KA BUKE MUA A SAMUʻELA 26 - Ka Baibala Hemolele

1 Ua haʻi ʻia iā Saula kahi i noho ai ʻo Dāvida. 2 Hele akula ʻo Saula e ʻimi iā ia. 5 Hele mai ʻo Dāvida i kahi o Saula i ka pō a lawe akula i ka ihe a Saula a me kāna kīʻaha wai. 13 Ka ʻōlelo a Dāvida iā ʻAbenera a me Saula. 21 Hoʻi akula ʻo Saula.

MOKUNA XXVI.

¹ ¶ Hele mai ko Zipa iā Saula ma Gibea, ʻī maila, “ʻAʻole anei ʻo Dāvida i hūnā iā ia iho ma ka puʻu ʻo Hakila i mua o Iesimona?”

² A kū aʻela ʻo Saula, a hele akula ma ka wao nahele ʻo Zipa, a me ia nō ʻakolu tausani o kā ʻIseraʻela i wae ʻia e ʻimi iā Dāvida ma ka wao nahele ʻo Zipa.

³ A hoʻomoana ihola ʻo Saula mā i ka puʻu ʻo Hakila i mua o Iesimona ma ke ala. A noho ihola ʻo Dāvida ma ka wao nahele, a ʻike ihola ia, ua hele mai ʻo Saula ma hope ona ma ka wao nahele.

⁴ A hoʻouna akula ʻo Dāvida i nā kiu, a ʻike ihola, he ʻoiaʻiʻo, ua hele mai ʻo Saula.

⁵ Kū aʻela ʻo Dāvida, a hele akula i kahi a Saula i hoʻomoana ai; a ʻike akula ʻo Dāvida i kahi a Saula i moe ai, a me ʻAbenera, ke keiki a Nera, ka luna o kona kaua; a e moe ana ʻo Saula ma waena o nā hale kaʻa, a ua hoʻonoho ʻia nā kānaka a puni ona.

⁶ ¶ ʻŌlelo akula ʻo Dāvida, ʻī akula iā ʻAhimeleka ka Heta, a iā ʻAbisai ke keiki a Zeruia, ka hoahānau o Ioaba, nīnau aʻela, “ʻO wai lā ka mea e hele pū me aʻu i o Saula lā ma kahi i hoʻomoana ai?” ʻĪ maila ʻo ʻAbisai, “ʻO wau ke hele pū me ʻoe.”

⁷ A hele akula ʻo Dāvida, a me ʻAbisai i nā kānaka i ka pō, aia hoʻi, e hiamoe ana ʻo Saula ma waena o nā hale kaʻa, a ua hou ʻia kāna ihe i ka honua ma kona poʻo; a e moe ana ʻo ʻAbenera a me nā kānaka a puni ona.

⁸ ʻĪ akula ʻo ʻAbisai iā Dāvida, “Ua hoʻolilo mai ke Akua i kou ʻenemi i loko o kou lima i kēia lā; ʻānō hoʻi, ke noi aku nei au iā ʻoe, e ʻae mai ʻoe iaʻu, e hou iho au iā ia me ka ihe ma ka honua, hoʻokahi hou ʻana, ʻaʻole au e hou hou aku iā ia!”

⁹ ʻĪ maila ʻo Dāvida iā ʻAbisai, “Mai pepehi iā ia; no ka mea, ʻo wai lā ka mea e kau aku i kona lima ma luna o ka mea a Iēhova i poni ai, a hewa ʻole?”

¹⁰ ʻĪ maila hoʻi ʻo Dāvida, “Ma ke ola o Iēhova, e pepehi mai nō ʻo Iēhova iā ia; e hiki mai auaneʻi kona lā e make ai; a e hele paha ia i ke kaua, a e make ʻo ia ma laila.

¹¹ “Na Iēhova i hōʻole mai iaʻu, ʻaʻole au e kau aku i koʻu lima ma luna o ka mea a Iēhova i poni ai; akā, ke noi aku nei au iā ʻoe, e lawe aku ʻoe i ka ihe ma kona poʻo, a me ke kīʻaha wai, a e hele aku kāua.”

¹² A lawe aʻela ʻo Dāvida i ka ihe a me ke kīʻaha wai ma ke poʻo o Saula, a hele aku lāua; ʻaʻohe kanaka i nānā mai, ʻaʻole i ʻike, ʻaʻole i ala mai; ua paʻuhia lākou i ka hiamoe; no ka mea, ua hiki mai ka hiamoe nui mai Iēhova mai ma luna o lākou.

¹³ ¶ A laila hele akula ʻo Dāvida ma kēlā ʻaoʻao, a kū ma luna o ka puʻu ma ʻō lilo, a ua lōʻihi ka wahi i waena o lākou.

¹⁴ Kāhea akula ʻo Dāvida i nā kānaka, a iā ʻAbenera, i ke keiki a Nera, ʻī akula, “ʻAʻole anei ʻoe eō mai, e ʻAbenera?” A laila eō maila ʻo ʻAbenera, ʻī maila, “ʻO wai ʻoe e kāhea mai nei i ke aliʻi?”

¹⁵ ʻĪ akula ʻo Dāvida iā ʻAbenera, “ʻAʻole anei ʻoe he kanaka koa? ʻO wai lā kou mea like i loko o kā ʻIseraʻela? No ke aha lā ʻoe i mālama ʻole ai i kou haku i ke aliʻi? No ka mea, ua hele aku kekahi o nā kānaka e pepehi i ke aliʻi i kou haku.

¹⁶ “ʻAʻole e pono kēia mea āu i hana ai. Ma ke ola o Iēhova, e pono ʻoukou ke make, i ko ʻoukou mālama ʻole i ko ʻoukou haku, i ka mea a Iēhova i pono ai. ʻĀnō hoʻi e nānā ʻoe i kahi i waiho ai ka ihe a ke aliʻi a me ke kīʻaha wai ma kona poʻo.”

¹⁷ ¶ A ʻike ihola ʻo Saula, ʻo ka leo ia o Dāvida, ʻī akula, “ʻO kou leo anei kēia, e kuʻu keiki, e Dāvida?” ʻĪ maila ʻo Dāvida, “ʻO koʻu leo nō ia, e kuʻu haku, e ke aliʻi.”

¹⁸ ʻĪ akula ia, “No ke aha lā i hahai mai nei kuʻu haku i kāna kauā; he aha lā kaʻu i hana ai? A he aha hoʻi ka hewa i loko o kuʻu lima?

¹⁹ “ʻĀnō hoʻi ke noi aku nei au iā ʻoe, e hoʻolohe mai kuʻu haku ke aliʻi i ka ʻōlelo a kāna kauā. Inā paha i hoʻāla mai ʻo Iēhova iā ʻoe e kūʻē mai iaʻu, e ʻoluʻolu ia i ka mōhai; akā, inā ʻo nā keiki a kānaka, e pōʻino lākou i mua o Iēhova; no ka mea, ua hoʻokuke mai lākou iaʻu i kēia lā mai ka noho ʻana ma ka ʻāina hoʻoili no Iēhova, i ka ʻī ʻana mai, ‘E hele e mālama i nā akua ʻē.’

²⁰ “ʻĀnō hoʻi, mai hoʻokahe ʻia kuʻu koko ma ka honua i mua i ke alo o Iēhova; no ka mea, ua hele mai nei ke aliʻi o kā ʻIseraʻela e ʻimi i ʻuku lele, e like me kekahi e ʻimi ai i ka manu ma nā mauna.”

²¹ ¶ A laila ʻī akula ʻo Saula, “Ua hewa au; ō hoʻi ʻoe, e kuʻu keiki, e Dāvida; ʻaʻole au e hana ʻino hou aku iā ʻoe; no ka mea, ua mālama ʻoe i kuʻu ola i kēia lā; aia hoʻi, ua hana naʻaupō wau, a ua nui loa kuʻu lalau ʻana.”

²² ʻŌlelo maila ʻo Dāvida, ʻī maila, “Eia ka ihe a ke aliʻi! A e kiʻi mai kekahi o ka poʻe uʻi e lawe aku.

²³ “Na Iēhova e uku mai i kēlā kanaka i kēia kanaka i kona pono, a me kona ʻoiaʻiʻo; no ka mea, ua hoʻolilo mai ʻo Iēhova iā ʻoe i loko o kuʻu lima i kēia lā; akā, ʻaʻole au i kau aku i kuʻu lima ma luna o ka mea a Iēhova i poni ai.

²⁴ “Aia hoʻi, no ka mālama pono ʻia ʻo kou ola i kuʻu maka i kēia lā, pēlā hoʻi e mālama pono ʻia ai koʻu ola i ka maka o Iēhova, a e hoʻopakele mai ia iaʻu i nā pōpilikia a pau.”

²⁵ A laila ʻī akula ʻo Saula iā Dāvida, “Pōmaikaʻi ʻoe, e kuʻu keiki, e Dāvida; e hana nui auaneʻi ʻoe, a e lanakila hoʻi ʻoe.” A hele akula ʻo Dāvida i kona wahi e hele ai, a hoʻi akula ʻo Saula i kona wahi.