KA BUKE MUA A SAMUʻELA 29 - Ka Baibala Hemolele

1 Hele pū akula ʻo Dāvida me ʻAkisa. 4 Huhū nā haku o ko Pilisetia i ko Dāvida hele pū ʻana; 6 a hoʻihoʻi akula ʻo ʻAkisa iā ia me ke aloha.

MOKUNA XXIX.

¹ ¶ Hoʻākoakoa aʻela nā Pilisetia i ko lākou poʻe kaua a pau ma ʻApeka; a hoʻomoana aʻela kā ʻIseraʻela ma ka wai puna aia ma Iezereʻela.

² A hele aʻela nā haku o nā Pilisetia ma nā haneri, a ma nā tausani; akā, ʻo Dāvida a me kona poʻe kānaka hele lākou ma hope me ʻAkisa.

³ ʻŌlelo maila nā aliʻi o nā Pilisetia, “I mea aha lā kēia poʻe Hebera?” ʻĪ akula ʻo ʻAkisa i nā aliʻi o nā Pilisetia, “ʻAʻole anei ʻo Dāvida kēia, ke kauā a Saula, ke aliʻi o kā ʻIseraʻela, ka mea i noho me aʻu i nēia mau lā a i nēia mau makahiki? ʻAʻole i loaʻa iaʻu ka mea i hewa ai ʻo ia mai ka wā i noho ai ia me aʻu a hiki i kēia lā.”

⁴ Huhū ihola nā aliʻi o nā Pilisetia iā ia, a ʻī akula nā aliʻi o nā Pilisetia iā ia, “E hoʻihoʻi aku ʻoe i kēia kanaka ma kona wahi āu i hoʻonoho ai iā ia, a, mai hele pū ia me kākou i ke kaua, o lilo ia i ʻenemi no kākou i ke kaua ʻana; no ka mea, me ke aha lā e hōʻoluʻolu ai ia i kona haku? ʻAʻole anei me nā poʻo o kēia poʻe kānaka?

⁵ “ʻAʻole anei ʻo Dāvida kēia a lākou i mele ai i kekahi i kekahi me ka haʻa ʻana, i ka ʻī ʻana aʻe, ‘He mau tausani kā Saula i pepehi, he ʻumi tausani kā Dāvida’?”

⁶ ¶ A laila hea akula ʻo ʻAkisa iā Dāvida, ʻī akula iā ia, “He ʻoiaʻiʻo, ma ke ola o Iēhova, he pono kou, a ʻo kou hele ʻana aku, a ʻo kou hoʻi ʻana mai me aʻu ma ke kaua, ua maikaʻi nō ia i mua o koʻu maka; no ka mea, ʻaʻole i loaʻa iaʻu ka hewa i loko ou mai ka manawa āu i hele mai ai i oʻu nei, a hiki i kēia lā; akā, ʻaʻole ou pono i mua o nā haku.

⁷ “No ia mea, e hoʻi ʻoe, a e hele me ke aloha, i ʻole ai ʻoe e hewa i mua o nā haku o nā Pilisetia.”

⁸ ʻĪ akula ʻo Dāvida iā ʻAkisa, “He aha kaʻu i hana ai? A he aha lā i loaʻa ai iā ʻoe i loko o kāu kauā i koʻu manawa i noho pū ai me ʻoe a hiki i kēia lā, i ʻole ai au e hele e kaua aku i nā ʻenemi o kuʻu haku o ke aliʻi?”

⁹ ʻŌlelo maila ʻo ʻAkisa, ʻī maila iā Dāvida, “Ua ʻike au, he pono kou i mua oʻu me he ʻānela lā o ke Akua; akā, ua ʻī mai nā haku o nā Pilisetia, ‘ʻAʻole ia e hele pū me kākou i ke kaua.’

¹⁰ “ʻĀnō hoʻi, e ala aʻe ʻoe i kakahiaka nui me nā kauā a kou haku i hele pū mai me ʻoe; a i ko ʻoukou ala ʻana i kakahiaka nui, a mālamalama, a laila hele aku.”

¹¹ A ala aʻela ʻo Dāvida a me kona poʻe kānaka i kakahiaka nui e hele, a hoʻi aku i ka ʻāina o nā Pilisetia. A piʻi aʻela nā Pilisetia ma Iezereʻela.