KA BUKE MUA A SAMUʻELA 5 - Ka Baibala Hemolele

1 No ka hina ʻana o Dagona i mua o ka pahu o ke Akua. 6 No ka maʻi o ko Pilisetia.

MOKUNA V.

¹ ¶ Lawe akula ko Pilisetia i ka pahu o ke Akua, a halihali akula mai ʻEbenezera aku a hiki i ʻAsedoda.

² A lawe aʻela ko Pilisetia i ka pahu o ke Akua, a hali akula i loko o ka hale o Dagona, a waiho ma ka ʻaoʻao o Dagona.

³ Ia lā iho, ala aʻela ko ʻAsedoda i kakahiaka nui, aia hoʻi, ua hina ihola ʻo Dagona i lalo ke alo ma ka honua i mua o ka pahu o Iēhova. Lawe akula lākou iā Dagona, a hoʻokū hou iā ia ma kona wahi.

⁴ A ia lā aʻe, ala hou aʻela lākou i kakahiaka nui, aia hoʻi, ua hina ihola ʻo Dagona i lalo ke alo ma ka honua i mua o ka pahu o Iēhova; a ʻo ke poʻo o Dagona, a me kona mau lima ʻelua, ua hemo ma ka paepae, a ʻo ka iʻa wale nō i koe iā ia.

⁵ No ia mea, ʻo nā kāhuna a Dagona, a me nā mea a pau e hele ma loko o ka hale o Dagona, ʻaʻole lākou e hehi ma luna o ka paepae o Dagona ma ʻAsedoda, a hiki i kēia wā.

⁶ ¶ A ua kaumaha ka lima o Iēhova ma luna o ko ʻAsedoda, a luku mai ʻo ia iā lākou, a hahau mai iā lākou i ka maʻi hī koko, i ko ʻAsedoda a me ko laila wahi a puni.

⁷ A ʻike akula nā kānaka o ʻAsedoda i ka mea i hana ʻia pēlā, ʻī aʻela lākou, “ʻAʻole e noho me kākou ka pahu o ke Akua o kā ʻIseraʻela; no ka mea, ua kaumaha kona lima ma luna o kākou, a ma luna o Dagona ko kākou akua.”

⁸ Hoʻouna akula lākou e hōʻuluʻulu i nā haku a pau o ko Pilisetia i o lākou lā, nīnau akula iā lākou, “He aha kā mākou e hana aku ai i ka pahu o ke Akua o kā ʻIseraʻela?” ʻĪ maila lākou, “E lawe ʻia aku ka pahu o ke Akua o kā ʻIseraʻela ma Gata.” A lawe akula lākou i ka pahu o ke Akua o kā ʻIseraʻela i laila.

⁹ A ma hope o kā lākou lawe ʻana aku ia mea ma laila, kūʻē maila ka lima o Iēhova i ua kūlanakauhale lā me ka luku nui loa; a hahau mai ia i nā kānaka o ke kūlanakauhale, i ka mea ʻuʻuku, a me ka mea nui, a pohā ihola ko lākou puʻupuʻu koko.

¹⁰ No ia mea, lawe akula lākou i ka pahu o ke Akua i ʻEkerona. A hiki akula ka pahu o ke Akua ma ʻEkerona, auē ihola ko ʻEkerona, i ka ʻī ʻana aʻe, “Ua lawe mai lākou i ka pahu o ke Akua o kā ʻIseraʻela i o kākou nei e pepehi iā kākou a me ko kākou poʻe kānaka!”

¹¹ No ia hoʻi, hoʻouna akula lākou e hōʻuluʻulu i nā haku a pau o ko Pilisetia, ʻī akula, “E lawe aku i ka pahu o ke Akua o kā ʻIseraʻela, a e hoʻihoʻi aku ma kona wahi, i ʻole ai ia e pepehi mai iā mākou a me ko mākou poʻe kānaka”; no ka mea, he make nui ma ke kūlanakauhale a pau; ua kaumaha loa ka lima o ke Akua ma laila.

¹² A ʻo nā kanaka ʻaʻole i make, loʻohia lākou e ka maʻi hī koko; a piʻi aʻela ka uē o ua kūlanakauhale lā i ka lani.