KA BUKE MUA A SAMUʻELA 24 - Ka Baibala Hemolele

1 Noho ihola ʻo Dāvida i ʻEne Gedi. Hahai akula ʻo Saula iā Dāvida me nā tausani kānaka ʻekolu. 4 ʻOki ihola ʻo Dāvida i ka lepa o ko Saula ʻaʻahu. 9 ʻŌlelo akula ʻo Dāvida iā Saula. 16 Haʻi mai ʻo Saula i kona hewa. 22 Ko Dāvida hoʻohiki ʻana.

MOKUNA XXIV.

¹ ¶ A i ka hoʻi ʻana mai o Saula i ka hahai ʻana i ko Pilisetia, ua haʻi ʻia mai iā ia, ʻī maila, “Aia hoʻi ʻo Dāvida ma ka wao nahele o ʻEne Gedi!”

² A laila lawe aʻela ʻo Saula i ʻekolu tausani kānaka i wae ʻia no loko mai o kā ʻIseraʻela a pau, a hele akula e ʻimi iā Dāvida a me kona poʻe kānaka ma luna o nā Pōhaku o nā Kao Hihiu.

³ A hiki aku ia i nā pā hipa ma ke ala, a ma laila he ana; a komo akula ʻo Saula e uhi i kona wāwae; a ʻo Dāvida a me kona poʻe kānaka aia ma nā ʻaoʻao o ke ana.

⁴ ʻĪ akula nā kānaka o Dāvida iā ia, “Aia hoʻi, ua hiki mai ka lā a Iēhova i ʻī mai ai, ‘Aia hoʻi, e hoʻolilo ana au i kou ʻenemi i loko o kou lima, i hana aku ai ʻoe iā ia e like me kou makemake.’” A laila kū aʻela ʻo Dāvida, a ʻoki malū iho i ka lepa o ka lole ʻaʻahu o Saula.

⁵ A ma hope iho, kuʻi ihola ka naʻau o Dāvida iā ia iho, i kona ʻoki ʻana i ka lepa o ka lole ʻaʻahu o Saula.

⁶ ʻĪ akula ia i kona poʻe kānaka, “Ua hōʻole mai ʻo Iēhova ke hana aku au i kēia mea i kuʻu haku, i ka mea a Iēhova i poni ai, a e kau aku i kuʻu lima ma luna ona; no ka mea, ʻo ia ka mea i poni ʻia e Iēhova.”

⁷ Hoʻoikaika akula ʻo Dāvida i kona poʻe kānaka ma kēia ʻōlelo, ʻaʻole ia i ʻae aku iā lākou e kūʻē iā Saula. Kū aʻela ʻo Saula ma waho o ke ana, a hele akula ma ke ala.

⁸ ¶ Ma hope iho, kū aʻela ʻo Dāvida a hele i waho o ke ana, a kāhea akula ma hope o Saula, ʻī akula, “E kuʻu haku, e ke aliʻi!” A nānā aʻela ʻo Saula ma hope ona, kūlou ihola ʻo Dāvida me kona maka ma ka honua, a hāʻule iho i lalo.

⁹ ʻĪ akula ʻo Dāvida iā Saula, “No ke aha lā ʻoe i hoʻolohe ai i ka ʻōlelo a kānaka, i ka ʻī ʻana mai, ‘Aia hoʻi, ke ʻimi nei ʻo Dāvida e hana ʻeha iā ʻoe’?

¹⁰ “Aia hoʻi, i kēia lā ua ʻike kou maka i ka hoʻolilo ʻana o Iēhova iā ʻoe i loko o kuʻu lima ma ke ana; a ʻī maila kekahi e pepehi iā ʻoe; akā, ua aloha au iā ʻoe; ʻī akula, ‘ʻAʻole au e kau aku i kuʻu lima ma luna o kuʻu haku; no ka mea, ʻo ia kā Iēhova i poni ai.’

¹¹ “E nānā ʻoe, e kuʻu makua kāne, e nānā hoʻi i ka lepa o kou ʻaʻahu ma kuʻu lima; no ka mea, i kuʻu ʻoki ʻana i ka lepa o kou ʻaʻahu, ʻaʻole hoʻi i pepehi iā ʻoe, e nānā hoʻi, e ʻike ʻoe, ʻaʻole he hewa, ʻaʻole hoʻi he lawehala i loko o kuʻu lima, ʻaʻole nō au i hana hewa aku iā ʻoe; akā, ke ʻimi mai nei ʻoe i kuʻu ola e lawe aku ia.

¹² “Na Iēhova e hoʻoponopono i waena o kāua, a na Iēhova e hoʻopaʻi iā ʻoe noʻu; akā, ʻaʻole e kau ʻia aku kuʻu lima ma luna ou.

¹³ “E like me ka ʻōlelo a ka poʻe kahiko, ‘No ka poʻe hewa mai ka hewa’; akā, ʻaʻole e kau ʻia aku kuʻu lima ma luna ou.

¹⁴ “Ma muli o wai i puka mai nei ke aliʻi o kā ʻIseraʻela? E alualu ana ʻoe iā wai? Ma muli o ka ʻīlio make anei? Ma muli o ka ʻuku lele anei?

¹⁵ “ʻO Iēhova ka luna kānāwai, a nāna e hoʻoponopono i waena o kāua, a nāna hoʻi e hoʻoponopono mai i kuʻu mea, a e hoʻopakele mai iaʻu mai kou lima aʻe.”

¹⁶ ¶ A pau aʻela kā Dāvida ʻōlelo ʻana aku i kēia mau ʻōlelo iā Saula; ʻī maila ʻo Saula, “ʻO kou leo anei kēia, e Dāvida kuʻu keiki?” A hoʻokiʻekiʻe aʻela ʻo Saula i kona leo i luna, a uē ihola.

¹⁷ ʻĪ akula ʻo ia iā Dāvida, “Ua ʻoi aku kou pono ma mua o koʻu; no ka mea, ua hana pono mai ʻoe iaʻu, a ua hana ʻino aku au iā ʻoe.

¹⁸ “A ua hōʻike mai ʻoe i kēia lā i kāu hana pono mai iaʻu; no ka mea, i ko Iēhova hoʻolilo ʻana iaʻu i loko o kou lima, ʻaʻole ʻoe i pepehi mai iaʻu.

¹⁹ “Inā i loaʻa i ke kanaka kona ʻenemi, e kuʻu ola aku anei kēlā iā ia? No ia mea, e uku mai ʻo Iēhova iā ʻoe i ka pono no ka mea āu i hana mai ai iaʻu i kēia lā.

²⁰ “ʻĀnō hoʻi, ua ʻike maopopo nō au, e lilo auaneʻi ʻoe i aliʻi, a e hoʻokūpaʻa ʻia ke aupuni o kā ʻIseraʻela i loko o kou lima.

²¹ “ʻĀnō hoʻi, e hoʻohiki mai ʻoe iaʻu ma Iēhova, i ʻole ʻoe e hōʻoki iho i kaʻu hua ma hope oʻu, i ʻole hoʻi ʻoe e hoʻōki i kuʻu inoa mai ka hale aku o koʻu makua kāne.”

²² A hoʻohiki akula ʻo Dāvida iā Saula, a hoʻi akula ʻo Saula i kona wahi; akā, piʻi akula ʻo Dāvida me kona poʻe kānaka ma kahi paʻa.