KA BUKE MUA A SAMUʻELA 23 - Ka Baibala Hemolele

1 Kaua mai ko Pilisetia i ko Keila. 5 Hoʻopakele ʻo Dāvida iā lākou, a pepehi akula i ko Pilisetia. 14 Holo akula ʻo Dāvida ma Zipa. 16 Hālāwai ia me Ionatana ma laila. 25 Hahai akula ʻo Saula iā Dāvida i Maona.

MOKUNA XXIII.

¹ ¶ A laila haʻi akula lākou iā Dāvida, ʻī akula, “Aia hoʻi, ke kaua mai nei ko Pilisetia i Keila, a hao wale lākou ma kahi hehi palaoa.”

² No ia mea, nīnau akula ʻo Dāvida iā Iēhova, ʻī akula, “E hele anei au e pepehi i kēia poʻe o ko Pilisetia?” ʻĪ maila ʻo Iēhova iā Dāvida, “Ō hele a pepehi aku i ko Pilisetia, a e hoʻopakele i ko Keila.”

³ ʻŌlelo mai nā kānaka o Dāvida iā ia, “Aia hoʻi, ke makaʻu nei kākou ma ʻaneʻi ma loko o kā Iuda; ʻaʻole anei he nui aku, ke hele kākou ma Keila e kūʻē i ka poʻe kaua no ko Pilisetia?”

⁴ A nīnau hou akula ʻo Dāvida iā Iēhova. ʻŌlelo maila ʻo Iēhova iā ia, ʻī maila, “E kū aʻe e hele ma Keila; no ka mea, e hoʻolilo au i ko Pilisetia i loko o kou lima.”

⁵ A hele akula ʻo Dāvida me kona poʻe kānaka ma Keila, a kaua aku i ko Pilisetia, a lawe aku i ko lākou holoholona, a pepehi aku iā lākou me ka luku nui. A hoʻopakele ʻo Dāvida i nā kānaka o Keila.

⁶ ¶ A i ka holo ʻana o ʻAbiatara ke keiki a ʻAhimeleka i o Dāvida lā i Keila, ua hele nō ia me ka ʻēpoda ma kona lima.

⁷ Ua haʻi ʻia iā Saula ko Dāvida hele ʻana ma Keila. ʻĪ maila ʻo Saula, “Ua hoʻolilo mai ke Akua iā ia i loko o kuʻu lima; no ka mea, ua paʻa ia ma loko, i kona komo ʻana i ke kūlanakauhale i paʻa i nā ʻīpuka a me nā kaola.”

⁸ Hōʻuluʻulu aʻela ʻo Saula i nā kānaka a pau i ke kaua, e hele ma Keila, e hoʻopaʻa aku iā Dāvida a me kona poʻe kānaka.

⁹ A ʻike ihola ʻo Dāvida, ua manaʻo ʻino malū mai ʻo Saula iā ia; ʻī akula ʻo ia iā ʻAbiatara ke kahuna, “E lawe mai i ka ʻēpoda.”

¹⁰ A laila ʻī akula ʻo Dāvida, “E Iēhova ke Akua o kā ʻIseraʻela, ua lohe akāka iho nei kāu kauā i ka manaʻo ʻana o Saula e hele mai nei i Keila e luku i ke kūlanakauhale noʻu nei.

¹¹ “E hāʻawi anei nā kānaka o Keila iaʻu i loko o kona lima? E iho mai anei ʻo Saula e like me kāu kauā i lohe ai? E Iēhova ke Akua o kā ʻIseraʻela, ke noi aku nei au iā ʻoe, e haʻi mai ʻoe i kāu kauā.” ʻĪ maila ʻo Iēhova, “E iho mai nō.”

¹² ʻĪ akula ʻo Dāvida, “E hāʻawi anei nā kānaka o Keila iaʻu a me kuʻu poʻe kānaka i loko o ka lima o Saula?” ʻĪ maila ʻo Iēhova, “E hāʻawi nō lākou.”

¹³ A laila kū aʻela ʻo Dāvida a me kona poʻe kānaka, ʻaono haneri paha, a puka akula i waho o Keila, a hele akula i kā lākou wahi e hele ai. Ua haʻi ʻia mai iā Saula ka holo ʻana o Dāvida mai Keila aku, a haʻalele ia i ka hele mai.

¹⁴ A noho ihola ʻo Dāvida i ka wao nahele, ma nā wahi paʻa, a noho i ka mauna ma ka wao nahele ʻo Zipa; a ʻimi akula ʻo Saula iā ia i kēlā lā i kēia lā, ʻaʻole ke Akua i hāʻawi mai iā ia i loko o kona lima.

¹⁵ ¶ A ʻike ihola ʻo Dāvida, ua hele mai ʻo Saula e ʻimi i kona ola; aia nō ʻo Dāvida ma ka wao nahele ʻo Zipa ma loko o ka ulu lāʻau.

¹⁶ Kū aʻela ʻo Ionatana ke keiki a Saula, a hele i o Dāvida lā ma loko o ka ulu lāʻau, a hoʻoikaika akula i kona lima ma ke Akua.

¹⁷ ʻĪ akula ʻo ia iā ia, “Mai makaʻu ʻoe; no ka mea, ʻaʻole e loaʻa ʻoe i ka lima o Saula koʻu makua kāne; a e lilo ʻoe i aliʻi ma luna o kā ʻIseraʻela, a ʻo wau hoʻi ka lua ma lalo iho ou; a ua ʻike ʻia hoʻi ia e Saula, e koʻu makua kāne.”

¹⁸ A hoʻopaʻa ihola lāua i kuʻikahi i mua o Iēhova. Noho ihola ʻo Dāvida ma loko o ka ulu lāʻau, a hoʻi akula ʻo Ionatana ma kona hale.

¹⁹ ¶ A laila piʻi maila ko Zipa i o Saula lā ma Gibea, ʻī maila, “ʻAʻole anei ʻo Dāvida i peʻe iho i o mākou lā ma nā wahi paʻa i loko o ka ulu lāʻau ma ka puʻu ʻo Hakila, ma ka ʻaoʻao hema o Iesimona?

²⁰ “No ia mea hoʻi, e ke aliʻi, e iho mai ʻoe, e like me ka makemake a pau o kou naʻau e iho mai, a na mākou ia e hāʻawi aku i loko o ka lima o ke aliʻi.”

²¹ ʻĪ akula ʻo Saula, “E pōmaikaʻi ʻoukou iā Iēhova; no ka mea, ua lokomaikaʻi mai ʻoukou iaʻu.

²² “Ke noi aku nei au iā ʻoukou, e hele, e hoʻomākaukau hoʻi, a e nānā a ʻike i kona wahi a kona wāwae i hele ai, a ʻo ka mea i ʻike iā ia ma laila; no ka mea, ua haʻi ʻia mai iaʻu, ua hana maʻalea loa ʻo ia.

²³ “E nānā hoʻi ʻoukou, a ʻike i nā wahi peʻe a pau āna e peʻe ai, a hoʻi hou mai i oʻu nei me ka ʻoiaʻiʻo, a e hele pū au me ʻoukou; a inā e noho ana ʻo ia ma ka ʻāina, e ʻimi au iā ia ma waena o nā tausani a pau o kā Iuda.”

²⁴ ¶ Kū aʻela lākou, a hele ma Zipa ma mua o Saula; a ʻo Dāvida a me kona poʻe kānaka aia i loko o ka wao nahele ʻo Maona i ka pāpū ma ka ʻaoʻao hema o Iesimona.

²⁵ Hele akula ʻo Saula a me kona poʻe kānaka e ʻimi iā ia; a haʻi aku lākou iā Dāvida, a iho mai ia i ka pōhaku, a noho ma ka wao nahele ʻo Maona. A lohe ʻo Saula, hahai akula ia ma hope o Dāvida ma ka wao nahele ʻo Maona.

²⁶ A hele akula ʻo Saula ma kēia ʻaoʻao o ka mauna, aia ʻo Dāvida a me kona poʻe kānaka ma kēlā ʻaoʻao o ka mauna; hele koke akula ʻo Dāvida no ka makaʻu iā Saula; no ka mea, ua hoʻopuni ʻo Saula a me kona poʻe kānaka iā Dāvida a me kona poʻe kānaka e hopu iā lākou.

²⁷ A hele mai he ʻelele iā Saula, ʻī maila, “E wikiwiki ʻoe, e hoʻi mai; no ka mea, ua hiki mai ko Pilisetia ma ka ʻāina!”

²⁸ No ia mea, hoʻi akula ʻo Saula mai ka hahai ʻana iā Dāvida, a hele kūʻē akula i ko Pilisetia; a kapa akula lākou i ka inoa o ia wahi, ʻo Sela Hamalekota.

²⁹ Piʻi aʻela ʻo Dāvida mai laila aku, a noho i loko o nā wahi paʻa ma ʻEne Gedi.