KA BUKE NO DANIʻELA 4 - Ka Baibala Hemolele

1 Ka moeʻuhane a Nebukaneza. 19 Ua hoʻākāka ʻo Daniʻela i kāna moe. 28 Ua hoʻokō ia mea e like me ko Daniʻela hoʻākāka ʻana.

MOKUNA IV.

¹ ¶ ʻO Nebukaneza ke aliʻi, i nā kānaka a pau, a me nā lāhui kanaka, a me nā ʻōlelo ʻē, e noho ana ma ka honua a pau: “E hoʻomāhuahua ʻia ana ko ʻoukou maluhia.

² “He mea pono i koʻu manaʻo ke hoʻākāka aku i nā hōʻailona, a me nā hana mana a ke Akua Kiʻekiʻe i hana mai ai iaʻu.

³ “He manomano kona mau hōʻailona, A he kupaianaha hoʻi kāna mau hana mana! ʻO kona aupuni, he aupuni mau loa ia, A ʻo kona aliʻi ʻana, mai ia hanauna aku ia, a ia hanauna aku.

⁴ ¶ “ʻO wau, ʻo Nebukaneza, ua noho maluhia au i loko o koʻu hale, a pōmaikaʻi nō au ma kuʻu hale aliʻi.

⁵ “Ua moeʻuhane au i ka moe, ʻo kaʻu mea ia i weliweli ai, a ʻo nā manaʻo ma luna o koʻu wahi moe a me ka liʻa ʻana o koʻu poʻo, ʻo kaʻu mau mea ia e pīhoihoi ai.

⁶ “No ia mea, kauoha akula au e alakaʻi ʻia mai i mua oʻu ka poʻe naʻauao a pau o Babulona, i hoʻākāka mai lākou iaʻu i ke ʻano o kaʻu moe.

⁷ “A hele mai nō ka poʻe māgoi, a me ka poʻe hoʻopiʻopiʻo, a me ka poʻe Kaledea, a me ka poʻe kilokilo, a hōʻike aku au iā lākou i ka moe; ʻaʻole i hiki iā lākou ke haʻi mai i kona mea hōʻike.

⁸ “Ma hope iho, hele mai i mua oʻu ʻo Daniʻela, ka mea i kapa ʻia ʻo Beletesaza ma muli o ka inoa o koʻu akua; no ka mea, aia i loko ona ka ʻuhane o nā akua hemolele; a haʻi aku au iā ia i kaʻu moe;

⁹ ‘E Beletesaza, e ka luna o nā māgoi; no ka mea, ua ʻike au aia i loko ou ka ʻuhane o nā akua hemolele, ʻaʻole ou wahi hemahema ma ka mea i ʻike ʻole ʻia, e haʻi mai ʻoe i ka moe aʻu i ʻike ai a me kona ʻano.

¹⁰ ‘Penei ka liʻa ʻana a koʻu poʻo ma luna o koʻu wahi moe: aia hoʻi, ua ʻike au, he lāʻau i waenakonu o ka honua, a ʻo kona kiʻekiʻe, ua ʻoi nui loa aku ia.

¹¹ ‘Ulu aʻela ua lāʻau lā a nui; ʻO kona kiʻekiʻe ua hiki aku ia i ka lani, A ua ʻike hoʻi ia ma nā kihi a pau o ka honua.

¹² ‘ʻO nā lau ona ua maikaʻi ia, a he nui nō hoʻi kona hua, Aia hoʻi ma loko ona he ʻai na nā mea a pau; Ua hoʻomalu ʻia nā holoholona o ke kula ma lalo iho ona, Ua kau mai hoʻi nā manu o ka lewa ma luna o kona mau lālā, A ua hānai ʻia nā mea ʻiʻo a pau i ko ua lāʻau lā.

¹³ ¶ ‘Ua ʻike au ma ka liʻa ʻana o kuʻu poʻo ma luna iho o koʻu wahi moe, aia hoʻi, he mea kiaʻi a he mea hemolele e iho mai ana mai ka lani mai.

¹⁴ ‘Kāhea maila ʻo ia me ka leo nui, a penei hoʻi kāna ʻōlelo ʻana, “E kua aku i ka lāʻau, a e ʻokiʻoki i kona mau lālā, E lūlū aku i kona lau, a e hoʻoheleleʻi hoʻi i kona hua; E haʻalele nā holoholona i kona malu, A me nā manu hoʻi i kona mau lālā.

¹⁵ “Akā, e waiho i ke kumu o kona aʻa ma ka lepo, Me ke apo hao, a me ke keleawe, Ma waena o nā mea uliuli o ke kula; A e hoʻopulu ʻia ʻo ia i ka hau o ka lani, ʻO kona kuleana aia nō ia me nā holoholona ma ka mauʻu o ka honua.

¹⁶ “E hoʻolilo ʻia kona naʻau kanaka, A e hāʻawi ʻia iā ia ka naʻau holoholona; A hala aʻe nā manawa ʻehiku ma luna ona.

¹⁷ “ʻO ka manaʻo paʻa kēia o nā mea kiaʻi, A ʻo ke kauoha hoʻi a nā mea hemolele; I ʻike ai ka poʻe e ola ana Aia ma luna o ke aupuni kanaka ka Mea Kiʻekiʻe e aliʻi ana, A hāʻawi aku nō ʻo ia ia mea na ka mea āna e makemake ai, A hoʻonoho ma luna iho i nā kānaka lalo loa.”

¹⁸ ‘Eia ka moe aʻu a ke aliʻi a Nebukaneza i ʻike ai; ʻānō e Beletesaza, e haʻi mai ʻoe iaʻu i ka hōʻike; no ka mea, ʻaʻole e hiki i ka poʻe naʻauao a pau o koʻu aupuni ke hoʻākāka mai i ka hōʻike; akā, e hiki nō iā ʻoe; no ka mea, aia i loko ou ka ʻuhane o nā akua hemolele.’

¹⁹ ¶ “A laila pili pū ihola ʻo Daniʻela i kapa ʻia ʻo Beletesaza i hoʻokahi hora, a pono ʻole kona manaʻo. ʻEkemu maila ke aliʻi, ʻī mai, ‘E Beletesaza, mai pili pū kou manaʻo no ka moe, a me kona ʻano.’ ʻĪ akula ʻo Beletesaza, ‘E koʻu haku, i ka poʻe i hōʻino mai iā ʻoe kēia moe, a ʻo ka hoʻohālike ʻana i kou poʻe ʻenemi nō ia.

²⁰ ‘ʻO ka lāʻau āu i ʻike ai, he nui, a he ikaika, ʻo kona kiʻekiʻe i hiki aku i ka lani, a ua ʻike ʻia hoʻi ia e ko ka honua a pau;

²¹ ʻo nā lau ona he maikaʻi, a nui kona hua, a ma loko ona he ʻai na nā mea a pau; a i hoʻomaluhia ai nā holoholona o ke kula ma lalo iho ona, a ma luna o kona mau lālā i kau ai nā manu o ka lewa;

²² ʻo ʻoe nō ia, e ke aliʻi, ua māhuahua ʻoe a lilo i mea ikaika; no ka mea, ua māhuahua kou nui a hiki i ka lani, a ʻo kou aliʻi ʻana i ka wēlau o ka honua.

²³ ‘A ʻo kāu ʻike ʻana, e ke aliʻi, i ka mea kiaʻi, he mea hemolele e iho mai ana, mai ka lani mai, e ʻōlelo ana, “E kua aku i ka lāʻau, a e hoʻopau iā ia; akā, e waiho i ke kumu o kona aʻa ma ka lepo, me ke apo hao a me ke keleawe, ma waena o nā mea uliuli o ke kula; a e hoʻopulu ʻia i ka hau o ka lani, ʻo kona kuleana aia nō ia me nā holoholona o ke kula, a hala aku nā manawa ʻehiku ma luna iho ona”;

²⁴ eia ka hōʻike ʻana, e ke aliʻi ē, a eia hoʻi ka manaʻo paʻa o ka Mea Kiʻekiʻe, ka Mea e kau mai ana ma luna o kuʻu haku ke aliʻi:

²⁵ e kipaku lākou iā ʻoe mai nā kānaka aku, a ʻo kou wahi e noho ai aia nō ia me nā holoholona o ke kula, a e ʻai iho ʻoe i ka weuweu e like me nā bipi kauō, a e hoʻopulu ʻia nō hoʻi ʻoe i ka hau o ka lani, a hala nā manawa ʻehiku ma luna ou, a ʻike ʻoe e aliʻi ana ka Mea Kiʻekiʻe ma luna o ke aupuni kanaka, a hāʻawi aku nō ʻo ia ia mea i kāna mea e manaʻo ai.

²⁶ ‘A e like me ka mea i ʻōlelo ʻia, e waiho ʻia ke kumu o nā aʻa o ua lāʻau lā; eiʻa, a ʻike ʻoe no nā Lani mai ke aliʻi ʻana, a laila e paʻa ai iā ʻoe kou aupuni.

²⁷ ‘No ia mea, e ke aliʻi ē, e hāliu ʻoluʻolu mai ʻoe i koʻu manaʻo, a e huli ʻoe mai kou hewa mai i ka pono, a mai kou lawehala ʻana i ka manawaleʻa aku i ka poʻe hune; pēlā paha e hoʻolōʻihi ʻia mai ai kou manawa pono.’

²⁸ ¶ “A kau mai nō kēia mau mea a pau ma luna o Nebukaneza ke aliʻi.

²⁹ “A pau nā malama he ʻumikumamālua e holoholo ana nō ia ma luna o ka hale aliʻi o ke aupuni o Babulona.

³⁰ “ʻŌlelo ihola ke aliʻi, ʻī ihola, ‘ʻAʻole anei kēia ʻo Babulona nui ka mea aʻu i kūkulu ai i hale no ke aupuni, me ka ikaika o koʻu mana, a no ka hanohano o koʻu nani?’

³¹ “Aia i loko o ko ke aliʻi waha kēia ʻōlelo, paʻē maila ka leo mai ka lani mai, ʻī maila, ‘E Nebukaneza, e ke aliʻi ē, ua ʻōlelo ʻia iā ʻoe, ua māʻalo aʻe ke aupuni mai ou aku.

³² ‘A e kipaku ʻia nō ʻoe mai nā kānaka aku, a ʻo kou wahi e noho ai aia pū nō ia me nā holoholona o ke kula; a e hānai ʻia ʻoe i ka mauʻu e like me nā bipi kauō, a hala mai ma luna ou nā manawa ʻehiku; a ʻike ʻoe ʻo ka Mea Kiʻekiʻe ʻo ia ke aliʻi ma ke aupuni o kānaka, a e hāʻawi ʻia nō ia i kāna mea e manaʻo ai.’

³³ “Ia hora nō, ua kō ia ʻōlelo ma luna o Nebukaneza: ua kipaku ʻia ʻo ia mai nā kānaka aku, ua ʻai iho nō ia i ka mauʻu e like me nā bipi kauō, ua pulu kona kino i ka hau o ka lani, a loloa kona hulu e like me nā hulu o ka ʻaeto, a ʻo kona mau māiʻuʻu ua like me nā māiʻuʻu o nā manu.

³⁴ ¶ “I ka pau ʻana o ua mau lā lā, ʻo wau ʻo Nebukaneza, ua leha aʻe au i kuʻu mau maka i ka lani, a hoʻi mai iaʻu kuʻu ʻike; a hoʻomaikaʻi aku au i ka Mea Kiʻekiʻe, hoʻonani aku au, a hoʻomana hoʻi i ka Mea e ola mau ana, Ua mau loa kona aliʻi ʻana, A ʻo kona aupuni ia hanauna aku a ia hanauna aku.

³⁵ “A ua manaʻo ʻia ko ka honua a pau he mea ʻole; Ua hana nō hoʻi ʻo ia e like me kona makemake ma waena o nā pūʻali o ka lani, A me ko ka honua; ʻAʻole e hiki i kekahi ke hoʻopaʻa aku i kona lima, ʻAʻole hoʻi e ʻōlelo aku iā ia, ‘He aha kāu e hana nei?’

³⁶ “Ia manawa nō ua hoʻi mai iaʻu kuʻu manaʻo; a me ka hanohano o koʻu aupuni, ua hoʻi mai iaʻu kuʻu nani a me kuʻu naʻauao; a launa mai iaʻu kuʻu poʻe kākāʻōlelo, a me koʻu poʻe kaukaualiʻi; ua paʻa hou au ma kuʻu aupuni, a ua hoʻonui hoʻi ʻia kuʻu hanohano.

³⁷ “ʻĀnō ʻo wau ʻo Nebukaneza ke hoʻonani aku nei au, ke hoʻoleʻa aku hoʻi me ka mahalo i ke Aliʻi o ka lani, ʻo kāna mau hana ua pau i ka ʻoiaʻiʻo, a ʻo kona mau ʻaoʻao ua pololei loa; a ʻo ka poʻe e hele ana ma ka haʻaheo, e hiki nō iā ia ke hoʻohaʻahaʻa iho iā lākou.”