KA BUKE NO IOBA 3 - Ka Baibala Hemolele

1 Hōʻino ihola ʻo Ioba i ka lā i hānau ai. 11 Kona manaʻo no kona make ʻole ma mua o kona hānau ʻana. 20 E ake nō ia e make, a e uē nō i kona ʻeha.

MOKUNA III.

¹ ¶ Ma hope iho o kēia, pane aʻela ko Ioba waha, a hōʻino akula ia i kona lā.

² ʻŌlelo maila ʻo Ioba, ʻī maila,

³ “E pohō wale iho ka lā aʻu i hānau ai, A me ka pō i ʻōlelo ʻia, ‘Ua hāpai ʻia he keiki kāne.’

⁴ “E lilo ua lā lā i pouli; Mai manaʻo ke Akua ia mai luna mai, ʻAʻole hoʻi e ʻalohi mai ka mālamalama ma luna ona.

⁵ “E haukaʻe ka pouli a me ka malu make ia lā; E kau ka nāulu ma luna ona; E hoʻoweliweli nā wela o ka lā iā ia.

⁶ “A ʻo ua pō lā, e lawe aku ka pouli iā ia; ʻAʻole e hui pū ʻia ʻo ia me nā lā o ka makahiki; Mai hoʻokomo ʻia ʻo ia i loko o ka helu ʻana o nā malama.

⁷ “Aia hoʻi, ʻo ua pō lā, e hoʻoneoneo ʻia ʻo ia; ʻAʻole e hoʻokomo ʻia ka leo ʻoliʻoli i loko ona.

⁸ “Na lākou ia e hōʻino, na ka poʻe e hōʻino ana i ua lā lā, Ka poʻe mākaukau no ke kanikau ʻana.

⁹ “E hoʻopouli ʻia nā hōkū o kona wā mōlehulehu; E kali aku ia i ka mālamalama, a loaʻa ʻole; ʻAʻole hoʻi ia e ʻike i ka wehe ʻana o ke alaula.

¹⁰ “No ka mea, ʻaʻole ia i hoʻopaʻa i nā puka o ka ʻōpū o kuʻu makuahine, ʻAʻole hoʻi ia i hūnā i ka pōpilikia mai koʻu maka aku.

¹¹ ¶ “No ke aha lā i make ʻole ai au mai ka ʻōpū mai? No ke aha lā i kāʻili ʻole ʻia kuʻu ea i kuʻu puka ʻana mai ka ʻōpū mai?

¹² “No ke aha lā i kōkua ai nā kuli iaʻu? No ke aha hoʻi nā ū, i omo aku ai au?

¹³ “A laila, ua moe iho au ʻānō, a ua maluhia iho, Ua hiamoe ihola au, a laila ua maha ihola au,

¹⁴ “Me nā aliʻi, a me nā kuhina o ka honua, Ka poʻe i kūkulu i nā wahi neoneo no lākou;

¹⁵ “Me nā keiki aliʻi paha, ka poʻe mea gula, Me ka poʻe i hoʻopiha i ko lākou mau hale i ke kālā;

¹⁶ “A, me he mea lā i hānau i ka wā, ua ʻole au; Me nā keiki ʻike ʻole i ka malamalama?

¹⁷ “Ma laila e hoʻōki ai ka poʻe hewa i ka hana kolohe ʻana; Ma laila hoʻi e hoʻomaha ʻia ai ka poʻe i luhi o ka ikaika.

¹⁸ “A e hoʻomaha pū ʻia ai hoʻi ka poʻe pio; ʻAʻole lākou i lohe i ka leo o ka mea hoʻoluhi.

¹⁹ “ʻO ka mea ʻuʻuku, a me ka mea nui, aia nō ma laila; A ʻo ke kauā, ua kaʻawale ia mai kona haku aku.

²⁰ ¶ “No ke aha lā i hāʻawi ʻia mai ai ka mālamalama i ka mea pōpilikia, A me ke ola i ka mea ʻeha ma ka naʻau?

²¹ “Ka poʻe e kali ana i ka make, ʻaʻole i hiki mai, A ua ʻoi ko lākou ʻeli ʻana ia mea, ma mua o nā waiwai i hūnā ʻia;

²² “I ka poʻe hauʻoli nui me ka ʻoliʻoli, I ka wā i loaʻa ai iā lākou ka lua kupapaʻu?

²³ “I ke kanaka i hūnā ʻia kona ʻaoʻao, I ka mea a ke Akua i hoʻopuni ai?

²⁴ “No ka mea, ua hiki pū mai koʻu kaniʻuhū ʻana me kuʻu ʻai ʻana, A ua ninini ʻia aku koʻu uē ʻana e like me nā wai.

²⁵ “No ka mea, ua makaʻu au i ka mea makaʻu, a ua hiki mai ia ma luna oʻu, A ʻo ka mea aʻu i weliweli ai ua hele mai ia i oʻu nei.

²⁶ “ʻAʻole au i pōmaikaʻi, ʻaʻole hoʻi i ʻoluʻolu, ʻAʻole hoʻi i maha; akā, hiki mai ka pōpilikia.”