KA BUKE MUA A SAMUʻELA 27 - Ka Baibala Hemolele

1 Hele akula Dāvida i Gata a noho me ʻAkisa. 6 Hāʻawi mai ʻo ʻAkisa iā Zikelaga i wahi e noho ai ʻo Dāvida me kona poʻe kānaka. 8 No ke kaua ʻana a Dāvida.

MOKUNA XXVII.

¹ ¶ A ʻī ihola ʻo Dāvida i loko o kona naʻau, “E make auaneʻi au i ka lima o Saula i kekahi lā; e aho e holo koke au ma ka ʻāina o ko Pilisetia; a laila ʻaʻole manaʻo ʻo Saula e ʻimi hou mai iaʻu ma nā wahi a pau o kā ʻIseraʻela; pēlā e pakele ai au i kona lima.”

² Kū aʻela ʻo Dāvida, a hele akula me nā kānaka ʻeono haneri me ia i o ʻAkisa lā, ke keiki a Maoka, ke aliʻi o Gata.

³ A noho ihola ʻo Dāvida me ʻAkisa ma Gata, ʻo ia a me kona poʻe kānaka, ʻo kēlā kanaka kēia kanaka me kona ʻōhua, ʻo Dāvida me kāna mau wāhine, ʻo ʻAhinoama no Iezereʻela, a ʻo ʻAbigaila no Karemela, ka wahine a Nabala.

⁴ A haʻi ʻia maila iā Saula, ua holo ʻo Dāvida ma Gata; ʻaʻole ia i ʻimi hou aku iā ia.

⁵ ¶ ʻŌlelo akula ʻo Dāvida iā ʻAkisa, “Inā paha i aloha ʻia mai au i kou maka, e hāʻawi mai ʻoe iaʻu i wahi ma kekahi kūlanakauhale ma ke kula i noho ai au ma laila; no ke aha lā e noho ai au me ʻoe ma ke kūlanakauhale aliʻi?”

⁶ A hāʻawi akula ʻo ʻAkisa iā Zikelaga nona ia lā; no ia mea, lilo akula ʻo Zikelaga no nā aliʻi o kā Iuda a hiki i kēia lā.

⁷ A ʻo nā lā o ko Dāvida noho ʻana ma ka ʻāina o ko Pilisetia, hoʻokahi ia makahiki a me nā malama keu ʻehā.

⁸ ¶ Hele akula ʻo Dāvida me kona poʻe kānaka, a kaua akula i ko Gesura, a me ko Gerezi, a me ka ʻAmeleka; no ka mea, he poʻe kamaʻāina kahiko lākou o ka ʻāina, kahi e hele aku ai i Sura, a hiki loa i ka ʻāina ʻo ʻAigupita.

⁹ A luku akula ʻo Dāvida i ka ʻāina, ʻaʻole i koe kekahi kanaka, ʻaʻole hoʻi kekahi wahine e ola ana, a lawe aʻela ia i nā hipa, a me nā bipi, a me nā hoki, a me nā kāmelo, me ka lole, a hoʻi akula a hiki i o ʻAkisa lā.

¹⁰ ʻĪ maila ʻo ʻAkisa, “Ma hea kahi a ʻoukou i hao ai i kēia lā?” ʻĪ akula ʻo Dāvida, “Ma ka ʻAoʻao Hema o kā Iuda, a ma ka ʻAoʻao Hema o kā Ierahemeʻeli, a ma ka ʻAoʻao Hema o ko Keni.”

¹¹ ʻAʻole i hoʻopakele ʻo Dāvida i kekahi kanaka, ʻaʻole hoʻi i kekahi wahine e ola ana e hele ma Gata e ʻōlelo, “O haʻi aku lākou no mākou, i ka ʻī ʻana aʻe, ‘Pēlā ʻo Dāvida i hana ai, a pēlā hoʻi kāna e hana aku ai i nā manawa a pau o kona noho ʻana ma ka ʻāina o nā Pilisetia.’”

¹² Manaʻo akula ʻo ʻAkisa i kā Dāvida, ua ʻoiaʻiʻo, ʻī ihola, “Ua hoʻolilo ʻo ia iā ia iho i mea hoʻowahāwahā loa ʻia e kona poʻe kānaka, e kā ʻIseraʻela, a e lilo ia i kauā naʻu i ka manawa mau loa.”