KA BUKE NO IOBA 4 - Ka Baibala Hemolele

1 Aʻo aku ʻo ʻElipaza iā Ioba. 7 Ka manaʻo o ʻElipaza, ʻaʻole e hiki mai nā mea ʻino ma luna o ka poʻe pono, ma luna nō o ka poʻe hewa. 12 Haʻi aku i kona mea i ʻike ʻia.

MOKUNA IV.

¹ ¶ A laila pane maila ʻo ʻElipaza no Temana, ʻī maila,

² “A i hoʻāʻo mākou e kamaʻilio pū me ʻoe, e uluhua anei ʻoe? Akā, ʻo wai lā ka mea hiki ke ʻuʻumi i ka ʻōlelo?

³ “Aia hoʻi, ua aʻo aku ʻoe i nā mea he nui, A ua hoʻoikaika ʻoe i nā lima nāwaliwali.

⁴ “Ua kūkulu i luna kāu ʻōlelo i ka mea e hina ana, A ua hoʻokūpaʻa ʻoe i nā kuli e hemo ana.

⁵ “ʻĀnō hoʻi, ua hiki mai ia ma luna ou, a ua maʻule ʻoe, Ua hoʻopā mai ia iā ʻoe, a ua pōpilikia ʻoe.

⁶ “ʻAʻole anei kēia kou makaʻu, a me kou manaʻolana, ʻO kou mea i kuko ai, a me ka pololei o kou mau ʻaoʻao?

⁷ ¶ “Ke noi aku nei au, e hoʻomanaʻo ʻoe, ʻo wai ka mea hala ʻole i make wale? ʻAuhea hoʻi ka poʻe pono i hōʻoki ʻia aku?

⁸ “E like me kaʻu i ʻike ai, ʻO nā mea i waele ʻino, a mahi hewa, ʻohi nō lākou ia mea hoʻokahi.

⁹ “Ma ka hā ʻana o ke Akua ua make lākou, A ma ka hanu o kona mau puka ihu ua hoʻopau ʻia lākou.

¹⁰ “ʻO ka uō ʻana o ka liona, ʻo ka leo o ka liona hae, A ʻo nā niho o nā liona hou, ua haki.

¹¹ “ʻO ka liona, ua make ia no ka nele o ka mea pio, A ʻo nā keiki o ka liona wahine, ua hele liʻiliʻi lākou.

¹² ¶ “Ua lawe malū ʻia mai kekahi ʻōlelo iaʻu, A ua loaʻa i kuʻu pepeiao ka lohe iki o ia mea.

¹³ “I loko o nā manaʻo ma nā moeʻuhane i ka pō, I ka manawa i paʻuhia ai nā kānaka i ka hiamoe,

¹⁴ “Hiki mai ka makaʻu iaʻu a me ka haʻalulu, A hoʻohaʻalulu mai ia i ka nui o koʻu mau iwi.

¹⁵ “A laila māʻalo aʻela he ʻuhane i mua o koʻu maka; Kū ihola i luna ka hulu o koʻu ʻiʻo.

¹⁶ “Kū mālie ihola ia, ʻaʻole au i ʻike i kona ʻano; He kiʻi i mua o kou mau maka, He makani ʻuʻuku, a he leo kaʻu i lohe;

¹⁷ ‘E ʻoi anei ka pono o ke kanaka ma mua o ko ke Akua? He ʻoi anei ka maʻemaʻe o ke kanaka ma mua o ka Mea nāna ia i hana?

¹⁸ ‘Aia hoʻi, ʻaʻole ia i hilinaʻi i kāna poʻe kauā, A hoʻoili nō ia i ka hewa ma luna o kona poʻe ʻānela;

¹⁹ ‘He aha lā hoʻi ka poʻe e noho ana i nā hale lepo, Ma ka lepo ko lākou hoʻokumu ʻana, ua ʻulupā ʻia lākou i mua o ka mū?

²⁰ ‘Ua luku ʻia lākou mai kakahiaka a ke ahiahi; Ua make loa lākou, ʻaʻohe mea nāna i manaʻo.

²¹ ‘ʻAʻole anei e nalowale aku ko lākou maikaʻi ʻana? Make nō lākou me ka naʻauao ʻole.’