KA BUKE NO IOBA 1 - Ka Baibala Hemolele

1 No ka pono o Ioba. Nui kona ʻōhua. No kona manaʻo a me kāna hana i kāna poʻe keiki. 6 Hoʻohewa ʻo Sātana iā Ioba i mua o ke Akua. ʻAe mai ke Akua e hoʻāʻo iā ia. 13 No ka pau ʻana o kāna waiwai a me kāna poʻe keiki. Hoʻohaʻahaʻa iā ia iho, a ʻae aku i ka pono o ke Akua, hoʻomana aku.

MOKUNA I.

¹ ¶ He kanaka ma ka ʻāina ʻo ʻUza, ʻo Ioba kona inoa, ua pono, ua pololei hoʻi ua kanaka lā, a ua makaʻu nō ia i ke Akua, a hoʻopale i ka hewa.

² Ua hānau ʻia nāna ʻehiku mau keiki kāne, a me nā kaikamāhine ʻekolu.

³ ʻO kāna waiwai, ʻehiku tausani hipa me nā kao, ʻekolu tausani kāmelo, ʻelima haneri bipi kaulua, a ʻelima haneri hoki wahine, a he nui loa kona poʻe ʻōhua; no laila, ua ʻoi aku ke koʻikoʻi o kēia kanaka ma mua o nā kānaka a pau o ka Hikina.

⁴ A hele akula kāna mau keiki kāne, a ʻahaʻaina ihola ma ka hale, ʻo kēlā mea kēia mea o lākou i kona lā; a hoʻouna akula, a hea aku i ko lākou mau kaikuāhine ʻekolu, e ʻai pū a e inu pū me lākou.

⁵ A i ka manawa i hala aʻe ai nā lā o ka ʻahaʻaina ʻana, hoʻouna akula ʻo Ioba a hoʻomaʻemaʻe iā lākou, a ala aʻela i kakahiaka nui, a kaumaha akula i nā mōhai kuni e like me ka nui o lākou a pau; no ka mea, ʻī ihola ʻo Ioba, “Malia paha ua hana hewa kaʻu mau keiki kāne, a ua ʻōlelo hōʻino i ke Akua ma ko lākou naʻau.” Pēlā ʻo Ioba i hana ai i nā lā a pau.

⁶ A i kekahi lā, i ka manawa i hele ai nā keiki a ke Akua e hōʻike aku iā lākou iho i mua o Iēhova, i hele mai hoʻi ʻo Sātana i waena o lākou.

⁷ A ʻī maila ʻo Iēhova iā Sātana, “No hea ʻoe i hele mai nei?” ʻŌlelo akula ʻo Sātana iā Iēhova, “Mai ka ʻauana ʻana ma ka honua, a mai ka hele ʻana i ʻō i ʻaneʻi ma laila.”

⁸ ʻĪ maila ʻo Iēhova iā Sātana, “Ua noʻonoʻo pono anei ʻoe i kaʻu kauā iā Ioba, ʻaʻohe mea like me ia ma ka honua, he kanaka pono me ka pololei, ua makaʻu i ke Akua, a ua hoʻokaʻaʻokoʻa i ka hewa?”

⁹ A laila ʻōlelo akula ʻo Sātana iā Iēhova, ʻī akula, “Ke makaʻu kumu ʻole lā anei ʻo Ioba i ke Akua?

¹⁰ “ʻAʻole anei ʻoe i hoʻopuni iā ia, a me kona hale, a me kona mea a pau i ka pā ma nā ʻaoʻao a pau? Ua hoʻopōmaikaʻi ʻoe i ka hana a kona mau lima, a māhuahua kona waiwai ma ka ʻāina.

¹¹ “Akā, e kīkoʻo aku ʻānō i kou lima, a hoʻopā i kāna mau mea a pau, a e hōʻino nō kēlā iā ʻoe i mua o kou maka!”

¹² ʻŌlelo maila ʻo Iēhova iā Sātana, “Aia hoʻi, i loko o kou lima kāna mau mea a pau; akā, ma luna ona mai kau aku ʻoe i kou lima.” A hele akula ʻo Sātana mai ke alo aku o Iēhova.

¹³ ¶ A i kekahi lā, i ka manawa o kāna mau keiki kāne a me kāna mau kaikamāhine e ʻahaʻaina ana, a e inu waina ana i loko o ka hale o ko lākou hānau mua;

¹⁴ hele mai kekahi ʻelele i o Ioba lā, ʻī maila, “ʻO nā bipi kauō e hoʻopalau ana, a ʻo nā hoki wahine e ʻai ana ma ko lākou ʻaoʻao;

¹⁵ a popoʻi maila ka poʻe Seba ma luna o lākou, a lawe pio akula iā lākou; a pepehi ihola lākou i nā kānaka ʻōpiopio me ka maka o ka pahi kaua; a ʻo wau wale nō kai pakele e haʻi aku iā ʻoe!”

¹⁶ A i kāna kamaʻilio ʻana, hele mai kekahi, ʻī maila, “Ua lele mai ke ahi a ke Akua mai ka lani mai, a ua ʻai iho i nā hipa a me nā kahu, a ua hoʻopau iā lākou; a ʻo wau wale nō kai pakele e haʻi aku iā ʻoe!”

¹⁷ A i kāna kamaʻilio ʻana, hele mai kekahi ʻē aʻe, ʻī maila, “Hoʻonohonoho ihola ka poʻe Kaledea i ʻekolu poʻe kaua, a lele mai lākou ma luna o nā kāmelo, a lawe pio aku iā lākou, a pepehi ihola i nā kauā ʻōpiopio me ka maka o ka pahi kaua; a ʻo wau wale nō kai pakele e haʻi aku iā ʻoe!”

¹⁸ I kāna kamaʻilio ʻana, hele mai kekahi ʻē aʻe, ʻī maila, “ʻO kāu mau keiki kāne, a me kāu mau kaikamāhine, e ʻai ana a e inu waina ana i loko o ka hale o ko lākou hānau mua;

¹⁹ aia hoʻi, hiki maila ka makani ikaika mai ka ʻaoʻao o ka wao nahele mai, a nou mai ma nā kihi ʻehā o ka hale, a hina ihola ia ma luna o nā kānaka ʻōpiopio, a ua make lākou; a ʻo wau wale nō kai pakele e haʻi aku iā ʻoe!”

²⁰ ¶ A laila kū aʻela ʻo Ioba, a haehae ihola i kona ʻaʻahu, a ʻako i kona poʻo, a hina i lalo i ka honua, a hoʻomana akula,

²¹ ʻī ihola, “I hele kohana mai nō au mai ka ʻōpū mai o koʻu makuahine, A e hoʻi kohana aku au i laila. Na Iēhova i hāʻawi mai, na Iēhova hoʻi i lawe aku; E hoʻomaikaʻi ʻia ka inoa ʻo Iēhova.”

²² Ma kēia mea a pau, ʻaʻole ʻo Ioba i hana hewa, ʻaʻole hoʻi ia i hoʻoili wale aku i ka hewa i ke Akua.