KA BUKE MUA A SAMUʻELA 3 - Ka Baibala Hemolele

1 No ke kāhea ʻana o Iēhova iā Samuʻela. 11 Hōʻike maila ʻo Iēhova iā ia i nā mea āna e hana mai ai no ʻEli, a no ko kona hale a pau.

MOKUNA III.

¹ ¶ ʻO Samuʻela, ke keiki, lawelawe akula ia na Iēhova i mua o ʻEli. Kākaʻikahi ka ʻōlelo a Iēhova ia manawa; ʻaʻole he hōʻike ʻia ʻana i laha.

² A ia mau lā, iā ʻEli i moe i lalo ma kona wahi, ua pōwehiwehi kona maka, ʻaʻole ia i ʻike;

³ ma mua o ke pio ʻana o ke kukui o ke Akua ma ka halelewa o Iēhova, kahi i waiho ai ka pahu o ke Akua, a ua moe iho ʻo Samuʻela;

⁴ Hea maila ʻo Iēhova iā Samuʻela, ʻī akula ia, “Eia nō wau!”

⁵ A holo akula ia i o ʻEli lā, ʻī akula, “Eia nō wau; no ka mea, ua kāhea mai ʻoe iaʻu.” ʻĪ maila ia, “ʻAʻole au i kāhea aku; e moe hou ʻoe.” A hele akula ia, a moe ihola.

⁶ Kāhea hou maila ʻo Iēhova, “E Samuʻela!” A ala mai ʻo Samuʻela, a hele i o ʻEli lā, ʻī akula, “Eia nō wau; no ka mea, ua kāhea mai ʻoe iaʻu.” ʻĪ maila ia, “ʻAʻole au i kāhea aku, e kuʻu keiki; e moe hou ʻoe.”

⁷ A ʻo Samuʻela, ʻaʻole ia i ʻike iā Iēhova ia wā, ʻaʻole hoʻi i hōʻike ʻia ka ʻōlelo a Iēhova iā ia.

⁸ Kāhea hou maila ʻo Iēhova iā Samuʻela, ʻo ke kolu kēia. Ala maila ia, a hele akula i o ʻEli lā, ʻī akula, “Eia nō wau; no ka mea, ua kāhea mai ʻoe iaʻu.” A ʻike ihola ʻo ʻEli, ua kāhea mai ʻo Iēhova i ke keiki.

⁹ No ia mea, ʻōlelo akula ʻo ʻEli iā Samuʻela, “Ō hoʻi ʻoe e moe; a i kāhea hou mai ʻo ia iā ʻoe, e ʻī aku ʻoe, ‘E Iēhova, e ʻōlelo mai; no ka mea, ua lohe kāu kauā.’” A hoʻi akula ʻo Samuʻela, a moe ihola ma kona wahi.

¹⁰ ¶ Hele maila ʻo Iēhova, a hōʻike iā ia iho, a kāhea maila e like me nā manawa ma mua, “E Samuʻela, e Samuʻela!” ʻĪ akula ʻo Samuʻela, “E ʻōlelo mai; no ka mea, ua lohe kāu kauā.”

¹¹ ʻŌlelo maila ʻo Iēhova iā Samuʻela, “Aia hoʻi, e hana auaneʻi au i kekahi mea i loko o kā ʻIseraʻela, i mea e kani ai nā pepeiao ʻelua o nā mea a pau i lohe.

¹² “Ia lā nō hoʻokō aku au ma luna o ʻEli i nā mea a pau aʻu i ʻōlelo ai no kona hale, ʻo ka hoʻomaka ʻana, a me ka hoʻopau ʻana.

¹³ “Ua haʻi aku au iā ia, e hoʻohewa mau loa ana au i kona hale, no ka hewa āna i ʻike ai; no ka mea, na kāna mau keiki i lawe mai ai ka hewa ma luna o lāua iho, ʻaʻole ia i kāohi aku iā lāua.

¹⁴ “No ia mea, ua hoʻohiki aku au no ko ka hale o ʻEli, ʻaʻole e kala ʻia ka hewa o ko ka hale o ʻEli i ka mōhai a i ka ʻālana i ka manawa a pau.”

¹⁵ ¶ Moe iho ihola ʻo Samuʻela a kakahiaka, a wehe aʻela ia i nā puka o ka hale o Iēhova; a makaʻu ihola ʻo Samuʻela e haʻi aku iā ʻEli i ka mea i ʻike ʻia.

¹⁶ Kāhea akula ʻo ʻEli iā Samuʻela, ʻī akula, “E Samuʻela, e kuʻu keiki!” ʻĪ maila ia, “Eia nō wau.”

¹⁷ Nīnau akula ia, “He aha ka mea a Iēhova i ʻōlelo mai ai iā ʻoe? Ke noi aku nei au iā ʻoe, mai hūnā iaʻu; pēlā ke Akua e hana mai ai iā ʻoe, a e hāʻawi hou mai hoʻi, ke hūnā ʻoe iaʻu i kekahi o ka ʻōlelo a pau āna i ʻōlelo mai ai iā ʻoe.”

¹⁸ Haʻi akula ʻo Samuʻela iā ia i nā ʻōlelo a pau, ʻaʻole i hūnā iā ia. ʻĪ maila ia, “ʻO ia nō ʻo Iēhova; e hana mai ia i kāna mea i makemake ai.”

¹⁹ ¶ A nui aʻela ʻo Samuʻela, a me ia pū nō ʻo Iēhova, ʻaʻole loa āna ʻōlelo i hoʻokō ʻole ʻia mai e ia.

²⁰ A ʻike kā ʻIseraʻela a pau, mai Dana a hiki i Beʻereseba, ua hoʻokūpaʻa ʻia ʻo Samuʻela i kāula no Iēhova.

²¹ A hōʻike hou ʻia maila ʻo Iēhova ma Silo; no ka mea, hōʻike maila ʻo Iēhova iā ia iho iā Samuʻela ma Silo ma ka ʻōlelo a Iēhova.