KA BUKE MUA A SAMUʻELA 19 - Ka Baibala Hemolele

1 Kauoha akula ʻo Saula e pepehi iā Dāvida. 4 Hoʻomālielie akula ʻo Ionatana i kona makua kāne. 8 Luku akula ʻo Dāvida i nā Pilisetia. 10 ʻImi akula ʻo Saula e pepehi iā Dāvida, a pakele akula ia.

MOKUNA XIX.

¹ ¶ ʻŌlelo akula ʻo Saula iā Ionatana i kāna keiki, a i kāna poʻe kauā a pau, e pepehi iā Dāvida.

² Akā ʻo Ionatana, ke keiki a Saula ua nui kona aloha iā Dāvida. Haʻi akula ʻo Ionatana iā Dāvida, ʻī akula, “Ke ʻimi nei ʻo Saula, koʻu makua kāne, e pepehi iā ʻoe. ʻĀnō hoʻi, ke noi aku nei au iā ʻoe, e mālama iā ʻoe iho a kakahiaka, a e noho ma kahi malū, a e hūnā iā ʻoe iho.

³ “A e hele aku au ma waho a e kū me koʻu makua kāne ma ke kula, ma kou wahi, a e ʻōlelo aku au i koʻu makua kāne nou, a e haʻi aku au iā ʻoe i kaʻu mea i ʻike ai.”

⁴ A ʻōlelo pono akula ʻo Ionatana iā Saula kona makua kāne no Dāvida, ʻī akula iā ia, “Mai noho a hana hewa ke aliʻi i kāna kauā iā Dāvida; no ka mea, ʻaʻole ʻo ia i hana hewa mai iā ʻoe; akā, ua pono loa kāna hana ʻana iā ʻoe.

⁵ “Ua waiho ʻo ia i kona ola i loko o kona lima, a pepehi akula i ke kanaka Pilisetia, a ua hana mai ʻo Iēhova i ke ola nui no kā ʻIseraʻela a pau; ua ʻike nō ʻoe, a ua ʻoliʻoli nō hoʻi; no ke aha lā ʻoe e hana hewa i ke koko hala ʻole, e pepehi hala ʻole iā Dāvida?”

⁶ Hoʻolohe ʻo Saula i ka leo o Ionatana; a hoʻohiki ihola, “Ma ke ola o Iēhova, ʻaʻole ia e make.”

⁷ Kāhea akula ʻo Ionatana iā Dāvida, a haʻi akula ʻo Ionatana iā ia i kēia mau mea a pau; a lawe mai ʻo ia iā Dāvida i o Saula lā, a noho ia i mua ona e like me nā lā ma mua.

⁸ ¶ A he kaua hou; a hele akula ʻo Dāvida, a kaua aku i ko Pilisetia, a pepehi akula iā lākou me ka luku nui; a holo lākou mai kona alo aku.

⁹ A ma luna o Saula ka ʻuhane ʻino na Iēhova mai, i kona noho ʻana i loko o kona hale, me ka ihe ma kona lima; a hoʻokanikani ihola ʻo Dāvida me kona lima.

¹⁰ ʻImi akula ʻo Saula e hou aku iā Dāvida a i ka paia me ka ihe; a hele akula ia mai ke alo aku o Saula, a hou akula ia i ka ihe ma ka paia; a holo akula ʻo Dāvida, a pakele ihola ia pō.

¹¹ ¶ A hoʻouna akula ʻo Saula i nā ʻelele ma ka hale o Dāvida e kiaʻi iā ia, a e pepehi iā ia i kakahiaka; a haʻi akula ʻo Mikala ka wahine a Dāvida iā ia, ʻī akula, “Inā ʻaʻole ʻoe e hoʻopakele i kou ola i kēia pō, ʻapōpō e pepehi ʻia ʻoe.”

¹² Kuʻu ihola ʻo Mikala iā Dāvida ma ka puka makani; a hele akula ia a holo, a pakele akula.

¹³ Lawe aʻela ʻo Mikala i kiʻi, a waiho ma kahi moe, a waiho hoʻi i ka uluna hulu kao ma kona poʻo, a uhi ihola i ke kapa moe.

¹⁴ A hoʻouna aku ʻo Saula i nā ʻelele e lālau iā Dāvida, ʻī maila ka wahine, “He maʻi kona.”

¹⁵ Hoʻouna hou aku ʻo Saula i nā ʻelele e ʻike iā Dāvida, ʻī akula, “E lawe mai iā ia i oʻu nei ma luna o kahi moe, i pepehi ai au iā ia.”

¹⁶ A hiki akula nā ʻelele, aia hoʻi, he kiʻi ma luna o kahi moe, me ka uluna hulu kao ma kona poʻo.

¹⁷ ʻĪ akula ʻo Saula iā Mikala, “No ke aha lā ʻoe i hoʻopunipuni mai ai iaʻu pēlā, a kuʻu aku i kuʻu ʻenemi, i pakele ai ia?” ʻĪ maila ʻo Mikala iā Saula, “ʻŌlelo mai nō ia iaʻu, ‘E kuʻu aʻe ʻoe iaʻu, no ke aha lā e pepehi aku ai au iā ʻoe?’”

¹⁸ ¶ A holo akula ʻo Dāvida, a pakele akula, a hele i o Samuʻela lā ma Rama, a haʻi akula iā ia i nā mea a pau a Saula i hana mai ai iā ia; a hele akula lāua me Samuʻela a noho ma Naiota.

¹⁹ A ua haʻi ʻia iā Saula, i ka ʻī ʻana aʻe, “Aia hoʻi ʻo Dāvida ma Naiota i Rama!”

²⁰ Hoʻouna akula ʻo Saula i nā ʻelele e lālau iā Dāvida; a ʻike lākou i ka poʻe kāula e wānana ana, a me Samuʻela e kū ana i hoʻonoho ʻia ma luna o lākou, hiki mai ka ʻUhane o ke Akua ma luna o nā ʻelele a Saula, a wānana ihola lākou.

²¹ A haʻi ʻia ia mea iā Saula, hoʻouna akula ia i nā ʻelele hou, a wānana hoʻi lākou. A hoʻouna hou akula ʻo Saula i nā ʻelele, ʻo ke kolu kēia, a wānana nō hoʻi lākou.

²² A laila hele akula hoʻi ia ma Rama, a hiki ma ka pūnāwai nui ma Seku; nīnau akula ia, ʻī akula, “Ma hea ʻo Samuʻela a me Dāvida?” A haʻi ʻia mai, “Aia ma Naiota i Rama.”

²³ A hele akula ia ma Naiota i Rama; a hiki mai ka ʻUhane o ke Akua ma luna ona, a hele akula ia e wānana ana, a hiki ma Naiota i Rama.

²⁴ A wehe aʻela ia i kona ʻaʻahu, a wānana aʻela hoʻi ia i mua o Samuʻela, a hāʻule ihola ia me ka ʻaʻahu ʻole ia lā a pau, a ia pō a pau. No ia mea, ʻōlelo aʻela lākou, “ʻO Saula anei kekahi me ka poʻe kāula?”