KA BUKE MUA A SAMUʻELA 31 - Ka Baibala Hemolele

1 No ke kaua ʻana o nā Pilisetia i kā ʻIseraʻela, a ʻauheʻe kā ʻIseraʻela, a make nā keiki a Saula, a pepehi ʻo Saula iā ia iho.

MOKUNA XXXI.

¹ ¶ A kaua maila nā Pilisetia i kā ʻIseraʻela; ʻauheʻe akula nā kānaka o kā ʻIseraʻela i mua o ko Pilisetia, a hāʻule ihola ka poʻe i pepehi ʻia ma ka mauna ʻo Gileboa.

² A hahai ikaika maila ko Pilisetia iā Saula, a me kāna mau keiki; a pepehi ihola nā Pilisetia iā Ionatana, a iā ʻAbinadaba a me Melekisua, nā keiki a Saula.

³ A ikaika maila ke kaua ʻana iā Saula, a loaʻa ʻo ia i nā kānaka pana pua; a haʻalulu loa ihola ia no ka poʻe pana pua.

⁴ ʻĪ akula ʻo Saula i ka mea nāna i hali kāna mea kaua, “E unuhi ʻoe i kāu pahi kaua, a e nou mai iaʻu me ia, o hiki mai auaneʻi kēia poʻe i ʻoki poepoe ʻole ʻia, a hou mai iaʻu, a hoʻomāʻewaʻewa mai iaʻu.” Akā, ʻaʻole makemake ka mea nāna i hali kāna mea kaua; no ka mea, ua makaʻu loa ia; no ia mea, lālau ʻo Saula i ka pahi kaua, a hoʻohāʻule ihola i luna.

⁵ A ʻike aku ka mea nāna i hali kāna mea kaua, ua make ʻo Saula, hāʻule ihola ia ma luna o kāna pahi kaua, a make pū me ia.

⁶ A ia lā hoʻokahi, make ihola ʻo Saula, a me kāna mau keiki ʻekolu, a me ka mea nāna i hali kāna mea kaua, a me kona poʻe kānaka a pau.

⁷ ¶ A ʻike aʻela nā kānaka o kā ʻIseraʻela ma kēlā ʻaoʻao o ke awāwa, a me ka poʻe ma kēlā ʻaoʻao o Ioredane, ua heʻe akula nā kānaka o kā ʻIseraʻela, a ua make hoʻi ʻo Saula me kāna mau keiki, haʻalele lākou i ko lākou mau kūlanakauhale, a holo akula; a hele mai nā Pilisetia a noho ihola ma laila.

⁸ A ia lā iho, hele aʻela nā Pilisetia e hao i ka poʻe i pepehi ʻia, loaʻa iā lākou ʻo Saula, a me kāna mau keiki ʻekolu i hāʻule ma ka mauna ʻo Gileboa.

⁹ A ʻoki ihola lākou i kona poʻo, a hao aʻela i kāna mea kaua, a hoʻouna akula lākou i ka ʻāina o nā Pilisetia a puni e haʻi aku ma ka hale o ko lākou kiʻi, a i nā kānaka.

¹⁰ A waiho ihola lākou i kāna mea kaua ma ka hale o ʻAsetarota, a hoʻopaʻa akula lākou i kona kino ma ka pā pōhaku o Bete Sana.

¹¹ A lohe aʻela nā kānaka o Iabesa Gileada i ka mea a nā Pilisetia i hana aku ai iā Saula,

¹² Kū aʻela nā kanaka koa a pau, a hele aku ia pō a ao, a lawe lākou i ke kino o Saula, a me nā kino o kāna mau keiki mai ka pā pōhaku aku o Bete Sana, a hele mai ma Iabesa, a puhi akula iā lākou i ke ahi ma laila.

¹³ A lawe lākou i ko lākou mau iwi, a kanu ihola ma lalo o ka lāʻau ma Iabesa, a hoʻokē ʻai lākou i nā lā ʻehiku.