KA BUKE MUA A SAMUʻELA 30 - Ka Baibala Hemolele

1 Luku maila ka ʻAmeleka iā Zikelaga, a lawe pio akula i nā mea a pau, a puhi akula i ke ahi. 10 Hahai akula ʻo Dāvida iā lākou, a luku akula iā lākou, 26 a hoʻi mai me ka waiwai pio a nui.

MOKUNA XXX.

¹ ¶ A i ka hiki ʻana aku o Dāvida me kona poʻe kānaka ma Zikelaga i ka pō ʻakolu, ua hele mai nā ʻAmeleka ma ka ʻaoʻao hema a ma Zikelaga, a ua luku aku iā Zikelaga, a puhi akula ia i ke ahi;

² a ua lawe pio aku i nā wāhine o ia wahi; ʻaʻole lākou i pepehi i kekahi o ka mea nui, ʻaʻole hoʻi i ka mea ʻuʻuku; akā, alakaʻi akula iā lākou, a hele akula ma ko lākou ala.

³ A hiki akula ʻo Dāvida me kona poʻe kānaka ma ke kūlanakauhale, aia hoʻi, ua puhi ʻia i ke ahi; a ua lawe pio ʻia aku kā lākou mau wāhine, a me kā lākou mau keiki kāne, a me kā lākou mau kaikamāhine.

⁴ A laila hoʻokiʻekiʻe aʻela ʻo Dāvida me nā kānaka me ia i ko lākou leo i luna, a auē ihola, a pau ko lākou aho i ka auē ʻana.

⁵ A ua lawe pio ʻia akula nā wāhine ʻelua a Dāvida, ʻo ʻAhinoama no Iezereʻela, a me ʻAbigaila ka wahine a Nabala no Karemela.

⁶ Pilikia loa ihola ʻo Dāvida; a ua ʻōlelo nā kānaka e pehi iā ia i ka pōhaku; no ka mea, ua kaumaha ka naʻau o nā kānaka a pau, ʻo kēlā kanaka kēia kanaka nō kāna mau keiki kāne, a me kāna mau kaikamāhine; akā, hoʻoikaika ihola ʻo Dāvida iā ia iho ma Iēhova kona Akua.

⁷ ¶ ʻŌlelo akula ʻo Dāvida iā ʻAbiatara ke kahuna, ke keiki a ʻAhimeleka, “Ke noi aku nei au iā ʻoe e lawe mai i ka ʻēpoda iaʻu.” A lawe maila ʻo ʻAbiatara i ka ʻēpoda iā Dāvida.

⁸ Nīnau akula ʻo Dāvida iā Iēhova, ʻī akula, “E hahai anei au ma hope o kēia poʻe? E loaʻa anei lākou iaʻu?” A ʻī maila ʻo ia iā ia, “E hahai aku ʻoe; no ka mea, e loaʻa nō iā ʻoe, a e lawe hou mai i nā mea a pau.”

⁹ A hele akula ʻo Dāvida, ʻo ia me nā kānaka pū me ia ʻeono haneri, a hiki lākou ma ke kahawai ʻo Besora, kahi i kali ai ka poʻe i waiho ʻia ma hope.

¹⁰ Akā, hahai akula ʻo Dāvida, ʻo ia me nā haneri kānaka ʻehā; no ka mea, hoʻonoho ʻia akula ma hope ʻelua haneri kānaka, ʻaʻole e hiki aku lākou ma kēlā kapa o ke kahawai ʻo Besora, no ko lākou nāwaliwali.

¹¹ ¶ A loaʻa iā lākou he kanaka no ʻAigupita ma ke kula, a lawe mai lākou iā ia i o Dāvida lā, a hāʻawi akula iā ia i ka berena, a ʻai ihola ia, a hoʻoinu lākou iā ia i ka wai.

¹² A hāʻawi aku lākou iā ia i kekahi ʻāpana o ke paʻi fiku, a i ʻelua hui waina maloʻo; a pau kāna ʻai ʻana, hiki hou maila ka ikaika iā ia; no ka mea, ʻaʻole ia i ʻai i ka berena, ʻaʻole hoʻi i inu i ka wai i nā lā a me nā pō ʻekolu.

¹³ Nīnau akula ʻo Dāvida iā ia, “No wai lā ʻoe? A no hea hoʻi ʻoe?” ʻĪ maila ia, “He kanaka uʻi au no ʻAigupita, he kauā na kekahi ʻAmeleka; a ua haʻalele kuʻu haku iaʻu; no ka mea, i ka pō ʻakolu aʻe nei i loʻohia ai au e ka maʻi.

¹⁴ “Hele kaua akula mākou ma ka ʻaoʻao hema o ko Kereti, a ma kekahi ʻaoʻao no kā Iuda, a ma ka ʻaoʻao hema o Kaleba, a puhi akula mākou iā Zikelaga i ke ahi.”

¹⁵ Nīnau akula ʻo Dāvida iā ia, “E hiki anei iā ʻoe ke alakaʻi aku iaʻu i ua poʻe lā?” ʻĪ maila ia, “E hoʻohiki mai ʻoe iaʻu ma ke Akua, i ʻole ʻoe e pepehi mai iaʻu, i ʻole hoʻi e hāʻawi iaʻu i loko o nā lima o kuʻu haku, a e alakaʻi aku au iā ʻoe i ua poʻe lā.”

¹⁶ ¶ A alakaʻi akula ia iā lākou, aia hoʻi, ua hoʻomoana lākou ma ka ʻāina a pau, e ʻahaʻaina ana, a e inu ana, a e haʻa ana, no ka nui o ka waiwai pio a lākou i lawe aʻe no loko mai o ka ʻāina o ko Pilisetia, a me ka ʻāina o kā Iuda.

¹⁷ A luku akula ʻo Dāvida iā lākou mai ka wanaʻao a hiki i ke ahiahi a ia lā aku; ʻaʻole i pakele kekahi kanaka o lākou, ʻehā haneri kānaka uʻi hoʻoholo kāmelo wale nō i pakele.

¹⁸ A loaʻa hou iā Dāvida nā mea a pau a kā ʻAmeleka i lawe aku ai, a hoʻopakele ʻo Dāvida i kāna mau wāhine.

¹⁹ ʻAʻole i nalowale kekahi mea iā lākou, ʻaʻole ka mea ʻuʻuku, ʻaʻole ka mea nui, ʻaʻole nā keiki kāne, ʻaʻole nā kaikamāhine, ʻaʻole nā waiwai pio, ʻaʻole kekahi mea a lākou i lawe aku ai no lākou, loaʻa ihola iā Dāvida nā mea a pau.

²⁰ A lawe akula ʻo Dāvida i ka poʻe hipa a pau, a me nā bipi a lākou i ʻā ai i mua o kēlā poʻe holoholona, a ʻī aʻela lākou, “ʻO kā Dāvida waiwai pio kēia.”

²¹ ¶ A hoʻi mai ʻo Dāvida i nā haneri kānaka ʻelua, i ka poʻe i hiki ʻole ke hahai ma muli o Dāvida no ko lākou nāwaliwali, i nā mea a lākou i hoʻonoho ai ma ke kahawai ʻo Besora; a hele mai lākou e hālāwai me Dāvida, a e hālāwai hoʻi me nā kānaka me ia; a hiki mai ʻo Dāvida a kokoke i nā kānaka, aloha maila ʻo ia iā lākou.

²² A laila ʻōlelo mai nā kānaka hewa a pau, a me ka poʻe Beliala, ʻo nā kānaka i hele pū me Dāvida, ʻī maila, “No ko lākou hele pū ʻole me kākou, ʻaʻole kākou e hāʻawi aku iā lākou i kekahi o ka waiwai pio a kākou i loaʻa hou mai; akā, e lawe kēlā kanaka kēia kanaka i kāna wahine, a me kāna mau keiki, a alakaʻi aku, a hele.”

²³ ʻŌlelo akula ʻo Dāvida, “E nā hoahānau oʻu, mai hana ʻoukou pēlā i nā mea a Iēhova i hāʻawi mai ai iā kākou, nāna kākou i mālama mai, a hoʻolilo mai hoʻi i ka poʻe i hele kūʻē mai iā kākou i loko o ko kākou lima.

²⁴ “ʻO wai ka mea e hoʻolohe mai iā ʻoukou i kēia mea? No ka mea, e like me kā ka mea i hele i ke kaua, pēlā nō kā ka mea i noho me nā ukana, e like pū kā lākou.”

²⁵ A mai ia lā mai, hana ihola ʻo ia ia mea i kānāwai, a i ʻōlelo kūpaʻa no kā ʻIseraʻela a hiki i kēia lā.

²⁶ ¶ A hiki akula ʻo Dāvida ma Zikelaga, hoʻouna akula ia i kekahi o ka waiwai pio na nā lunakahiko o kā Iuda, na kona poʻe makamaka, ʻī akula, “Eia mai ka makana na ʻoukou, no ka waiwai pio a ka poʻe ʻenemi o Iēhova:

²⁷ na ka poʻe ma Betela, a na ka poʻe ma Ramota Kūkulu Hema, a na ka poʻe ma Iatira,

²⁸ a na ka poʻe ma ʻAroera, a na ka poʻe ma Sipemota, a na ka poʻe ma ʻEsetemoa,

²⁹ a na ka poʻe ma Rakala, a na ka poʻe ma nā kūlanakauhale o ka Ierahemeʻeli, a na ka poʻe ma nā kūlanakauhale o nā Keni,

³⁰ a na ka poʻe ma Horema, a na ka poʻe ma Koresana, a na ka poʻe ma ʻAtaka,

³¹ a na ka poʻe ma Heberona, a ma nā wahi a pau a Dāvida a me kona poʻe kānaka i holoholo ai.”