KA BUKE MUA A SAMUʻELA 21 - Ka Baibala Hemolele

1 Hele akula ʻo Dāvida ma Noba; a loaʻa iā ia ka berena laʻa, a me ka pahi kaua a Golia; 10 a hele akula i Gata.

MOKUNA XXI.

¹ ¶ A hele akula ʻo Dāvida ma Noba i o ʻAhimeleka lā ke kahuna; a makaʻu ihola ʻo ʻAhimeleka i ka hālāwai ʻana me Dāvida, ʻī akula iā ia, “No ke aha lā ʻo ʻoe wale nō, ʻaʻohe kanaka me ʻoe?”

² ʻĪ maila ʻo Dāvida iā ʻAhimeleka i ke kahuna, “Ua kauoha mai ke aliʻi iaʻu i kekahi mea, a ua ʻī mai iaʻu, ‘Mai hōʻike iki i kekahi kanaka i ka mea aʻu i hoʻouna aku ai iā ʻoe, a me ka mea aʻu i kauoha aku ai iā ʻoe’; a ua hoʻonoho aku au i nā kauā no kēlā wahi a me kēia wahi.

³ “ʻĀnō hoʻi, he aha ka mea ma lalo o kou lima? E hāʻawi mai ʻoe ma kuʻu lima i nā paʻi berena ʻelima, a i nā mea paha i loaʻa.”

⁴ ʻŌlelo akula ke kahuna iā Dāvida, ʻī akula, “ʻAʻohe berena laʻa ʻole ma lalo o kuʻu lima; akā, he berena laʻa nō naʻe; inā paha ua hoʻokāʻokoʻa nā kānaka uʻi mai nā wāhine aku.”

⁵ ʻŌlelo akula ʻo Dāvida i ke kahuna, ʻī akula iā ia, “He ʻoiaʻiʻo, ua hoʻokaʻawale ʻia nā wāhine mai o mākou aku i nēia mau lā ʻekolu paha, i koʻu hele ʻana mai, a ua maʻemaʻe nā ipu o nā kānaka uʻi nei, a ua like kēia me ka berena laʻa ʻole, ʻoiaʻiʻo hoʻi ka mea i hoʻolaʻa ʻia i kēia lā i lalo o nā ipu.”

⁶ A hāʻawi akula ke kahuna i ka berena laʻa iā ia; no ka mea, ʻaʻohe berena ʻē aʻe ma laila, ʻo ka berena hōʻike wale nō, i lawe ʻia mai ke alo o Iēhova mai, no ka waiho ʻana i ka berena mahana i ka lā i lawe ʻia aku ai ʻo ia.

⁷ ¶ Aia nō i laila kekahi kanaka o nā kauā a Saula ia lā, e kali ana i mua o Iēhova, ʻo Doega kona inoa, no ʻEdoma, he luna o nā kahu hipa o Saula.

⁸ ¶ Nīnau akula ʻo Dāvida iā ʻAhimeleka, “ʻAʻole anei he ihe ma ʻaneʻi ma lalo o kou lima, a he pahi kaua paha? No ka mea, ʻaʻole au i lawe mai nei i kuʻu pahi kaua, ʻaʻole hoʻi i kaʻu mea kaua, no ka wikiwiki o kā ke aliʻi mea.”

⁹ ʻĪ maila ke kahuna, “ʻO ka pahi kaua a Golia ke kanaka Pilisetia āu i pepehi ai ma ke awāwa ʻo ʻEla, aia hoʻi ia i wahī ʻia i ka lole ʻaʻahu ma hope o ka ʻēpoda; a i lawe ʻoe ia mea, e lawe; no ka mea, ʻaʻohe pahi ʻē aʻe, ʻo ia wale nō.” ʻĪ akula ʻo Dāvida, “ʻAʻohe mea e like ana me ia, e hāʻawi mai ia iaʻu.”

¹⁰ ¶ Kū aʻela ʻo Dāvida, a holo ia lā mai ke alo aku o Saula, a hele mai i o ʻAkisa lā ke aliʻi o Gata.

¹¹ ʻĪ maila nā kauā a ʻAkisa iā ia, “ʻAʻole anei kēia ʻo Dāvida, ke aliʻi o ka ʻāina; ʻaʻole anei lākou i mele ai kekahi i kekahi nona me ka haʻa ʻana, i ka ʻī ʻana aʻe, ‘He mau tausani kā Saula i pepehi ai, he ʻumi tausani hoʻi kā Dāvida’?”

¹² A waiho ihola ʻo Dāvida i kēia mau ʻōlelo ma loko o kona naʻau, a makaʻu nui ihola iā ʻAkisa ke aliʻi o Gata.

¹³ A hoʻololi aʻela ia i kona ʻano i mua o lākou, a hoʻohālike iā ia iho me he hehena lā i loko o ko lākou lima, a kahakaha akula ia ma nā pani o nā ʻīpuka, a heleleʻi ihola kona kuha ma kona ʻumiʻumi.

¹⁴ A ʻōlelo akula ʻo ʻAkisa i kāna poʻe kauā, “Aia hoʻi, e nānā ʻoukou, ua hehena nēia kanaka; no ke aha lā ʻoukou i lawe mai iā ia i oʻu nei?

¹⁵ “He pono anei au i nā mea hehena, i lawe mai ai ʻoukou iā ia nei e hoʻohālike me he hehena lā i mua oʻu? E komo anei ia ma loko o kuʻu hale?”