KA BUKE NO ʻESETERA 6 - Ka Baibala Hemolele

1 Ka hiamoe ʻole o ke aliʻi, a heluhelu i ka palapala no ka hana maikaʻi ʻana o Moredekai. 6 Hoʻolanilani ʻia ʻo Moredekai. 12 Ka poho loa ʻana o ko Hamana manaʻo.

MOKUNA VI.

¹ ¶ Ia pō, ʻaʻole i hiki i ke aliʻi ke hiamoe, a kauoha aʻela ia e lawe ʻia mai ka buke moʻoʻōlelo o nā ʻoihana; a heluhelu ʻia ia i mua o ke aliʻi.

² A loaʻa ihola ka palapala o ko Moredekai haʻi ʻana no Bigetana, a me Teresa, nā luna ʻelua o ke aliʻi i kiaʻi ai i ka puka, a ʻimi i wahi e hiki ai, ke kau i ka lima ma luna o ke aliʻi ʻo ʻAhasuero.

³ Nīnau aʻe ke aliʻi, “He aha ka mea maikaʻi, a me ka mea nui i hana ʻia ai iā Moredekai, no kēia mea?” ʻĪ akula nā kauā a ke aliʻi i ka poʻe i lawelawe nāna, “ʻAʻohe mea i hana ʻia nona.”

⁴ Nīnau aʻela ke aliʻi, “ʻO wai lā ma ka pā hale?” Ua hiki mai ʻo Hamana ma ka pā hale ma waho o ka hale o ke aliʻi e ʻōlelo i ke aliʻi, e lī ʻia ʻo Moredekai ma ke ʻolokeʻa āna i hoʻomākaukau ai nona.

⁵ ʻĪ akula nā kauā a ke aliʻi iā ia, “Aiʻa, ke kū maila ʻo Hamana ma ka pā hale.” ʻĪ maila ke aliʻi, “E hele mai ia i loko.”

⁶ A laila, komo akula ʻo Hamana. Nīnau maila ke aliʻi iā ia, “He aha ka mea e hana ʻia ai no ke kanaka a ke aliʻi e manaʻo nei e hoʻohanohano?” Nalu ihola ʻo Hamana ma loko o kona naʻau, “ʻO wai ka mea a ke aliʻi e makemake nei e hoʻohanohano, ʻaʻole anei ʻo wau?”

⁷ ʻĪ akula ʻo Hamana i ke aliʻi, “No ke kanaka a ke aliʻi e makemake nei e hoʻohanohano,

⁸ “E lawe ʻia mai ka lole aliʻi a ke aliʻi i komo ai, a me ka lio a ke aliʻi i holoholo ai, a me ka lei aliʻi i hoʻolei ʻia ai kona poʻo.

⁹ “A e hāʻawi ʻia ua lole lā, a me ka lio i ka lima o kekahi o nā aliʻi koʻikoʻi o ke aliʻi, i hōʻaʻahu ai lākou i ke kanaka a ke aliʻi i makemake ai e hoʻohano, a e hoʻoholo lākou iā ia ma luna o ka lio ma ke alanui o ke kūlanakauhale, a e kala aku ma mua ona, ‘Pēlā e hana ʻia ai ke kanaka a ke aliʻi e makemake ai e hoʻolanilani!’”

¹⁰ ¶ A laila, ʻōlelo maila ke aliʻi iā Hamana, “E wikiwiki ʻoe, e lawe i ka lole, a me ka lio, me aʻu i ʻōlelo ai, a e hana aku ʻoe pēlā iā Moredekai, i kā Iudaio, ka mea e noho lā ma ka puka pā o ke aliʻi. Mai hoʻohāʻule i kekahi o nā mea a pau āu i ʻōlelo mai nei!”

¹¹ A laila, lawe ʻo Hamana i ka lole a me ka lio, a hōʻaʻahu ihola iā Moredekai, a hoʻoholo aʻela iā ia ma luna o ka lio, ma ke alanui o ke kūlanakauhale, a kala akula i mua ona, “Pēlā nō e hana ʻia mai ai i ke kanaka a ke aliʻi e makemake ai e hoʻohanohano!”

¹² Hele hou akula ʻo Moredekai i ka puka pā o ke aliʻi; akā, ʻo Hamana, wikiwiki aʻela ia i kona hale, me ke kaniʻuhū, a ua pūloʻu ʻia kona poʻo.

¹³ Haʻi akula ʻo Hamana i kāna wahine iā Zeresa, a i kona poʻe makamaka a pau i nā mea a pau i loaʻa ai iā ia. A laila, ʻōlelo maila iā ia kona poʻe kānaka akamai, a me kāna wahine ʻo Zeresa, “Inā no ka hanauna Iudaio ʻo ua Moredekai lā, a ua hāʻule ʻoe i mua ona i kēia wā, ʻaʻole nō ʻoe e lanakila ma luna ona; akā, e ʻoiaʻiʻo nō, e hāʻule nō ʻoe i mua ona.”

¹⁴ A iā lākou e kamaʻilio pū ana me ia, hiki aʻela nā luna o ke aliʻi, a wikiwiki lākou e lawe aku iā Hamana i ka ʻaha inu a ʻEsetera i hoʻomākaukau ai.