KA BUKE MUA A SAMUʻELA 28 - Ka Baibala Hemolele

1 Hoʻomākaukau ʻo ʻAkisa e kaua i kā ʻIseraʻela. 4 Hoʻomākaukau hoʻi ʻo Saula; a no ka haʻalele ʻana o Iēhova iā Saula, hele aku ia i ka wahine nīnau ʻuhane ʻino, 15 ala mai ʻo Samuʻela, a ʻōlelo aku iā Saula.

MOKUNA XXVIII.

¹ ¶ A ia mau lā, hoʻākoakoa aʻela nā Pilisetia i ko lākou poʻe koa, no ke kaua e kaua aku ai i kā ʻIseraʻela. ʻĪ akula ʻo ʻAkisa iā Dāvida, “E ʻike pono ʻoe, ʻo ʻoe kekahi e hele pū me aʻu i ke kaua, ʻo ʻoe a me kou poʻe kānaka.”

² ʻĪ maila ʻo Dāvida iā ʻAkisa, “E ʻike pono auaneʻi ʻoe i ka mea a kāu kauā e hana aku ai.” ʻĪ akula ʻo ʻAkisa iā Dāvida, “No ia mea, e hoʻolilo au iā ʻoe i mea mālama i kuʻu poʻo i nā lā a pau.”

³ ¶ A ua make ʻo Samuʻela, a ua kanikau ʻo kā ʻIseraʻela a pau iā ia, a ua kanu lākou iā ia ma Rama, ma kona kūlanakauhale iho. A ua hoʻokuke aku ʻo Saula i nā nīnau ʻuhane, a me nā kupua mai ka ʻāina aku.

⁴ Hoʻākoakoa ʻia aʻela ko Pilisetia, a hele mai, a hoʻomoana ma Sunema; a hoʻākoakoa aʻela ʻo Saula i kā ʻIseraʻela a pau, a hoʻomoana ihola ma Gileboa.

⁵ A ʻike akula ʻo Saula i ka poʻe kaua o nā Pilisetia, makaʻu ihola ia, a haʻalulu nui kona naʻau.

⁶ A iā Saula i nīnau ai iā Iēhova, ʻaʻole ʻo Iēhova i ʻōlelo mai iā ia, ʻaʻole ma nā moeʻuhane, ʻaʻole ma ka ʻUrima, ʻaʻole ma nā kāula.

⁷ A laila ʻōlelo akula ʻo Saula i kāna poʻe kauā, “E ʻimi ʻoukou noʻu i wahine nīnau ʻuhane, i hele aku ai au e nīnau iā ia.” ʻĪ maila kāna mau kauā iā ia, “Aia nō ka wahine nīnau i nā ʻuhane ma ʻEne Dora.”

⁸ ¶ Hōʻano ʻē ʻo Saula iā ia iho, a hoʻokomo i ka lole ʻē, a hele aku me nā kānaka ʻelua me ia, a hiki lākou i ka wahine i ka pō; ʻī akula ia, “Ke noi aku nei au iā ʻoe, e hoʻākāka mai ʻoe iaʻu ma ka nīnau ʻuhane, a e hoʻāla mai noʻu i ka mea aʻu e hoʻohiki aku ai iā ʻoe.”

⁹ ʻĪ maila ka wahine iā ia, “Aia hoʻi, ua ʻike nō ʻoe i ka mea a Saula i hana ai i kona luku ʻana i nā mea nīnau ʻuhane, a me nā kupua mai ka ʻāina aku; no ke aha lā ʻoe i punihei mai ai i kuʻu ola, i lilo ai au i ka make?”

¹⁰ A hoʻohiki akula ʻo Saula iā ia ma Iēhova, ʻī akula, “Ma ke ola o Iēhova, ʻaʻole e hiki mai iā ʻoe ke ʻāhewa ʻia no kēia mea.”

¹¹ A laila ʻī akula ka wahine, “ʻO wai lā kaʻu e hoʻāla mai ai nou?” ʻĪ maila ia, “ʻO Samuʻela kāu e hoʻāla mai ai noʻu.”

¹² A ʻike akula ka wahine iā Samuʻela, hoʻōho akula ia me ka leo nui; ʻōlelo akula ka wahine iā Saula, ʻī akula, “No ke aha lā ʻoe i hoʻopunipuni mai ai iaʻu? No ka mea, ʻo Saula kā ʻoe!”

¹³ ʻĪ akula ke aliʻi iā ia, “Mai makaʻu ʻoe; he aha lā kāu i ʻike ai?” ʻĪ maila ka wahine iā Saula, “He mea me he akua lā kaʻu i ʻike ai e piʻi mai ana mai ka honua mai.”

¹⁴ Nīnau akula ʻo ia iā ia, “Pehea kona ʻano?” ʻĪ maila ia, “He kanaka ʻelemakule e piʻi mai ana; a ua uhi ʻia i ka ʻaʻahu.” A ʻike ihola ʻo Saula, ʻo Samuʻela nō ia, kūlou ihola kona maka i ka honua, a moe ihola.

¹⁵ ¶ ʻŌlelo maila ʻo Samuʻela iā Saula, “No ke aha lā ʻoe i hoʻonaue mai ai iaʻu, i ka hoʻāla mai iaʻu?” ʻĪ akula ʻo Saula, “Ua pilikia loa wau; no ka mea, ke kaua mai nei nā Pilisetia iaʻu, a ua haʻalele mai ke Akua iaʻu, ʻaʻole e ʻōlelo hou mai iaʻu, ʻaʻole ma ka lima o nā kāula, ʻaʻole ma nā moeʻuhane; no ia mea, i kāhea aku ai au iā ʻoe, i hōʻike mai ai ʻoe iaʻu i ka mea aʻu e hana aku ai.”

¹⁶ ʻŌlelo akula ʻo Samuʻela, “No ke aha lā ʻoe i nīnau mai ai iaʻu; no ka mea, ua haʻalele ʻo Iēhova iā ʻoe, a ua lilo ia i ʻenemi nou?

¹⁷ “A ua hana ʻo Iēhova nona iho, e like me ka mea i ʻōlelo ʻia e aʻu, a ua kāʻili aku ʻo Iēhova i ke aupuni mai ou aku lā, a hāʻawi aku ia mea i kou hoalauna iā Dāvida.

¹⁸ “No kou hoʻolohe ʻole i ka leo o Iēhova, ʻaʻole hoʻi ʻoe i hoʻopaʻi aku i kona inaina nui ma luna o kā ʻAmeleka, no ia mea, ua hana mai ʻo Iēhova i kēia mea iā ʻoe i kēia lā.

¹⁹ “A e hoʻolilo hoʻi ʻo Iēhova i kā ʻIseraʻela me ʻoe i loko o ka lima o nā Pilisetia; a ʻo ʻoe pū me kāu mau keiki me aʻu i ka lā ʻapōpō; a e hoʻolilo hoʻi ʻo Iēhova i ka poʻe koa o kā ʻIseraʻela i loko o ka lima o ko Pilisetia.”

²⁰ ¶ A laila hina koke ihola ʻo Saula, a moe i ka loa ma ka honua, a makaʻu loa ihola, no nā ʻōlelo a Samuʻela; ʻaʻohe ikaika i loko ona; no ka mea, ʻaʻole ia i ʻai i ka berena ia lā a pō, ia pō a ao.

²¹ A hele maila ka wahine iā Saula, a ʻike akula, ua pilikia loa ia, ʻī akula ʻo ia iā ia, “Aia hoʻi, ua hoʻolohe kāu kauā wahine i kou leo, a ua waiho au i kuʻu ola i loko o kuʻu lima, a ua hoʻolohe aku au i kāu mau ʻōlelo āu i ʻōlelo mai ai iaʻu.

²² “ʻĀnō hoʻi, ke noi aku nei au iā ʻoe, e hoʻolohe mai ʻoe i ka leo o kāu kauā wahine, a e waiho aku au i wahi berena i mua ou; a e ʻai iho ʻoe, i ikaika ai ʻoe i kou hele ʻana ma kou alanui.”

²³ Hōʻole maila ia, ʻī maila, “ʻAʻole au e ʻai.” Koi akula kāna mau kauā me ka wahine iā ia; a hoʻolohe mai ia i ko lākou leo. Ala maila ia mai ka honua mai, a noho ihola ma luna o kahi moe.

²⁴ Aia nō i ka wahine kekahi bipi keiki momona ma kona hale; pepehi koke ihola iā ia, a lawe aʻela ia i ka palaoa, a kāwili ihola, a pūlehu akula i ka berena hū ʻole.

²⁵ A lawe mai ia mea i mua o Saula, a i mua o kāna mau kauā, a ʻai ihola lākou. Kū aʻela lākou a hele akula ia pō.