A ua hoʻopaʻa ka hewa i kona waha.

¹⁷ ¶ “Aia hoʻi, pōmaikaʻi ke kanaka a ke Akua i hōʻeha mai; No laila, mai hoʻowahāwahā ʻoe i ka hahau ʻana mai o ka Mea Mana;

¹⁸ “No ka mea, ke hōʻeha mai nei ia, a e lapaʻau mai hoʻi; Ke hahau mai nei ʻo ia, a e hoʻōla mai hoʻi kona mau lima.

¹⁹ “I loko o nā pilikia ʻeono e hoʻopakele mai ʻo ia iā ʻoe; A i loko o ka hiku hoʻi, ʻaʻole e hoʻopā mai ka ʻino iā ʻoe.

²⁰ “I loko o ka wī e hoʻopakele mai ʻo ia iā ʻoe i ka make; A i loko o ke kaua, mai ka lima o ka pahi kaua mai.

²¹ “E hūnā ʻia ʻoe mai ke alelo hōʻino mai; ʻAʻole hoʻi ʻoe e makaʻu i ka luku, ke hiki mai.

²² “I ka luku a i ka pōloli e ʻakaʻaka nō ʻoe; ʻAʻole hoʻi ʻoe e makaʻu i nā holoholona hihiu o ka honua.

²³ “No ka mea, e noho kuʻikahi ʻoe me nā pōhaku o ke kula; A e maluhia nā holoholona hihiu o ke kula me ʻoe.

²⁴ “A e ʻike nō ʻoe, he maluhia kou halelewa; A e nānā nō ʻoe i kou hale, ʻaʻohe mea nalo.

²⁵ “A e ʻike nō ʻoe, he nui kou hua, A ʻo kāu poʻe keiki, e like me ka weuweu o ka honua.

²⁶ “E hele auaneʻi ʻoe i ka lua kupapaʻu me ka ikaika nui, E like me nā puʻu huapalaoa i kona manawa.

²⁷ “Aia hoʻi ʻo kēia kā mākou i manaʻo ai, pēlā ʻiʻo nō; E hoʻolohe ʻoe, a e ʻike ʻoe ia mea pono nou.”