KA BUKE MUA A SAMUʻELA 22 - Ka Baibala Hemolele

1 Hele ʻo Dāvida i ke ana ʻo ʻAdulama. 2 ʻAhā paha haneri kānaka i hele ma muli ona; a mai laila aku hele nō ia ma Mizepa; a hoʻi aku i ka ʻāina ʻo Iuda. 9 Hoʻohewa aku ʻo Doega iā ʻAhimeleka i mua o ke aliʻi. 18 Pau nā kāhuna i ka luku ʻia, a me ko lākou kūlanakauhale.

MOKUNA XXII.

¹ ¶ Hele ʻo Dāvida mai laila aku, a holo akula ma ke ana ʻo ʻAdulama; a lohe aʻela kona mau hoahānau a me nā mea a pau o ka hale o kona makua kāne, hele lākou i ona lā i laila.

² ʻO nā kānaka a pau i pōpilikia, a me nā kānaka ʻaiʻē a pau, a me nā kānaka a pau i ʻeha ma ka naʻau, hoʻākoakoa aʻela lākou i ona lā; a lilo ia i luna no lākou; ʻehā haneri kānaka paha me ia.

³ ¶ A hele ʻo Dāvida mai laila aku a Mizepa ma Moaba; ʻī akula ia i ke aliʻi o Moaba, “Ke noi aku nei au, e ʻae mai ʻoe i koʻu makua kāne a me koʻu makuahine e hele mai e noho me ʻoe, a ʻike au i ka mea a ke Akua e hana mai ai noʻu.”

⁴ A lawe mai ʻo ia iā lāua i ke aliʻi o Moaba, a noho lāua me ia i nā lā a pau a Dāvida i noho ai ma luna o ka puʻukaua.

⁵ ʻŌlelo akula ke kāula a Gada iā Dāvida, “Mai noho ʻoe ma ka puʻukaua; e hele aku, a hiki ʻoe ma ka ʻāina o kā Iuda.” A hele akula ʻo Dāvida a hiki ma ka ulu lāʻau ʻo Hareta.

⁶ ¶ A lohe aʻela ʻo Saula, ua ʻike ʻia ʻo Dāvida, a me nā kānaka me ia, (e noho ana ʻo Saula ma Gibea ma lalo o ka lāʻau ma kahi kiʻekiʻe, a ma kona lima kāna ihe, a ua hoʻonoho ʻia kāna mau kauā a puni ona);

⁷ ʻōlelo akula ʻo Saula i kāna poʻe kauā e kū ana a puni ona, “E hoʻolohe ʻānō, e nā Beniamina; e hāʻawi anei ke keiki a Iese i nā mahina ʻai, a me nā pā waina na ʻoukou a pau, a e hoʻolilo iā ʻoukou a pau i luna tausani, a i luna haneri?

⁸ “I kipi ai ʻoukou a pau iaʻu, ʻaʻohe mea e hōʻike mai iaʻu, ua hana kaʻu keiki me ke keiki a Iese i kuʻikahi, ʻaʻole kekahi o ʻoukou e manaʻo mai iaʻu, ʻaʻole hoʻi e hōʻike mai iaʻu, ua hoʻāla kaʻu keiki i kaʻu kauwā e kūʻē iaʻu, e hoʻohālua, e like me ia i kēia lā.”

⁹ A laila ʻōlelo mai ʻo Doega no ʻEdoma, ʻo ia ka luna o nā kauā a Saula, ʻī maila, “Ua ʻike au i ke keiki a Iese e hele ana ma Noba i o ʻAhimeleka lā ke keiki a ʻAhituba.

¹⁰ “A ua nīnau aku ʻo ia iā Iēhova nona, a hāʻawi aku i ka ʻai nāna, a hāʻawi aku hoʻi iā ia i ka pahi kaua a Golia ke kanaka no ko Pilisetia.”

¹¹ ¶ A laila hoʻouna aku ke aliʻi e hea iā ʻAhimeleka, ke kahuna, ke keiki a ʻAhituba, a me ko ka hale a pau o kona makua kāne, nā kāhuna ma Noba; a hele mai lākou a pau i ke aliʻi.

¹² ʻĪ akula ʻo Saula, “ʻĀnō e hoʻolohe mai ʻoe, e ke keiki a ʻAhituba.” ʻĪ maila kēlā, “Eia wau, e kuʻu haku.”

¹³ ʻĪ akula ʻo Saula iā ia, “No ke aha lā i kipi ai ʻolua iaʻu, ʻo ʻoe a me ke keiki a Iese, i kou hāʻawi ʻana iā ia i ka berena, a me ka pahi kaua, a ua nīnau ʻoe i ke Akua nona, i kūʻē mai ia iaʻu e hālua, e like me ia i kēia lā?”

¹⁴ ʻŌlelo maila ʻo ʻAhimeleka i ke aliʻi, ʻī maila, “ʻO wai lā ka mea o kāu poʻe kauā i mālama pono e like me Dāvida, ka hūnōna kāne a ke aliʻi, a ua hele ia i kāu ʻī ʻana aku, a ua manaʻo nui ʻia ma kou hale?

¹⁵ “ʻO kuʻu hoʻomaka nō anei ia e nīnau aku i ke Akua nona? ʻAʻole iaʻu ia mea; mai hoʻoili ke aliʻi ia mea ma luna o kāna kauā, ma luna hoʻi o ko ka hale a pau o koʻu makua kāne; no ka mea, ʻaʻole i ʻike kāu kauā i ka mea ʻuʻuku, ʻaʻole hoʻi i ka mea nui o kēia mea.”

¹⁶ ʻĪ akula ke aliʻi, “E make ʻiʻo auaneʻi ʻoe, e ʻAhimeleka, ʻo ʻoe a me ko ka hale a pau o kou makua kāne.”

¹⁷ ʻŌlelo akula ke aliʻi i ka poʻe kiaʻi e kū ana a puni ona, “E huli aʻe ʻoukou a e pepehi i nā kāhuna no Iēhova; no ka mea, ua hui pū ko lākou lima me Dāvida, a ua ʻike lākou i kona mahuka ʻana, ʻaʻole hoʻi i hōʻike mai iaʻu.” Akā, ʻaʻole makemake nā kauā a ke aliʻi e kau aku i ko lākou lima e lele ma luna o nā kāhuna no Iēhova.

¹⁸ ʻĪ akula ke aliʻi iā Doega, “E huli aʻe ʻoe, a lele ma luna o nā kāhuna.” A huli aʻela ʻo Doega, kā ʻEdoma, a lele ma luna o nā kāhuna, a pepehi ihola ia lā i nā kānaka he kanawalukumamālima i pūliki ʻia i ka ʻēpoda olonā.

¹⁹ A luku akula ʻo ia iā Noba ke kūlanakauhale o nā kāhuna me ka maka o ka pahi kaua; ʻo nā kānaka, ʻo nā wāhine, ʻo nā kamaliʻi, ʻo nā mea omo waiū, ʻo nā bipi, ʻo nā hoki, a me nā hipa, me ka maka o ka pahi kaua.

²⁰ ¶ A ʻo kekahi o nā keiki a ʻAhimeleka, ke keiki a ʻAhituba, ʻo ʻAbiatara kona inoa, pakele akula ia, a holo aku ma hope o Dāvida.

²¹ A hōʻike akula ʻo ʻAbiatara iā Dāvida i kā Saula pepehi ʻana i nā kāhuna o Iēhova.

²² ʻĪ maila ʻo Dāvida iā ʻAbiatara, ia lā, “I ka noho ʻana o Doega kā ʻEdoma ma laila, ʻike nō wau, e haʻi aku ia iā Saula; ʻo wau nō ka mea i make ai ʻo nā mea a pau o ka hale o kou makua kāne.

²³ “E noho pū ʻoe me aʻu, mai makaʻu; no ka mea, ʻo ka mea nāna e ʻimi mai i kuʻu ola, ʻo ia ke ʻimi mai i kou ola; akā, me aʻu e maluhia ʻoe.”