KA BUKE MUA A SAMUʻELA 8 - Ka Baibala Hemolele

1 Hoʻolilo ʻo Samuʻela i kāna mau keiki i luna kānāwai. 3 Pono ʻole kā lāua hana ʻana. 5 Nonoi mai kā ʻIseraʻela iā Samuʻela i aliʻi no lākou. 10 Hōʻike maila ʻo Samuʻela i ke ʻano o ke aliʻi e aliʻi ai ma luna o lākou.

MOKUNA VIII.

¹ ¶ A ʻelemakule ʻo Samuʻela, hoʻolilo akula ia i kāna mau keiki i mau luna kānāwai no kā ʻIseraʻela.

² A ʻo Ioʻela ka inoa o kāna keiki mua, a ʻo ʻAbiia ka inoa o ka lua o kāna keiki; he mau luna kānāwai lāua ma Beʻereseba.

³ Akā, ʻaʻole i hele kāna mau keiki ma kona ʻaoʻao; huli aʻela lāua ma muli o ka waiwai ʻālunu, a lawe lāua i ke kīpē, a hoʻokahuli i ka pono.

⁴ ¶ A laila hoʻākoakoa ʻia aʻela nā lunakahiko a pau o kā ʻIseraʻela, a hele mai i o Samuʻela lā ma Rama,

⁵ ʻĪ maila iā ia, “Aia hoʻi, ua ʻelemakule ʻoe, ʻaʻole i hele kāu mau keiki ma kou ʻaoʻao; ʻānō e hoʻonoho ʻoe i aliʻi no mākou, nāna mākou e hoʻoponopono e like me nā lāhui kanaka a pau.”

⁶ Ua hewa ia mea i ka manaʻo o Samuʻela, i kā lākou i ʻōlelo mai ai, “E hāʻawi ʻoe i aliʻi no mākou, nāna mākou e hoʻoponopono.” A pule akula ʻo Samuʻela iā Iēhova.

⁷ ʻĪ maila ʻo Iēhova iā Samuʻela, “E hoʻolohe ʻoe i ka leo o nā kānaka i nā mea a pau a lākou e ʻōlelo mai ai iā ʻoe; no ka mea, ʻaʻole lākou i hoʻowahāwahā iā ʻoe; akā, ua hoʻowahāwahā mai lākou iaʻu, i aliʻi ʻole ai au ma luna o lākou.

⁸ “E like me nā hana a pau a lākou i hana ai, mai ka manawa aʻu i lawe mai ai iā lākou mai ʻAigupita mai, a hiki i kēia manawa, iā lākou i haʻalele ai iaʻu, a mālama aku i nā akua ʻē; pēlā lākou e hana nei iā ʻoe.

⁹ “ʻĀnō hoʻi, e hoʻolohe ʻoe i ko lākou leo; akā, e ao ikaika aku ʻoe iā lākou, a e hōʻike aku hoʻi i ke ʻano o ke aliʻi e aliʻi ai ma luna o lākou.”

¹⁰ ¶ Haʻi akula ʻo Samuʻela i ka ʻōlelo a pau a Iēhova i nā kānaka i noi ai iā ia i aliʻi.

¹¹ ʻŌlelo akula ia, “Eia ke ʻano o ke aliʻi e aliʻi ai ma luna o ʻoukou: E lawe nō ia i nā keiki kāne a ʻoukou, a e hoʻonoho iā lākou nona ma nā hale kaʻa ona, a ma kona poʻe hoʻoholo lio, a e holo nō kekahi ma mua o nā hale kaʻa ona.

¹² “A e hoʻonoho nō ia nona i nā luna tausani a me nā luna kanalima, a no ka mahi i kāna mahi ʻana, a no ke ʻoki ʻana i kāna ʻai, a no ka hana ʻana i kāna mea kaua, a me nā mea o kona mau hale kaʻa.

¹³ “A e lawe nō ia i nā kaikamāhine a ʻoukou i mea hana i nā mea ʻono, a i mea kuke, a i mea kahu ʻai.

¹⁴ “A e lawe nō ia i nā mahina ʻai o ʻoukou, a me kā ʻoukou pā waina, a me kā ʻoukou pā ʻoliva, i nā mea maikaʻi, a e hāʻawi aku na kāna poʻe kauā.

¹⁵ “A e lawe nō ia i ka hapaʻumi o nā hua a ʻoukou, a ʻo nā pā waina, a e hāʻawi aku na kona mau luna, me kāna mau kauā.

¹⁶ “A e lawe nō hoʻi ia i nā kauā kāne a ʻoukou, a me nā kauā wahine a ʻoukou, a me ko ʻoukou poʻe kānaka uʻi maikaʻi, a me nā hoki a ʻoukou, a e hoʻonoho iā lākou no kāna hana.

¹⁷ “E lawe hoʻi ia i ka hapaʻumi o kā ʻoukou poʻe hipa; a e lilo ʻoukou i poʻe kauā nāna.

¹⁸ “A e uē nui ʻoukou ia lā, no ko ʻoukou aliʻi a ʻoukou i koho ai no ʻoukou; ʻaʻole ʻo Iēhova e hoʻolohe mai iā ʻoukou ia lā.”

¹⁹ ¶ Akā, ʻaʻole loa i hoʻolohe mai nā kānaka i ka leo o Samuʻela; ʻī maila lākou, “ʻAʻole,” ua makemake nō mākou i aliʻi ma luna o mākou,

²⁰ “I like ai mākou me nā lāhui kanaka ʻē a pau; a i hoʻoponopono ko mākou aliʻi iā mākou, a e hele ia ma mua o mākou, a e kaua aku i ko mākou kaua.”

²¹ Hoʻolohe aʻela ʻo Samuʻela i ka ʻōlelo a pau a nā kānaka, a haʻi akula ia mea i nā pepeiao o Iēhova.

²² ʻŌlelo maila ʻo Iēhova iā Samuʻela, “E hoʻolohe ʻoe i ko lākou, leo, a e hoʻonoho ʻoe i aliʻi no lākou.” ʻŌlelo akula ʻo Samuʻela i nā kānaka o kā ʻIseraʻela, “E hoʻi ʻoukou, ʻo kēlā kanaka kēia kanaka i kona kūlanakauhale.”