KA BUKE NO IOBA 2 - Ka Baibala Hemolele

1 Hoʻāʻo hou ʻo Sātana iā Ioba, ma ka maʻi heheʻe. 9 Ka manaʻo o kāna wahine. Aʻo aku nō ia iā ia. 11 Hele mai kona mau hoalauna e ʻike iā ia.

MOKUNA II.

¹ ¶ A i kekahi lā hoʻi i hele nā keiki a ke Akua e hōʻike iā lākou iho i mua o Iēhova, ʻo Sātana hoʻi kekahi i hele mai i waena o lākou e hōʻike iā ia iho i mua o Iēhova.

² ʻŌlelo maila ʻo Iēhova iā Sātana, “No hea ʻoe i hele mai nei?” ʻŌlelo akula ʻo Sātana iā Iēhova, ʻī akula, “Mai ka ʻauana ʻana ma ka honua, a mai ka hele ʻana i ʻō i ʻaneʻi ma laila.”

³ ʻŌlelo maila ʻo Iēhova iā Sātana, “Ua noʻonoʻo pono anei ʻoe i kaʻu kauā iā Ioba, ʻaʻohe ona like ma ka honua, he kanaka pono a me ka pololei, ua makaʻu i ke Akua, a ua hoʻokaʻaʻokoʻa i ka hewa? A i kēia wā ke hoʻopaʻa iho nei ma kona pono; akā, ua koi mai ʻoe iaʻu e kūʻē iā ia, e pepehi hala ʻole iā ia.”

⁴ A ʻōlelo akula ʻo Sātana iā Iēhova, ʻī akula, “He ʻili no ka ʻili!” ʻO ka mea a pau a ke kanaka, ʻo ia kāna e hāʻawi aku ai no kona ola.

⁵ Akā, e kīkoʻo aku ʻoe i kou lima ʻānō, a e hoʻopā aku i kona iwi a me kona ʻiʻo, a e hōʻino nō ʻo ia iā ʻoe i mua o kou maka.

⁶ ʻŌlelo maila ʻo Iēhova iā Sātana, “Aia nō ia i loko o kou lima; e mālama nō naʻe ʻoe i kona ola.”

⁷ ¶ A hele akula ʻo Sātana mai ke alo aku o Iēhova, a hahau akula ʻo ia iā Ioba i nā maʻi heheʻe ʻehaʻeha, mai ka poho o kona wāwae a kona piko poʻo.

⁸ A lawe akula ia i ka ʻāpana ipu lepo, a waʻuwaʻu iā ia iho me ia; a noho ihola ia i loko o ka lehu ahi.

⁹ A laila ʻōlelo maila kāna wahine iā ia, “Ke hoʻopaʻa nei anei ʻoe ʻānō ma kou pono? E hōʻino aku i ke Akua a make iho!”

¹⁰ Akā, ʻī akula ʻo ia iā ia, “Ke ʻōlelo mai nei ʻoe e like me ka ʻōlelo a kekahi o nā wāhine naʻaupō. Eiʻa, e loaʻa anei iā kākou ka maikaʻi mai ke Akua mai, ʻaʻole anei e loaʻa iā kākou ka ʻino kekahi?” Ma kēia mea a pau, ʻaʻole ʻo Ioba i hewa me kona mau lehelehe.

¹¹ ¶ A lohe nā makamaka ʻekolu o Ioba i kēia ʻino i hiki mai ma luna ona, hele mai kēlā mea kēia mea mai kona wahi mai; ʻo ʻElipaza no Temana, a ʻo Biledada no Suha, a ʻo Zopara no Naʻama; no ka mea, ua kūkā pū lākou e hālāwai e uē pū me ia, a e hōʻoluʻolu iā ia.

¹² A nānā aʻela ko lākou mau maka i luna mai kahi mamao aku, ʻaʻole lākou i ʻike iā ia, a hoʻokiʻekiʻe aʻela lākou i ko lākou leo i luna, a auē ihola; a haehae lākou ʻo kēlā mea kēia mea i kona ʻaʻahu, a lūlū i ka lepo ma luna o ko lākou poʻo ma ka lani.

¹³ A noho pū iho lākou me ia ma ka lepo i nā lā ʻehiku a me nā pō ʻehiku, ʻaʻole hoʻi i ʻōlelo iki aku kekahi o lākou iā ia; no ka mea, ʻike nō lākou, ua nui loa kona ʻehaʻeha.