KA BUKE MUA A SAMUʻELA 18 - Ka Baibala Hemolele

1 Aloha akula ʻo Ionatana iā Dāvida. 3 No kā lāua hana ʻana. 5 No ka hana naʻauao a Dāvida. 10 Huhū ʻo Saula iā Dāvida; a manaʻo ihola ia e pepehi iā Dāvida. 17 Hāʻawi mai ʻo Saula i kāna kaikamahine i wahine na Dāvida, i mea e hihia ai ʻo ia.

MOKUNA XVIII.

¹ ¶ A pau aʻela kāna kamaʻilio pū ʻana me Saula, ua hui pū ʻia ka naʻau o Ionatana me ka naʻau o Dāvida, aloha akula ʻo Ionatana iā ia e like me kona ʻuhane iho.

² Lawe akula ʻo Saula iā ia ia lā, ʻaʻole ia i ʻae aku iā ia e hoʻi hou i ka hale o kona makua kāne.

³ A hoʻopaʻa ihola ʻo Ionatana a me Dāvida i kuʻikahi; no ka mea, aloha akula ʻo ia iā ia e like me kona ʻuhane iho.

⁴ Wehe aʻela ʻo Ionatana i kona kapa ʻaʻahu ma luna ona, a hāʻawi akula iā Dāvida, a me kona lole komo, a me kāna pahi kaua, a i kāna kakaka, a me kona kāʻei.

⁵ A hele akula ʻo Dāvida i nā wahi a pau a Saula i hoʻouna aku ai iā ia, ua hana naʻauao ia; a hoʻonoho akula ʻo Saula iā ia ma luna o nā kānaka kaua; a ua maikaʻi ʻo ia i nā maka o nā kānaka a pau, a i nā maka hoʻi o ka poʻe kauā a Saula.

⁶ ¶ A i ko lākou hele ʻana mai, i ka wā a Dāvida i hoʻi mai ai i ka pepehi ʻana i ke kanaka Pilisetia, hele maila nā wāhine mai nā kūlanakauhale a pau o kā ʻIseraʻela mai, e mele ana, a e haʻa ana, e hālāwai me Saula ke aliʻi, me nā kuolokani, a me ka ʻoliʻoli, a me nā mea kani.

⁷ ʻŌlelo aʻela nā wāhine e haʻa ana, ʻī akula, “ʻO nā tausani kā Saula i pepehi ai, a he ʻumi tausani kā Dāvida.”

⁸ Huhū nui ihola ʻo Saula, a ua hewa ia ʻōlelo i kona manaʻo; ʻī ihola, “Ua hāʻawi lākou na Dāvida he ʻumi tausani, a ua hāʻawi lākou naʻu he mau tausani; ʻo ka lilo o ke aupuni nona ka mea i koe?”

⁹ ʻĀwihi aʻela ko Saula maka iā Dāvida mai ia manawa mai.

¹⁰ ¶ Ia lā iho, hiki mai ka ʻuhane ʻino ma luna o Saula na ke Akua mai, a wānana akula ia i loko o ka hale; a hoʻokani ihola ʻo Dāvida me kona lima, e like me nā manawa ma mua; a he ihe ma ka lima o Saula.

¹¹ Hou akula ʻo Saula i ka ihe, ʻī ihola, “E pepehi aku au iā Dāvida a i ka paia!” ʻElua ko Dāvida ʻalo ʻana mai ona aku lā.

¹² Makaʻu aʻela ʻo Saula iā Dāvida; no ka mea, me ia nō ʻo Iēhova, a ua haʻalele akula iā Saula.

¹³ No ia mea, hoʻonoho akula ʻo Saula iā ia mai ona aku lā, a hoʻolilo iā ia i luna tausani nona; a hele akula ia a hoʻi mai i mua o nā kānaka.

¹⁴ Ua naʻauao ʻo Dāvida ma kona ʻaoʻao a pau; a me ia nō ʻo Iēhova.

¹⁵ A ʻike akula ʻo Saula i kona naʻauao loa, makaʻu nō ʻo ia iā ia.

¹⁶ Akā, ʻo kā ʻIseraʻela a pau a me kā Iuda, aloha lākou iā Dāvida; no ka mea, hele aku nō ia a hoʻi mai i mua o lākou.

¹⁷ ¶ ʻŌlelo akula ʻo Saula iā Dāvida, “Aia hoʻi, ʻo kaʻu kaikamahine mua, ʻo Meraba, ʻo ia kaʻu e hāʻawi aku i wahine nāu, ke ikaika ʻoe noʻu, a ke kaua aku i nā kaua o Iēhova”; ʻī ihola ʻo Saula, “ʻAʻole ma luna ona koʻu lima iho; akā, ma luna ona ka lima o ko Pilisetia.”

¹⁸ ʻĪ akula ʻo Dāvida iā Saula, “ʻO wai lā ʻo wau? A he aha hoʻi koʻu ola, a me ko ka hale o koʻu makua kāne i waena o kā ʻIseraʻela, i lilo ai au i hūnōna kāne na ke aliʻi?”

¹⁹ A i ka manawa e pono ai ke hāʻawi ʻia aku ʻai ʻo Meraba, ke kaikamahine a Saula, na Dāvida, ua hāʻawi ʻia ʻo ia na ʻAderiʻela, no Mehola, i wahine nāna.

²⁰ ¶ A ʻo Mikala, ke kaikamahine a Saula, aloha nō ʻo ia iā Dāvida; a haʻi akula lākou iā Saula, a ua pono ia mea i kona maka.

²¹ ʻĪ akula ʻo Saula, “E hāʻawi aku au iā ia nāna, i lilo ai ia i mea hihia nona, a i kūʻē mai ai ka lima o ko Pilisetia iā ia.” ʻĪ akula ʻo Saula iā Dāvida, “E lilo mai ʻoe i kēia lā i hūnōna kāne naʻu ma kekahi o lāua.”

²² Kauoha akula ʻo Saula i kāna poʻe kauā, “E kamaʻilio malū ʻoukou me Dāvida, e ʻī aku, ‘Aia hoʻi, ua ʻoluʻolu ke aliʻi iā ʻoe, a ua aloha hoʻi kāna poʻe kauā a pau iā ʻoe; ʻānō hoʻi, e hoʻolilo ʻia ʻoe i hūnōna kāne na ke aliʻi.’”

²³ Haʻi akula nā kauā a Saula i kēia mau ʻōlelo ma ka pepeiao o Dāvida. ʻĪ maila ʻo Dāvida, “He mea ʻuʻuku anei i ko ʻoukou maka, ke lilo i hūnōna kāne na ke aliʻi, he kanaka ʻilihune wau, a he mea i manaʻo ʻole ʻia?”

²⁴ Haʻi akula nā kauā a Saula iā ia, ʻī akula, “Me kēia mau ʻōlelo i ʻōlelo mai ai ʻo Dāvida.”

²⁵ ʻĪ akula ʻo Saula, “Pēnēia ʻoukou e ʻōlelo aku ai iā Dāvida, ‘ʻAʻole makemake ke aliʻi i ka uku; akā, i hoʻokahi haneri ʻōmaka o nā Pilisetia, i mea e hoʻopaʻi aku ai i nā ʻenemi o ke aliʻi.’” Manaʻo ihola ʻo Saula e hāʻule ana ʻo Dāvida ma ka lima o nā Pilisetia.

²⁶ A haʻi akula nā kauā āna i kēia mau ʻōlelo iā Dāvida, ua pono ia mea i nā maka o Dāvida i ka lilo i hūnōna kāne na ke aliʻi; ʻaʻole hoʻi i pau nā lā.

²⁷ Kū aʻela ʻo Dāvida, a hele akula, ʻo ia me kona poʻe kānaka, a pepehi akula i ʻelua haneri kānaka o nā Pilisetia; a lawe mai ʻo Dāvida i ko lākou ʻōmaka, a hāʻawi lākou ia mau mea a pau i ke aliʻi, i mea e lilo ai ʻo ia i hūnōna kāne na ke aliʻi; a hāʻawi akula ʻo Saula iā Mikala, i kāna kaikamahine, i wahine nāna.

²⁸ Nānā akula ʻo Saula, a ʻike hoʻi, aia nō ʻo Iēhova me Dāvida, a ʻo Mikala ke kaikamahine a Saula, ua aloha aku ʻo ia iā ia.

²⁹ A nui loa aʻela ka makaʻu o Saula iā Dāvida, a lilo ʻo Saula i ko Dāvida ʻenemi i nā lā a pau.

³⁰ ¶ A hele akula nā aliʻi o nā Pilisetia; a mai ka manawa o ko lākou hele ʻana aku, ua ʻoi aku ka naʻauao o Dāvida i ko nā kauā a pau a Saula; no ia mea, ua manaʻo nui ʻia kona inoa.