KA BUKE MUA A SAMUʻELA 4 - Ka Baibala Hemolele

1 No ke kaua ʻana o kā ʻIseraʻela me ko Pilisetia. 12 Lilo ka pahu o ke Akua, a make nā keiki a ʻEli, a me ʻEli, a me ka wahine a Pinehasa.

MOKUNA IV.

¹ ¶ A hiki aʻela ka ʻōlelo a Samuʻela i kā ʻIseraʻela a pau. Hele kūʻē akula kā ʻIseraʻela i ko Pilisetia i ke kaua, a hoʻomoana ihola ma ʻEbenezera; a ʻo ko Pilisetia hoʻomoana ihola ma ʻApeka.

² Hoʻomākaukau iho ko Pilisetia iā lākou iho e kūʻē i kā ʻIseraʻela; a hoʻouka ihola, a ua luku ʻia ʻo kā ʻIseraʻela i mua o ko Pilisetia; a ʻehā tausani kānaka paha i luku ʻia i ke kaua ʻana ma ke kula.

³ A hiki maila nā kānaka i kahi i hoʻomoana ai, ʻī aʻela nā lunakahiko o kā ʻIseraʻela, “No ke aha lā ʻo Iēhova i luku mai ai iā kākou i kēia lā i mua o ko Pilisetia? E lawe mai i o kākou nei i ka pahu berita o Iēhova mai Silo mai, a hiki mai ia i waena o kākou, ʻo ia ka mea e hoʻōla iā kākou mai ka lima mai o ko kākou poʻe ʻenemi.”

⁴ Hoʻouna akula nā kānaka ma Silo e lawe mai mai laila mai i ka pahu berita o Iēhova Sābāōta, e waiho ana ma waena o nā kerubima; i laila nā keiki ʻelua a ʻEli, ʻo Hopeni a me Pinehasa me ka pahu berita o ke Akua.

⁵ ¶ A hiki maila ka pahu berita o Iēhova i loko o kahi i hoʻomoana ai, hoʻōho aʻela kā ʻIseraʻela a pau me ka hoʻōho nui, a haʻalulu ka honua.

⁶ A lohe aʻela ko Pilisetia i ka leo o ka hoʻōho ʻana, ʻī aʻela lākou, “No ke aha lā ka leo o kēia hoʻōho nui ʻana ma kahi i hoʻomoana ai ka poʻe Hebera?” A ʻike lākou, ua hiki mai ka pahu o Iēhova ma kahi i hoʻomoana ai.

⁷ Makaʻu ihola ko Pilisetia; no ka mea, ʻī ihola lākou, “Ua hiki mai ke Akua i loko o kahi i hoʻomoana ai!” ʻĪ aʻela lākou, “Auē kākou! No ka mea, ʻaʻohe mea ma mua e like ai me kēia.

⁸ “Auē kākou! ʻO wai lā ka mea nāna kākou e hoʻōla mai ka lima mai o kēia mau akua mana? ʻO nā akua kēia i luku ai i ka poʻe o ʻAigupita i nā ʻino a pau ma ka wao nahele.

⁹ “E ikaika ʻoukou, e hoʻokanaka hoʻi, e ko Pilisetia, i lilo ʻole ai ʻoukou i kauā na ka poʻe Hebera, e like me lākou na ʻoukou; e hoʻokanaka e kaua aku!”

¹⁰ A kaua akula ko Pilisetia, a luku ʻia, ʻo kā ʻIseraʻela, a holo kēlā kanaka kēia kanaka i kona halelewa; a he nui loa nā mea i make; no ka mea, hāʻule ihola ʻo kā ʻIseraʻela, he kanakolu tausani koa hele wāwae.

¹¹ A ua hao ʻia ka pahu o ke Akua; a make nā keiki ʻelua a ʻEli, ʻo Hopeni a ʻo Pinehasa.

¹² ¶ Holo akula kekahi kanaka no Beniamina mai ke kaua aku, a hiki ma Silo ia lā hoʻokahi, me kona kapa i haehae ʻia, a me ka lepo ma luna o kona poʻo.

¹³ A hiki akula ia, aia hoʻi, e noho ana ʻo ʻEli ma luna o ka noho ma kapa alanui, e kiaʻi ana; no ka mea, pīhoihoi kona naʻau no ka pahu o ke Akua. A hiki akula ke kanaka ma ke kūlanakauhale, a haʻi aku, auē nui ihola ko ke kūlanakauhale a pau.

¹⁴ A lohe aʻela ʻo ʻEli i ka leo o ka uē ʻana, ʻī ihola ia, “No ke aha lā ka leo o kēia haunaele?” A hele koke mai ke kanaka, a haʻi iā ʻEli.

¹⁵ He kanaiwakumamāwalu ko ʻEli mau makahiki, ua kū paʻa kona mau maka, ʻaʻole ia i ʻike.

¹⁶ ʻĪ maila ke kanaka iā ʻEli, “ʻO wau nō ka mea i hele mai, mai ke kaua mai, i kēia lā wau i holo mai nei mai ke kaua mai.” Nīnau akula ia, “He aha ka ʻōlelo, e kuʻu keiki?”

¹⁷ ʻŌlelo maila ka ʻelele, ʻī maila, “Ua heʻe kā ʻIseraʻela i mua o ko Pilisetia; a ua nui loa ka poʻe kānaka i pepehi ʻia; a ʻo kāu mau keiki ʻelua, ʻo Hopeni a ʻo Pinehasa, ua make lāua, a ua hao ʻia ka pahu o ke Akua.”

¹⁸ A i kona haʻi ʻana mai i ka pahu o ke Akua, hāʻule ihola ʻo ʻEli ma hope o kona noho ma ka ʻaoʻao o ka ʻīpuka, a haʻi kona ʻāʻī, a make ihola ia; no ka mea, he kanaka ʻelemakule ia, ua kaumaha hoʻi. A ua hoʻoponopono aku ia i kā ʻIseraʻela i nā makahiki he kanahā.

¹⁹ ¶ A ʻo kona hūnōna wahine, ka wahine a Pinehasa, ua hāpai, kokoke nō i puni; a lohe aʻela ʻo ia ia mea, i ka lilo ʻana o ka pahu o ke Akua, i ka make ʻana o kona makuahōnōai kāne a me kāna kāne hoʻi, kūlou ihola ia, no ka hānau ʻana; no ka mea, ua hiki mai kona nahunahu iā ia.

²⁰ A kokoke ia e make, ʻī akula nā wāhine e kū ana iā ia, “Mai makaʻu ʻoe; no ka mea, ua hoʻohānau ʻoe i keiki kāne.” ʻAʻole ia i ʻekemu mai, ʻaʻole hoʻi ia i maliu mai.

²¹ A kapa akula ia i ka inoa o ke keiki ʻo ʻIkaboda, ʻī akula, “Ua hala akula ka nani mai kā ʻIseraʻela aku”; no ka pahu o ke Akua i lawe ʻia aku, a no kona makuahōnōai kāne, a no kāna kāne.

²² ʻĪ akula ia, “Ua hala akula ka nani mai kā ʻIseraʻela aku; no ka mea, ua hao ʻia ka pahu o ke Akua.”