KA BUKE MUA A SAMUʻELA 7 - Ka Baibala Hemolele

1 No ka lawe ʻana i ka pahu o ke Akua i Kiriata Iearima. 3 Ka ʻōlelo a Samuʻela i kā ʻIseraʻela e mihi. Kaua mai ko Pilisetia i kā ʻIseraʻela. 5 Ka pule a Samuʻela. 11 No ka luku ʻana i ko Pilisetia. 15 Hoʻoponopono akula i kā ʻIseraʻela.

MOKUNA VII.

¹ ¶ A hele maila nā kānaka o Kiriata Iearima, a lawe akula i ka pahu o Iēhova, a waiho ihola ia ma loko o ka hale o ʻAbinadaba ma ka puʻu, a hoʻolaʻa akula i kāna keiki iā ʻEleazara e mālama i ka pahu o Iēhova.

² A i ka manawa i noho ai ka pahu ma Kiriata Iearima; no ka mea, ua lōʻihi ka manawa, he iwakālua makahiki; auē aʻela ko ka hale a pau o kā ʻIseraʻela, ma muli o Iēhova.

³ ¶ ʻŌlelo akula ʻo Samuʻela i ko ka hale a pau o kā ʻIseraʻela, ʻī akula, “Inā e hoʻi hou ʻoukou iā Iēhova me ko ʻoukou naʻau a pau, e hoʻolei aku ʻoukou i nā akua ʻē, a me ʻAsetarota, mai o ʻoukou aku, a e hoʻomākaukau i ko ʻoukou naʻau no Iēhova, a e mālama ʻoukou iā ia wale nō; a e hoʻopakele mai ʻo ia iā ʻoukou mai ka lima mai o ko Pilisetia.”

⁴ A laila hoʻolei akula nā mamo a ʻIseraʻela iā Baʻalima, a me ʻAsetarota, a mālama iā Iēhova wale nō.

⁵ ¶ ʻŌlelo akula ʻo Samuʻela, “E hōʻuluʻulu i kā ʻIseraʻela a pau ma Mizepa, a e pule aku au iā Iēhova no ʻoukou.”

⁶ A hōʻuluʻulu ʻia aʻela lākou ma Mizepa, a hukihuki lākou i ka wai, a ninini akula i mua o Iēhova, a hoʻokē ʻai lākou ia lā, ʻī akula, “Ua hana hewa mākou iā Iēhova.” Hoʻoponopono akula ʻo Samuʻela i nā mamo a ʻIseraʻela ma Mizepa.

⁷ A lohe aʻela ko Pilisetia i ka ʻākoakoa ʻana o nā mamo a ʻIseraʻela ma Mizepa, piʻi akula nā haku o ko Pilisetia e kūʻē i kā ʻIseraʻela. A lohe aʻela nā mamo a ʻIseraʻela, makaʻu ihola lākou i ko Pilisetia.

⁸ ʻĪ akula nā mamo a ʻIseraʻela iā Samuʻela, “Mai hoʻōki ʻoe i ka hea ʻana aku iā Iēhova, i ko kākou Akua no mākou, i hoʻopakele mai ai ʻo ia iā mākou i ka lima o ko Pilisetia.”

⁹ Lawe akula ʻo Samuʻela i ke keiki hipa omo waiū, a kaumaha akula ia mea a pau i mōhai kuni iā Iēhova; a kāhea akula ʻo Samuʻela iā Iēhova no kā ʻIseraʻela, a hoʻolohe mai ʻo Iēhova iā ia.

¹⁰ A iā Samuʻela i kaumaha aku ai i ka mōhai kuni, hoʻokokoke mai ko Pilisetia e kaua mai i kā ʻIseraʻela; hoʻohekili maila ʻo Iēhova me ka hekili nui ma luna o ko Pilisetia ia lā, a hoʻopuehu iā lākou; a pepehi ʻia ihola lākou i mua o kā ʻIseraʻela.

¹¹ Hele akula nā kānaka o kā ʻIseraʻela ma waho o Mizepa, a hahai akula i ko Pilisetia, a luku akula iā lākou a hiki ma Betekara.

¹² ¶ Lawe akula ʻo Samuʻela i pōhaku, a kūkulu ihola ma waena o Mizepa a ʻo Sena, a kapa akula i kona inoa, ʻo ʻEbenezera, ʻī ihola, “Ua kōkua mai ʻo Iēhova iā kākou a hiki i ʻaneʻi.”

¹³ A pio ihola ko Pilisetia, ʻaʻole i hele hou mai lākou ma loko o ka mokuna o kā ʻIseraʻela; a kūʻē maila ka lima o Iēhova i ko Pilisetia i nā lā a pau o Samuʻela.

¹⁴ A ʻo nā kūlanakauhale i lilo i ko Pilisetia, ua hoʻihoʻi ʻia mai ia no kā ʻIseraʻela, mai ʻEkerona a hiki i Gata; a me ko laila ʻāina a puni na kā ʻIseraʻela i lawe aʻe mai loko mai o ka lima o ko Pilisetia. A ua kuʻikahi kā ʻIseraʻela me kā ʻAmora.

¹⁵ ¶ A hoʻoponopono akula ʻo Samuʻela i kā ʻIseraʻela i nā lā a pau o kona ola ʻana.

¹⁶ Kaʻahele aʻela ia i kēlā makahiki i kēia makahiki, ma Betela, a ma Gilegala a ma Mizepa e hoʻoponopono i kā ʻIseraʻela ma ia mau wahi a pau.

¹⁷ A hoʻi hou mai ia ma Rama; no ka mea, ma laila kona hale; a hoʻoponopono akula ia i kā ʻIseraʻela ma laila; a ma laila hoʻi ia i hana ai i kuahu no Iēhova.