KA BUKE MUA A SAMUʻELA 20 - Ka Baibala Hemolele

1 Kamaʻilio pū ʻo Dāvida me Ionatana. 11 Hoʻohiki pū ihola lāua. 27 ʻAʻole hele mai ʻo Dāvida i ka papa ʻaina a ke aliʻi. 28 Hoʻākāka akula ʻo Ionatana, no Dāvida. 30 Huhū ʻo Saula iā Ionatana, a hou akula i ka ihe iā ia; a hele akula ia e hālāwai me Dāvida.

MOKUNA XX.

¹ ¶ Holo akula ʻo Dāvida mai Naiota i Rama aku, a hele mai, a ʻī maila i mua o Ionatana, “He aha lā kaʻu i hana ai? He aha koʻu hewa, he aha koʻu hala i mua o kou makua kāne, i ʻimi mai ai ia i kuʻu ola?”

² ʻĪ maila ʻo ia iā ia, “ʻAʻole loa; ʻaʻole ʻoe e make; aia hoʻi, ʻaʻole e hana koʻu makua kāne i ka mea nui, ʻaʻole hoʻi i ka mea liʻiliʻi, ke haʻi ʻole mai ʻo ia iaʻu; no ke aha lā koʻu makua kāne i hūnā ai i kēia mea iaʻu? ʻAʻole pēlā!”

³ Hoʻohiki akula ʻo Dāvida, ʻī akula, “Ua ʻike pono kou makua kāne i ka loaʻa ʻana iaʻu o ke aloha i mua o kou maka; a ua ʻōlelo iho, ‘ʻAʻole e hōʻike kēia mea iā Ionatana, o kaumaha ia’; akā, he ʻoiaʻiʻo, ma ke ola o Iēhova, a me ke ola o kou ʻuhane, hoʻokahi kapuaʻi wale nō i koe i waena oʻu a me ka make.”

⁴ ʻŌlelo akula ʻo Ionatana iā Dāvida, “ʻO ka mea a kou naʻau e ʻī mai ai, ʻo kaʻu ia e hana aku ai iā ʻoe.”

⁵ ʻĪ maila ʻo Dāvida iā Ionatana, “Aia hoʻi, ʻapōpō ka malama hou, a he pono iaʻu e noho pū me ke aliʻi i ka ʻahaʻaina; akā, e kuʻu mai ʻoe iaʻu, a hūnā au iaʻu iho ma ke kula, a hiki i ke ahiahi o ka pō ʻakolu.

⁶ “Inā paha i ʻike kou makua kāne i koʻu nalo ʻana, a laila e ʻī aku ʻoe, ‘Ua noi ikaika mai ʻo Dāvida iaʻu e holo ia ma Betelehema i kona kūlanakauhale; no ka mea, i laila ka mōhai makahiki no ka ʻohana a pau.’

⁷ “Inā paha i ʻōlelo mai ia pēnēia, ‘Ua pono’; inā ua maluhia kāu kauā; akā, inā paha i huhū nui mai ia, he ʻoiaʻiʻo, ua ʻino kona manaʻo ʻana mai.

⁸ “No ia mea, e hana mai i kāu kauā me ke aloha; no ka mea, ua hoʻokomo mai ʻoe i kāu kauā i loko o ke kuʻikahi me ʻoe ma o Iēhova lā; inā paha he hewa i loko oʻu, nāu nō wau e pepehi; no ke aha lā ʻoe e lawe aku ai iaʻu i kou makua kāne?”

⁹ ʻĪ akula ʻo Ionatana, “ʻAʻole loa ia mea iā ʻoe; no ka mea, inā paha i ʻike pono wau, ua ʻino ka manaʻo ʻana o koʻu makua kāne e hele mai ma luna ou, ʻaʻole anei au i haʻi aku iā ʻoe?”

¹⁰ ʻĪ mai ʻo Dāvida iā Ionatana, “Na wai lā wau e haʻi mai? Pehea lā, ke ʻōlelo pākīkē mai kou makua kāne iā ʻoe?”

¹¹ ʻĪ akula ʻo Ionatana iā Dāvida, “ʻEā, e hele kāua i waho ma ke kula.” A hele akula lāua ma ke kula.

¹² ¶ ʻĪ akula ʻo Ionatana iā Dāvida, “E Iēhova ke Akua o kā ʻIseraʻela, aia e nīnau pono aku au i koʻu makua kāne i kekahi manawa i ka lā ʻapōpō, a ia lā aku paha, aia hoʻi, he mea pono no Dāvida, a e hoʻouna ʻole aku au i ou lā, a e haʻi iā ʻoe;

¹³ e hana mai ʻo Iēhova iā Ionatana pēlā, a nui aku hoʻi; inā paha i makemake koʻu makua kāne e hana ʻino iā ʻoe; a laila e haʻi aku au iā ʻoe, a e hoʻokuʻu aku iā ʻoe e hele ʻoe me ke aloha; a ʻo Iēhova pū kekahi me ʻoe, e like me ia ma mua me koʻu makua kāne.

¹⁴ “ʻAʻole i koʻu manawa e ola ana wale nō ʻoe e hōʻike mai iaʻu i ka lokomaikaʻi o Iēhova, i make ʻole ai au;

¹⁵ akā, mai hōʻoki ʻoe i kou lokomaikaʻi i koʻu hale i nā manawa a pau; ʻaʻole hoʻi i ka manawa e hōʻoki ʻia ai nā ʻenemi a pau o Dāvida, mai ke alo aku o ka honua.”

¹⁶ A kuʻikahi ihola ʻo Ionatana me ko ka hale o Dāvida, i ka ʻī ʻana, “Na Iēhova e ʻimi mai ia ma ka lima o ko Dāvida poʻe ʻenemi.”

¹⁷ A hoʻohiki hou akula ʻo Ionatana me Dāvida, no kona aloha iā ia; no ka mea, ua aloha nō ʻo ia iā ia, e like me ia i aloha ai i kona ola iho.

¹⁸ ¶ ʻĪ akula o Ionatana iā ia, “ʻApōpō ka Mahina Hou; a e ʻike ʻia kou nalo ʻana; no ka mea, e ʻike ʻia kou noho kaʻawale.

¹⁹ “A i ka pō ʻakolu, e iho wawe ʻoe a hiki ma kahi āu i peʻe ai i ka lā o ka hana ʻana, a e noho ʻoe ma ka pōhaku ʻo ʻEzela.

²⁰ “A e pana aku au i nā pua ʻekolu ma ka ʻaoʻao, e like me ka pana ʻana aku i ka hōʻailona.

²¹ “Aia hoʻi, e hoʻouna aku au i kekahi keiki, E hele e ʻimi i nā pua.” A inā paha e ʻōlelo akāka aku au i ke keiki, ‘Aia nā pua ma kēia ʻaoʻao ou, e lawe ia mau mea; a laila e hele mai ʻoe’; no ka mea, he pōmaikaʻi nou, ʻaʻohe mea ʻino, ma ke ola o Iēhova.

²² “Akā, inā e ʻōlelo aku au i ke keiki pēnēia, ‘‘Aia nā pua ma ʻō aku ou’; a laila e hele ʻē aku ʻoe; no ka mea, na Iēhova ʻoe i hoʻouna aku ai.

²³ “A ma ka mea a kāua i kamaʻilio ai, aia hoʻi, ʻo Iēhova nō i waena o kāua i ka manawa a pau.”

²⁴ ¶ A peʻe ihola ʻo Dāvida ma ke kula; a hiki mai ka Mahina Hou, noho ihola ke aliʻi e ʻahaʻaina ai.

²⁵ Noho iho ke aliʻi ma luna o kona noho, me ia i ka manawa ma mua, ma luna o ka noho ma ka paia; a kū aʻela ʻo Ionatana, a noho ihola ʻo ʻAbenera ma ka ʻaoʻao o Saula, a ua kaʻawale ko Dāvida wahi.

²⁶ Akā, ʻaʻole ʻo Saula i ʻōlelo iki ia lā; no ka mea, manaʻo ihola ia, “Ua hiki mai kekahi mea iā ia, ua haumia ʻo ia; ʻoiaʻiʻo, ua haumia ʻo ia.”

²⁷ A ia lā aʻe, ʻo ia ka pō ʻalua o ka malama, ua kaʻawale ko Dāvida wahi; nīnau akula ʻo Saula iā Ionatana i kāna keiki, “No ke aha lā i hele ʻole mai ai ke keiki a Iese i ka ʻahaʻaina i nehinei a i kēia lā?”

²⁸ ʻĪ maila ʻo Ionatana iā Saula, “Ua noi ikaika mai ʻo Dāvida iaʻu, e hele ia ma Betelehema.

²⁹ “A ʻī maila ia, ‘Ke noi aku nei au iā ʻoe, e kuʻu mai ʻoe iaʻu e hele; no ka mea, he mōhai ʻohana no mākou ma ke kūlanakauhale, a ua kauoha mai kuʻu kaikuaʻana iaʻu; ʻānō hoʻi, inā ua loaʻa iaʻu ke aloha i kou maka, e ʻae mai ʻoe iaʻu e hele koke aku au e ʻike i koʻu mau hoahānau’; ʻo ia ka mea i hele ʻole mai ai ia i ka papa ʻaina o ke aliʻi.”

³⁰ ¶ A laila hoʻā ʻia ka inaina o Saula iā Ionatana, ʻī akula iā ia, “E ke keiki paʻakikī, kekeʻe, ʻaʻole anei au i ʻike, ua koho aku ʻoe i ke keiki a Iese, i mea hilahila nou, a me ka hilahila o kahi huna o kou makuahine?

³¹ “No ka mea, i nā lā a pau o ke ola ʻana o ke keiki a Iese ma luna o ka honua, ʻaʻole e hoʻokūpaʻa ʻia ʻoe a me kou aupuni; ʻānō hoʻi, e hoʻouna aku ʻoe, a e lawe mai iā ia i oʻu nei; no ka mea, e pono nō ia ke make.”

³² ʻŌlelo maila ʻo Ionatana iā Saula i kona makua kāne, ʻī maila iā ia, “No ke aha lā e pepehi ʻia ai ʻo ia? He aha kāna i hana ai?”

³³ Hou akula ʻo Saula i ka ihe iā ia e pepehi iā ia; no ia mea, ʻike ihola ʻo Ionatana i ka manaʻo ʻana o kona makua kāne e pepehi iā Dāvida.

³⁴ Kū aʻela ʻo Ionatana mai ka papa ʻaina mai me ka huhū wela, ʻaʻole ia i ʻai i ka ʻai i ka lua o ka lā o ka malama, no kona kaumaha iā Dāvida; no ka mea, ua ʻōlelo hōʻino kona makua kāne iā ia.

³⁵ ¶ A i kakahiaka aʻe, hele akula ʻo Ionatana ma ke kula i ka manawa i ʻōlelo ʻia ai me Dāvida, a me ia pū kekahi keiki.

³⁶ ʻĪ akula ia i kona keiki, “E holo, e ʻimi i nā pua aʻu e pana aku ai.” A i kona holo ʻana, pana akula ia i ka pua ma ʻō aku ona.

³⁷ A hiki akula ke keiki ma kahi o ka pua a Ionatana i pana aku ai, kāhea akula ʻo Ionatana i ke keiki, ʻī akula, “ʻAʻole anei ma ʻō aku ou ka pua?”

³⁸ Kāhea akula ʻo Ionatana ma hope o ke keiki, “E lalelale, e wiki, mai kali ʻoe!” Hōʻiliʻili aʻela ke keiki o Ionatana i nā pua, a hoʻi mai i kona haku.

³⁹ ʻAʻole ʻike iki ua keiki lā; ʻo Ionatana lāua ʻo Dāvida wale nō kai ʻike ia mea.

⁴⁰ Hāʻawi akula ʻo Ionatana i kāna mea kaua ma kona keiki, ʻī akula iā ia, “Ō hele, a lawe aku ma ke kūlanakauhale.”

⁴¹ A hala akula ke keiki, kū aʻela ʻo Dāvida ma ke kūkulu hema, a hāʻule ihola i lalo ke alo ma ka honua, a kūlou ihola ʻekolu kūlou ʻana; honi ihola lāua kekahi i kekahi, a uē pū lāua, a nui akula kā Dāvida.

⁴² ʻĪ akula ʻo Ionatana iā Dāvida, “Ō hele me ka malu; no ka mea, ua hoʻohiki kāua a ʻelua ma ka inoa ʻo Iēhova, i ka ʻī ʻana aʻe, ‘ʻO Iēhova nō i waena oʻu a ʻo ʻoe, a i waena hoʻi o koʻu hua a ʻo kou hua i ka manawa a pau.’” Kū aʻela ia, a hele akula; a hoʻi akula ʻo Ionatana ma ke kūlanakauhale.