KA BUKE MUA A SAMUʻELA 9 - Ka Baibala Hemolele

1 No Saula. 3 No kona ʻimi ʻana i nā hoki o kona makua kāne. 18 No kona hālāwai ʻana me Samuʻela, a me kona ʻahaʻaina pū ʻana me ia. 25 Ka ʻōlelo a Samuʻela i ʻōlelo malū ai iā Saula.

MOKUNA IX.

¹ ¶ Hoʻokahi kanaka no kā Beniamina, ʻo Kisa kona inoa, ke keiki a ʻAbiʻela, ke keiki a Zerora, ke keiki a Bekorata, ke keiki a ʻApia, no Beniamina, he kanaka waiwai nui.

² He keiki kāna, ʻo Saula kona inoa, he ʻōpiopio a maikaʻi; ʻaʻohe kanaka maikaʻi i waena o nā mamo a ʻIseraʻela e like ana me ia; mai kona poʻohiwi aku a hala loa i luna, ka ʻoi ʻana o kona kiʻekiʻe ma mua o ko nā kānaka a pau.

³ Ua nalowale nā hoki a Kisa, ka makua kāne o Saula; ʻī akula ʻo Kisa i kāna keiki, iā Saula, “E lawe ʻoe i kekahi kauā me ʻoe, a hele e ʻimi i nā hoki.”

⁴ Kaʻahele nō ia ma ka mauna ʻo ʻEperaima, a kaʻahele hoʻi ma ka ʻāina ʻo Salisa, ʻaʻole i loaʻa iā lāua; a laila kaʻahele lāua ma ka ʻāina ʻo Salima, ʻaʻole ma laila; hele akula ia ma ka ʻāina o kā Beniamina, ʻaʻole i loaʻa iā lāua.

⁵ ¶ A hiki akula lāua ma ka ʻāina ʻo Zupa, ʻī akula ia i kāna kauā me ia, “ʻEā, e hoʻi kāua, o pau auaneʻi ka manaʻo ʻana o kuʻu makua kāne i nā hoki, a hoʻokaumaha ʻia nō kāua.”

⁶ ʻĪ maila kēlā iā ia, “Aia hoʻi, ma kēia kūlanakauhale e noho ana kekahi kanaka o ke Akua, he kanaka kaulana; a ʻo ka mea a pau āna e ʻōlelo ai, e kō ʻiʻo nō ia; e hele kāua ma laila, malama e hiki iā ia ke kuhikuhi mai iā kaua i ke ala e pono ai kāua ke hele.”

⁷ ʻĪ akula ʻo Saula i kāna kauā, “Inā paha e hele kāua, he aha ko kāua e lawe aku ai i ua kanaka lā? No ka mea, ua pau ka berena ma loko o ko kāua ipu, ʻaʻole he manawaleʻa e lawe aku i ua kanaka lā o ke Akua; he aha ka mea iā kāua?”

⁸ ʻŌlelo hou maila ke kauā iā Saula, ʻī maila, “Eia ma kuʻu lima ka hapahā o ke sekela kālā; ʻo kēia kaʻu e hāʻawi aku ai i ua kanaka lā o ke Akua, i kuhikuhi mai ai ia i ke ala o kāua.”

⁹ (I ka manawa ma mua i loko o kā ʻIseraʻela, a i hele ke kanaka e nīnau i ke Akua, pēnēia ia i ʻōlelo ai, “Inā kākou e hele i ka mea ʻike”; no ka mea, ʻo ke kāula i kēia manawa, ua kapa ʻia ʻo ia ma mua, he mea ʻike.)

¹⁰ ʻĪ akula ʻo Saula i kāna kauā, “Ua pono kāu ʻōlelo; inā kāua e hele aku”; a hele akula lāua i ke kūlanakauhale, i kahi o ke kanaka o ke Akua.

¹¹ ¶ A i kā lāua piʻi ʻana i ke kūlanakauhale, loaʻa iā lāua nā kaikamāhine e hele ana e huki wai, ʻī akula iā lākou, “Ma ʻaneʻi anei ke kanaka ʻike?”

¹² ʻŌlelo maila lākou iā lāua, ʻī maila, “Ma ʻaneʻi nō; aia hoʻi ia ma mua ou, e wikiwiki; no ka mea, i hele mai ia i ke kūlanakauhale i kēia lā; no ka mea, he ʻahaʻaina na nā kānaka i kēia lā ma kahi kiʻekiʻe.

¹³ “A hiki aku ʻolua ma loko o ke kūlanakauhale, e loaʻa koke ʻo ia iā ʻolua, ma mua o kona piʻi ʻana aʻe ma kahi kiʻekiʻe e ʻai ai; ʻaʻole e ʻai nā kānaka a hiki aku ia; no ka mea, nāna nō e hoʻomaikaʻi aku i ka ʻahaʻaina, a ma hope iho, ʻai nō ka poʻe i ʻōlelo ʻia. No ia mea, e piʻi ʻolua; no ka mea, eia ka lā e loaʻa ai iā ʻolua ia.”

¹⁴ A piʻi akula lāua i ke kūlanakauhale; a hiki lāua i loko o ke kūlanakauhale, aia hoʻi, hālāwai lāua me Samuʻela e piʻi ana ma kahi kiʻekiʻe.

¹⁵ ¶ Ua ʻōlelo ʻē mai ʻo Iēhova i ka pepeiao o Samuʻela i ka lā ma mua o ko Saula hiki ʻana mai, ʻī maila:

¹⁶ “ʻApōpō ma kēia manawa, e hoʻouna aku au i ou lā i kekahi kanaka no ka ʻāina o kā Beniamina, a e poni aku ʻoe iā ia i aliʻi ma luna o kuʻu poʻe kānaka o kā ʻIseraʻela, i hoʻopakele mai ai ia i koʻu poʻe kānaka mai ka lima mai o ko Pilisetia; ua nānā aku au i koʻu poʻe kānaka; no ka mea, ua hiki mai ko lākou uē ʻana i oʻu nei.”

¹⁷ A ʻike akula ʻo Samuʻela iā Saula, ʻōlelo maila ʻo Iēhova iā ia, “Eia ke kanaka aʻu i ʻōlelo ai iā ʻoe; ʻo ia ka mea e aliʻi ai ma luna o kuʻu poʻe kānaka.”

¹⁸ Hoʻokokoke akula ʻo Saula iā Samuʻela ma ka ʻīpuka pā, ʻī akula, “Ke noi aku nei au iā ʻoe, e haʻi mai ʻoe iaʻu i ka hale o ka mea ʻike.”

¹⁹ ʻŌlelo maila ʻo Samuʻela iā Saula, ʻī maila, “ʻO wau nō ka mea ʻike; e piʻi aʻe ʻoe ma mua oʻu i kahi kiʻekiʻe; no ka mea, e ʻai pū ʻolua me aʻu i kēia lā; ʻapōpō e kuʻu aku au iā ʻoe, a e haʻi aku au i nā mea a pau ma loko o kou naʻau.

²⁰ “A no kāu mau hoki i nalowale i nā lā ʻekolu aʻe nei, mai manaʻo ʻoe iā lākou; no ka mea, ua loaʻa lākou. Ma luna o wai anei ka makemake a pau o kā ʻIseraʻela? ʻAʻole anei ma luna ou, a me ko ka hale a pau o kou makua kāne?”

²¹ ʻŌlelo akula ʻo Saula, ʻī akula, “ʻAʻole anei wau no kā Beniamina; no ka mea ʻuʻuku o nā hanauna a pau o kā ʻIseraʻela? A ʻo kuʻu ʻohana ka mea ʻuʻuku o nā ʻohana a pau o kā Beniamina? No ke aha lā ʻoe i ʻōlelo mai ai iaʻu pēlā?”

²² ¶ Lawe akula ʻo Samuʻela iā Saula a me kāna kauā, alakaʻi iā lāua ma loko o ke keʻena ʻai, a hoʻonoho iā lāua ma kahi maikaʻi i waena o ka poʻe i ʻōlelo ʻia, he kanakolu paha lākou.

²³ ʻŌlelo akula ʻo Samuʻela i ke kahu ʻai, “E lawe mai i kahi aʻu i hāʻawi aku ai iā ʻoe, i ka mea aʻu i ʻōlelo ai iā ʻoe, ‘E waiho ia me ʻoe.’”

²⁴ Lawe aʻela ke kahu ʻai i ka ʻūhā mua, a me ka mea ma luna, a waiho i mua o Saula. ʻĪ akula ʻo Samuʻela, “Aia hoʻi ʻo ke koena, e waiho ia i mua ou, a e ʻai ʻoe; no ka mea, ua hoʻokaʻawale ia mea nāu no ka manawa aʻu i ʻōlelo ai, ua kāhea aku au i nā kānaka.” A ʻai pū ihola ʻo Saula me Samuʻela ia lā.

²⁵ ¶ A iho mai lākou mai kahi kiʻekiʻe mai a i ke kūlanakauhale, kamaʻilio pū ʻo ia me Saula ma luna o ka hale.

²⁶ Ala aʻela lākou i kakahiaka nui; a i ka wanaʻao, kāhea akula ʻo Samuʻela iā Saula ma luna o ka hale, ʻī akula, “E ala, a hoʻouna aku au iā ʻoe.” Ala mai ʻo Saula, a hele akula lāua i waho, ʻo ia a me Samuʻela.

²⁷ A i ko lāua iho ʻana ma ka mokuna o ke kūlanakauhale, ʻī akula ʻo Samuʻela iā Saula, “E ʻī aku ʻoe i ke kauā, e hele ʻē aku ia ma mua o kāua,” (a hele akula ia,) “Akā, e kū mālie ʻoe i kēia wā, i hōʻike aku ai au iā ʻoe i ka ʻōlelo a ke Akua.”