KA BUKE NO ʻESETERA 5 - Ka Baibala Hemolele

1 Ka hele ʻana o ʻEsetera i ke aliʻi. 4 Nā ʻaha inu. 9 Ka manaʻo o Hamana.

MOKUNA V.

¹ ¶ A i ke kolu o ka lā, hoʻokomo aʻela ʻo ʻEsetera i ka lole aliʻi, a kū akula ma ka pā hale i loko o ka hale o ke aliʻi, ma ke alo o ka hale o ke aliʻi. A e noho ana nō ke aliʻi ma kona noho aliʻi, ma ka hale aliʻi, ma ke alo o ka puka pā o ka hale.

² A ʻike maila ke aliʻi iā ʻEsetera, i ke aliʻi wahine, e kū ana ma loko o ka pā hale, loaʻa iā ia ke aloha ʻia mai e ia; a ʻō maila ke aliʻi i ke koʻokoʻo aliʻi gula ma kona lima iā ʻEsetera. Hoʻokokoke akula ʻo ʻEsetera, a hoʻopā akula i ka wēlau o ke koʻokoʻo aliʻi.

³ A laila, ʻī mai ke aliʻi iā ia, “He aha kāu, e ke aliʻi wahine, e ʻEsetera, a he aha hoʻi kāu mea e noi mai ai? E hāʻawi ʻia aku nō ia iā ʻoe, inā paha ʻo ka hapalua ia o ke aupuni!”

⁴ ʻĪ akula ʻo ʻEsetera, “Inā he maikaʻi ia i ke aliʻi, e hele mai ke aliʻi a me Hamana, i kēia lā, i ka ʻaha inu aʻu i hoʻomākaukau ai nona.”

⁵ ¶ A laila, ʻōlelo aku ke aliʻi, “E hoʻolalelale iā Hamana, e hana ʻo ia i ka mea a ʻEsetera i ʻōlelo ai.” A hele maila ke aliʻi a me Hamana i ka ʻaha inu a ʻEsetera i hoʻomākaukau ai.

⁶ ʻŌlelo maila ke aliʻi iā ʻEsetera, ma ka ʻaha inu waina, “He aha kāu mea e noi mai ai? E hāʻawi ʻia nō ia iā ʻoe. A he aha hoʻi kāu kauoha? Inā paha ʻo ka hapalua ia o ke aupuni e hana ʻia nō ia!”

⁷ A laila, ʻōlelo akula ʻo ʻEsetera, ʻī akula, “Eia kuʻu mea e noi aku ai, a me kaʻu kauoha hoʻi:

⁸ inā i loaʻa iaʻu ke aloha ʻia mai e ke aliʻi, a inā i leʻaleʻa ke aliʻi i ka hāʻawi mai i kaʻu mea e noi aku ai, a e hana hoʻi e like me kaʻu kauoha ʻana, e hele mai ke aliʻi a me Hamana i ka ʻaha inu aʻu e hoʻomākaukau ai no lāua, a ʻapōpō e hana nō wau e like me ka ʻōlelo a ke aliʻi.”

⁹ ¶ Puka akula ʻo Hamana i waho ia lā, me ka ʻoliʻoli, a me ka naʻau māmā. A ʻike aʻela ʻo ia iā Moredekai ma ka puka pā o ke aliʻi, ʻaʻole i kū i luna, ʻaʻole i neʻeneʻe aku nona, piha loa ihola ia i ka ukiuki iā Moredekai.

¹⁰ ʻUʻumi ihola ʻo Hamana i kona manaʻo; a hoʻi akula ʻo ia i kona wahi, a laila kiʻi akula ʻo ia i kona poʻe makamaka, a me Zeresa kāna wahine.

¹¹ A haʻi akula ʻo Hamana iā lākou i ka nani o kona waiwai, a i ka lehulehu o kāna poʻe keiki, a i nā mea a pau a ke aliʻi i hoʻokiʻekiʻe ai iā ia, a me kona hoʻonoho ʻana iā ia ma luna o nā kuhina a me nā kānaka o ke aliʻi.

¹² ʻŌlelo akula nō hoʻi ʻo Hamana, “He ʻoiaʻiʻo, ʻaʻole i hoʻokomo ʻo ʻEsetera ke aliʻi wahine, i kekahi mea ʻē aʻe me ke aliʻi i ka ʻaha inu, āna i hoʻomākaukau ai, iaʻu wale nō. A ua kiʻina mai hoʻi au e hele i ona lā me ke aliʻi i ka lā ʻapōpō.

¹³ “Akā, he mea ʻole iaʻu kēia mau mea a pau, iaʻu e ʻike aku ai iā Moredekai kā Iudaio, e noho ana ma ka puka pā o ke aliʻi.”

¹⁴ A laila, ʻōlelo maila iā ia ʻo Zeresa kāna wahine, a me kona poʻe makamaka a pau, “E hana ʻia he ʻolokeʻa, i kanalima kūbita ke kiʻekiʻe; a ʻapōpō, e ʻōlelo aku ʻoe i ke aliʻi, i lī ʻia ʻo Moredekai ma luna o laila. A laila, e hele ʻoliʻoli ʻoe i ka ʻaha inu me ke aliʻi.” Ua maikaʻi ia i ka manaʻo o Hamana, a hana ihola ʻo ia i ke ʻolokeʻa.