KA BUKE NO DANIʻELA 7 - Ka Baibala Hemolele

1 Ka moeʻuhane o Daniʻela no nā holoholona ʻehā. 9 No ko ke Akua aupuni. 15 Ke ʻano o ia mea.

MOKUNA VII.

¹ ¶ I ka makahiki mua o Belehazara, ke aliʻi o Babulona, he moeʻuhane ko Daniʻela, a me ka liʻa o kona poʻo ma luna o kona wahi moe. A laila palapala ihola ʻo Daniʻela i ua moe lā, a hōʻike aku ia i ka nui o ia mau mea.

² ʻŌlelo akula ʻo Daniʻela, ʻī aku, “Ua ʻike au ma koʻu hihiʻo ʻana i ka pō, aia hoʻi, ua paio ikaika aʻela nā makani ʻehā o ka lani ma luna iho o ke Kai Nui.

³ “A hōʻea maila nā holoholona nui ʻehā mai loko mai o ke kai, ua like ʻole ko lākou ʻano kekahi me kekahi.

⁴ “ʻO ka mua, ua like ia me ka liona, a he mau ʻēheu ʻaeto kona; ʻike akula au a mokumoku ʻia ihola kona mau ʻēheu, a hāpai ʻia aʻela ia i luna mai ka honua aʻe, a hoʻokū ʻia aʻela ma nā wāwae me he kanaka lā, a hāʻawi ʻia aku he naʻau kanaka nona.

⁵ “Aia hoʻi, kekahi holoholona ʻē, ʻo ka lua ia, ʻo kona ʻano ua like ia me ka bea, hoʻāla aʻela ʻo ia iā ia iho ma kona ʻaoʻao iho, aia hoʻi, ʻekolu iwi ʻaoʻao i loko o kona waha i waena o kona mau niho; a ʻōlelo aʻela lākou iā ia, ‘E kū aʻe ʻoe, e ʻai i ka ʻiʻo he nui!’

⁶ “A ma hope iho o kēia, ʻike akula au, aia hoʻi kekahi, ua like me ka leopadi, a ma luna o kona kua ʻehā mau ʻēheu manu; ʻehā nō hoʻi poʻo o ua holoholona lā; a ua hāʻawi ʻia mai iā ia ke aliʻi ʻana.

⁷ “A ma hope iho o kēia, ʻike hou akula au ma ka hihiʻo ʻana i ka pō, aia hoʻi kekahi holoholona ʻē, ʻo ka hā ia, he mea weliweli loa ia, he mea makaʻu nui, he nui hoʻi kona ikaika; he mau niho hao nui kona, ua ʻai wale aku ia, a okaoka liʻiliʻi, a hehi ihola ia i ke koena ma lalo o kona mau wāwae; ʻaʻole ia i like iki me nā holoholona ma mua. He ʻumi hoʻi nā pepeiaohao ona.

⁸ “I koʻu noʻonoʻo ʻana i ua mau pepeiaohao lā, aia hoʻi, kupu maila i waenakonu o lākou kekahi pepeiaohao ʻuʻuku, uhuki ʻia aʻela i mua ona nā pepeiaohao mua ʻekolu: a i loko o ua pepeiaohao ʻuʻuku lā, aia hoʻi, he mau maka me he maka kanaka lā, a he waha hoʻi e ʻōlelo ana i nā mea nui.

⁹ ¶ “ʻIke akula au, A ua kau ʻia ihola nā noho aliʻi, A ua noho maila ka Makamua o nā Lā, Ua huali loa kona kapa e like me ka hau, A ʻo ka lauoho o kona poʻo ua like me ka hulu hipa maʻemaʻe; ʻO kona noho aliʻi, ua like ia me ka lapalapa ʻana o ke ahi, A ʻo kona mau kaʻa e like me ke ahi e ʻaʻā ana.

¹⁰ “A puka maila kekahi lapalapa ahi A kahe aʻe mai kona alo aku; Lawelawe nona nā tausani o nā tausani, A kū ihola i mua ona nā lehulehu o nā lehulehu; Ua hoʻonoho ʻia ihola ka hoʻokolokolo, A wehe ʻia aʻela nā buke.

¹¹ “Nānā akula au, a no ka leo o nā hua ʻōlelo nui a ua pepeiaohao lā i ʻōlelo ai; nānā au a pepehi ʻia ihola ka holoholona, a ua luku ʻia kona kino, a ua hoʻolei ʻia nō hoʻi ma ke ahi e ʻaʻā ana.

¹² “A ʻo nā holoholona i koe, ua lawe ʻia aku ko lākou aliʻi ʻana; akā ua hoʻolōʻihi ʻia ko lākou ola ʻana no kekahi manawa a me ka wā.

¹³ ¶ “A ʻike akula nō hoʻi au ma ka hihiʻo ʻana i ka pō, Aia hoʻi, kekahi ua like ia me ke Keiki a ke Kanaka E hele mai ana ma nā ao o ka lani, A hele mai nō ia i ka Makamua o nā Lā, A hoʻokokoke lākou iā ia i mua ona.

¹⁴ “A ua hāʻawi ʻia mai nona ke aliʻi ʻana, A me ka nani, a me ke aupuni, I hoʻokauā nāna nā lāhui kanaka, A me ko nā ʻāina, a me nā ʻōlelo ʻē. ʻO kona aliʻi ʻana ua mau loa ia, ʻAʻole ia e pau, A ʻo kona aupuni, ʻAʻole ia e auhulihia.

¹⁵ “ʻO wau, ʻo Daniʻela nei, ua kaumaha loa kuʻu naʻau i loko o kuʻu kino, a ua pīhoihoi au i nā liʻa o kuʻu poʻo.

¹⁶ “Hoʻokokoke akula au i kekahi o nā mea e kū ana ma laila, a nīnau akula au iā ia i ka ʻoiaʻiʻo ʻana o kēia mau mea a pau. A laila haʻi maila ʻo ia iaʻu, a hoʻākāka mai iaʻu i ke ʻano o kēia mau mea:

¹⁷ ‘ʻO kēia mau holoholona nui ʻehā, he mau aliʻi lākou ʻehā, nā mea e hōʻea i luna mai ka honua aʻe.

¹⁸ ‘Akā, ʻo nā haipule o ka Mea Kiʻekiʻe Loa, e lilo iā lākou ke aupuni; a iā lākou no ke aupuni ia ao aku, ia ao aku, a mau loa aku nō.’

¹⁹ “A laila, makemake akula au e ʻike i ke ʻano o ka hā o ua mau holoholona lā, i ka mea i ʻano ʻē i ko lākou a pau, i ka mea weliweli loa, nona nā niho hao, a me nā māiʻuʻu keleawe; ka mea nāna i luku a okaoka loa, a hehi nō hoʻi i ke koena ma lalo o kona mau wāwae;

²⁰ a ʻo kona mau pepeiaohao he ʻumi ma luna o kona poʻo, a me kekahi mea i kupu aʻe, ua hina hoʻi nā mea ʻekolu i mua ona; ua pepeiaohao lā nona nā maka, a me ka waha hoʻi e ʻōlelo ana i nā mea nui, a ua ʻoi aku ka ikaika o kona maka ma mua o ko kona poʻe hoa.

²¹ “ʻIke akula au i ua pepeiaohao lā e kaua aku ana ia i ka poʻe haipule, a lanakila ia ma luna o lākou;

²² a hiki maila ka Makamua o nā Lā, a hāʻawi ʻia mai i ka poʻe haipule o ka Mea Kiʻekiʻe ka hoʻopaʻi ʻana; a ua hiki mai ka manawa e lilo ai ke aupuni i ka poʻe haipule.

²³ ¶ “Penei kāna i ʻī mai ai: ‘ʻO ka hā o ua mau holoholona lā, ʻo ka hā nō ia o ke aupuni ma ka honua, he mea ʻano ʻē ia i nā aupuni a pau; a e luku loa ia i ko ka honua, a e hehi ia mea i lalo, a okaoka liʻiliʻi loa.

²⁴ ‘A ʻo nā pepeiaohao he ʻumi no loko mai nō o kēia aupuni, he mau aliʻi ia he ʻumi e kū mai ana; a ʻo kekahi mea e kū mai ana nō ma hope o lākou; ʻaʻole like ia me ka mea mua, a e luku hoʻi ia i nā aliʻi ʻekolu.

²⁵ ‘A e ʻōlelo ia i nā mea nui kūʻē i ka Mea Kiʻekiʻe, a e hoʻokaumaha aku ia i ka poʻe haipule o ka Mea Kiʻekiʻe Loa, a e manaʻo iho nō ia e hoʻokāhuli i nā manawa, a me nā kānāwai; a e hāʻawi ʻia ua mau mea i loko o kona lima, a hiki i ka manawa, a me kekahi manawa, a me ka mahele o ka manawa.

²⁶ ‘A laila, e hoʻonoho ʻia ka hoʻokolokolo, a e lawe ʻia aku ke aupuni mai ona aku lā, e hoʻopau ʻia ua mea lā, a e luku ʻia hoʻi, a hiki i ka hopena.

²⁷ ‘Akā, ʻo ke aupuni, a me ke aliʻi ʻana, a ʻo ka nani o ke aupuni ma lalo iho o nā lani a puni, e hāʻawi ʻia mai i nā kānaka haipule o ka Mea Kiʻekiʻe, ʻo kona aupuni he aupuni mau loa ia; a ʻo nā aliʻi a pau, e hoʻokauā aku, a e mālama aku nō hoʻi iā ia.’

²⁸ “Eia ka hope o kēia mea. ʻO wau, ʻo Daniʻela, ua kaumaha au i kuʻu manaʻo iho, ua ʻano ʻē koʻu maka; akā, ua hūnā au i kēia mea i loko o koʻu naʻau iho.”