KA BUKE MUA A SAMUʻELA 17 - Ka Baibala Hemolele

1 Hoʻākoakoa ʻia aʻe ko Pilisetia, a me kā ʻIseraʻela no ke kaua. 4 No Golia, ke koa nunui. 49 No ko Dāvida pepehi ʻana iā ia, a ʻoki ihola i kona poʻo. 51 Heʻe akula ko Pilisetia.

MOKUNA XVII.

¹ ¶ Hoʻākoakoa aʻela ko Pilisetia i ko lākou poʻe kaua e kaua mai, a ua hōʻuluʻulu ʻia lākou ma Soko, no Iuda, a hoʻomoana ihola ma waena o Soko a me ʻAzeka, ma ʻEpesa Damima.

² A ʻākoakoa ʻo Saula a me nā kānaka o kā ʻIseraʻela, a hoʻomoana ihola ma ke awāwa ʻo ʻEla, a hoʻoponopono i ke kaua e kūʻē i ko Pilisetia.

³ Kū aʻela ko Pilisetia ma luna o ka puʻu ma kekahi ʻaoʻao, a kū aʻela hoʻi kā ʻIseraʻela ma luna o ka puʻu ma kekahi ʻaoʻao; a ʻo ke awāwa i waena o lākou.

⁴ A puka maila kekahi kanaka koa no ka poʻe o ko Pilisetia, ʻo Golia kona inoa no Gata, ʻo kona kiʻekiʻe hoʻokahi ia anana a me nā kapuaʻi ʻehā.

⁵ A he mahiole keleawe ma kona poʻo, a he pale umauma unahi kona, a ʻo ke kaumaha o ia pale umauma, ʻelima tausani sekela keleawe.

⁶ A he mau pale keleawe ma kona wāwae, a he pale keleawe ma waena o kona mau poʻohiwi.

⁷ A ʻo ke ʻau o kāna ihe, ua like ia me ka lāʻau o ka mea hana lole, a ʻo ka pahi o kāna ihe, he ʻaono haneri sekela hao, ma ke kaupaona; a hele kekahi kanaka i mua ona e hali ana i ka pale kaua.

⁸ Kū aʻela ia a kāhea maila i ka poʻe kaua o kā ʻIseraʻela, ʻī maila iā lākou, “No ke aha lā ʻoukou i hele mai ai e hoʻoponopono i ke kaua? ʻAʻole anei wau he Pilisetia, a ʻo ʻoukou he poʻe kauā na Saula? E wae ʻoukou i kekahi kanaka no ʻoukou, a e iho mai ia i oʻu nei.

⁹ “Inā e hiki iā ia ke kaua pū me aʻu, a make au iā ia, a laila e lilo mākou i kauā na ʻoukou; akā, i lanakila au ma luna ona, a make ia iaʻu, a laila e lilo ʻoukou i kauā na mākou, a e hoʻokauā mai ʻoukou na mākou.”

¹⁰ ʻĪ maila ua kanaka lā no ko Pilisetia, “Ke ʻaʻa aku nei au i ka poʻe kaua o kā ʻIseraʻela i kēia lā; e hō mai ʻoukou i kekahi kanaka i hoa kaua noʻu.”

¹¹ A lohe aʻela ʻo Saula a me kā ʻIseraʻela a pau i ka ʻōlelo a ke kanaka no ko Pilisetia, weliweli lākou, a makaʻu loa ihola.

¹² ¶ A ʻo Dāvida, ʻo ia ke keiki a ua kanaka lā no ʻEperata no Betelehema o Iuda, ʻo Iese kona inoa; a ʻewalu āna keiki; a i ka wā iā Saula, ua ʻelemakule ia i waena o kānaka.

¹³ A ʻo nā keiki mua ʻekolu a Iese hele lākou ma muli o Saula i ke kaua; a ʻo ka inoa o nā keiki ʻekolu i hele i ke kaua; ʻo ʻEliaba ka hānau mua, a ma hope mai ona, ʻo ʻAbinadaba, a ʻo Sama ke kolu.

¹⁴ A ʻo Dāvida ka pōkiʻi; a hahai akula nā keiki mua ʻekolu ma hope o Saula.

¹⁵ Akā, ʻo Dāvida, hele akula ia a hoʻi hou aʻe mai o Saula mai e mālama i nā hipa o kona makua kāne ma Betelehema.

¹⁶ A hoʻokokoke mai nō ua kanaka Pilisetia lā i kakahiaka a me ke ahiahi, a hōʻike mai iā ia iho i nā lā he kanahā.

¹⁷ ¶ ʻĪ akula ʻo Iese iā Dāvida i kāna keiki, “ʻĀnō e lawe aku ʻoe na kou mau hoahānau i hoʻokahi ʻepa o kēia ʻai i pūlehu ʻia, a i kēia mau paʻi palaoa he ʻumi, a e holo i kou mau hoahānau ma kahi i hoʻomoana ai i ke kaua.

¹⁸ “A e lawe ʻoe i kēia mau paʻi waiūpaʻa he ʻumi na ka luna tausani, a e ʻike ʻoe i ka pono o kou mau hoahānau, a e lawe mai i ko lākou mea hōʻoiaʻiʻo.”

¹⁹ A ʻo Saula, ʻo lākou, a me nā kānaka a pau o kā ʻIseraʻela, aia nō ma ke awāwa ʻo ʻEla, e kaua ana i ko Pilisetia.

²⁰ ¶ Ala aʻela ʻo Dāvida i kakahiaka nui, a waiho i nā hipa me ke kahu, a lawe aʻela a hele aku e like me kā Iese i kauoha mai ai iā ia; a hiki aku ia ma kahi o nā kaʻa, a e hele ana ka poʻe koa i ke kaua, a uō lākou i ke kaua.

²¹ A ua hoʻouka aku kā ʻIseraʻela a me ko Pilisetia i ke kaua, ʻo kekahi kaua ma ke alo o kekahi kaua.

²² A waiho akula ʻo Dāvida i nā mea mai ona aku lā ma ka lima o ka mea mālama ia mea, a holo akula i ke kaua, a hele e nīnau i ka pono o kona mau hoahānau.

²³ Iā ia i kamaʻilio ai me lākou, aia hoʻi, piʻi maila ua kanaka koa lā, no ko Pilisetia, ʻo Golia kona inoa no Gata, mai ka poʻe kaua o ko Pilisetia mai, a ʻōlelo mai e like me kēlā ʻōlelo; a lohe ʻo Dāvida.

²⁴ A ʻo nā kānaka a pau o kā ʻIseraʻela, a ʻike akula lākou iā ia, holo lākou mai kona maka aku, a makaʻu nui ihola.

²⁵ ʻĪ maila na kānaka o kā ʻIseraʻela, “Ua ʻike anei ʻoukou ia kanaka i piʻi mai ai? No ka mea, ua piʻi mai ia e ʻaʻa i kā ʻIseraʻela; a ʻo ke kanaka e pepehi iā ia, e hoʻolako mai ke aliʻi iā ia i ka waiwai nui, a e hāʻawi mai hoʻi i kāna kaikamahine nāna, a e hoʻokaʻawale aʻe ia i ka hale o kona makua kāne i waena o kā ʻIseraʻela, ʻaʻole e hoʻokupu.”

²⁶ ¶ ʻŌlelo akula ʻo Dāvida i nā kānaka e kū pū ana me ia, ʻī akula, “He aha ka mea e hana ʻia mai ai i ke kanaka, nāna e pepehi kēia kanaka Pilisetia, a e lawe aku i ka hōʻino mai kā ʻIseraʻela aku? ʻO wai lā kēia Pilisetia i ʻoki poepoe ʻole ʻia, i ʻaʻa mai ai ia i ka poʻe kaua o ke Akua ola?”

²⁷ ʻŌlelo maila nā kānaka iā ia pēnēia, ʻī maila, “Pēlā nō e hana ʻia mai ai i ke kanaka, nāna ia e pepehi.”

²⁸ ¶ A lohe aʻela ʻo ʻEliaba kona kaikuaʻana i kāna ʻōlelo ʻana aku i nā kānaka; a ua hoʻā ʻia ka inaina o ʻEliaba iā Dāvida, ʻī aku ia, “No ke aha lā ʻoe i hele mai i ʻaneʻi? Me wai lā ʻoe i waiho ai i kēlā poʻe hipa ʻuʻuku ma ka wao nahele? Ua ʻike au i kou haʻaheo, a me ka hewa o kou naʻau; no ka mea, ua hele mai ʻoe e ʻike i ke kaua.”

²⁹ ʻĪ akula ʻo Dāvida, “He aha kaʻu i hana ai ʻānō? ʻAʻole anei he kumu?”

³⁰ Huli aʻela ia mai ona aku lā i kekahi ʻē aʻe, a ʻōlelo akula e like me kēlā ʻōlelo; a ʻī maila nā kānaka e like me ma mua.

³¹ ¶ A lohe ʻia nā ʻōlelo a Dāvida i ʻōlelo ai, haʻi akula lākou i mua o Saula; a kiʻi akula ʻo ia iā ia.

³² ʻĪ akula ʻo Dāvida iā Saula, “Mai hoʻokaumaha ʻia ka naʻau o kekahi kanaka nona; e hele nō kāu kauā e kaua pū me ua kanaka Pilisetia lā.”

³³ ʻĪ maila ʻo Saula iā Dāvida, “ʻAʻole e hiki iā ʻoe ke hele kūʻē i kēia kanaka Pilisetia, e kaua pū me ia; no ka mea, he ʻōpiopio ʻoe; akā ʻo ia, he kanaka koa ia mai kona wā ʻōpiopio mai.”

³⁴ ʻĪ akula ʻo Dāvida iā Saula, “Ua mālama kāu kauā i nā hipa o kona makua kāne, a hele maila ka liona, a me ka bea, a lawe aku i kekahi keiki hipa no ka poʻe hipa.

³⁵ “Hahai akula au iā ia, a pepehi iā ia, a hoʻopakele ia mea mai kona waha mai; a i kona kūʻē mai iaʻu, lālau akula au i kona ʻumiʻumi, a pepehi ihola iā ia, a make ia iaʻu.

³⁶ “A ʻo ka liona a me ka bea, ua make lāua a ʻelua i kāu kauā; a ʻo kēia Pilisetia ʻoki poepoe ʻole ʻia, e like auaneʻi ia me kekahi o lāua, no kona ʻaʻa ʻana i ka poʻe kaua o ke Akua ola.”

³⁷ ʻĪ akula hoʻi ʻo Dāvida, “ʻO Iēhova, ka mea nāna au i hoʻopakele mai ka wāwae aku o ka liona, a mai ka wāwae aku o ka bea, nāna nō au e hoʻopakele mai ka lima aku o kēia kanaka Pilisetia.” ʻĪ maila ʻo Saula iā Dāvida, “Ō hele, ʻo Iēhova pū kekahi me ʻoe!”

³⁸ Hōʻaʻahu akula ʻo Saula iā Dāvida i kona ʻaʻahu kaua, a kau akula i ka mahiole keleawe ma kona poʻo, a hoʻokomo iā ia i ka pūliki koa.

³⁹ Kāʻei ihola ʻo Dāvida i kāna pahi kaua ma luna o nā mea kaua, a manaʻo ihola e hele; akā, no ka hoʻāʻo ʻole ʻia, ʻī akula ʻo Dāvida iā Saula, “ʻAʻole au e hiki ke hele me kēia mau mea; no ka mea, ʻaʻole au i hoʻāʻo.” Kala aʻela ʻo Dāvida ia mau mea mai ona aku lā.

⁴⁰ Lawe akula ia i kona koʻokoʻo ma kona lima, ʻohi ihola ia i nā ʻalā ʻelima no ke kahawai, a hahao i loko o ke kīʻeke kahu hipa nona, a i loko o ka ʻaʻa; a ma kona lima kāna maʻa; a hoʻokokoke akula ia i ke kanaka Pilisetia.

⁴¹ ¶ A hele mai ke kanaka Pilisetia, a hoʻokokoke mai iā Dāvida, a i mua ona ke kanaka nāna i hali ka pale kaua.

⁴² Nānā aʻela ke kanaka Pilisetia, a ʻike maila iā Dāvida, hoʻowahāwahā maila iā ia; no ka mea, he ʻōpiopio ʻo ia, a he ʻehu, a maikaʻi ke nānā aku.

⁴³ ʻĪ maila ke kanaka Pilisetia iā Dāvida, “He ʻīlio anei wau, i hele mai ʻoe i oʻu nei me ke koʻokoʻo?” A hōʻino maila ke kanaka Pilisetia iā Dāvida ma kona mau akua.

⁴⁴ ʻĪ maila ka Pilisetia iā Dāvida, “E hele mai i oʻu nei, a e hāʻawi aku au i kou ʻiʻo i nā manu o ka lewa, a me nā holoholona o ke kula!”

⁴⁵ ʻĪ akula ʻo Dāvida i ka Pilisetia, “Ke hele maila ʻoe i oʻu nei me ka pahi kaua, a me ka ihe, a me ka pale kaua; akā ʻo wau, ke hele aku nei au i ou lā ma ka inoa ʻo Iēhova o nā kaua, ke Akua o ko ʻIseraʻela poʻe kaua āu i ʻaʻa mai ai.

⁴⁶ “I kēia lā, e hāʻawi mai ʻo Iēhova iā ʻoe i loko o kuʻu lima, a e pepehi aku au iā ʻoe, a e lawe aku au i kou poʻo mai ou aku lā; a e hāʻawi aku au i kēia lā i nā kupapaʻu o ko Pilisetia poʻe kaua na nā manu o ka lewa, a na nā holoholona o ka honua; i ʻike ai ko ka honua a pau, he Akua nō i loko o kā ʻIseraʻela.

⁴⁷ “A e ʻike kēia ʻaha kanaka a pau, ʻaʻole e hoʻōla mai ʻo Iēhova me ka pahi kaua, a me ka ihe; no ka mea, no Iēhova ke kaua, a e hāʻawi mai ʻo ia iā ʻoe i loko o ko mākou lima.”

⁴⁸ A i ka wā i kū aʻe ke kanaka Pilisetia, a hele, a hoʻokokoke e hālāwai me Dāvida, lalelale ihola ʻo Dāvida, a holo akula i ka poʻe kaua e hālāwai me ua kanaka Pilisetia lā.

⁴⁹ A hou ihola ʻo Dāvida i kona lima i loko o ka ʻaʻa, a lawe mai i kekahi ʻalā, a maʻa akula, a pā akula i ka lae o kā Pilisetia, a komo ihola ka ʻalā i loko o kona lae, hāʻule ihola ia ma ka honua i lalo ke alo.

⁵⁰ ¶ A lanakila ʻo Dāvida ma luna o ka Pilisetia me ka maʻa a me ka ʻalā, a pepehi akula i ka Pilisetia, a make ia; ʻaʻole naʻe he pahi kaua ma ka lima o Dāvida.

⁵¹ A holo akula ʻo Dāvida, a kū ma luna o ke kanaka Pilisetia, a lālau iho i kāna pahi kaua, a unuhi aʻe mai loko mai o kona wahī, a pepehi ihola, a ʻoki akula i kona poʻo me ia. A ʻike aʻela ko Pilisetia poʻe, ua make ko lākou kanaka koa, ʻauheʻe lākou.

⁵² Kū aʻela nā kānaka o kā ʻIseraʻela a me kā Iuda, hoʻōho akula, a alualu i ko Pilisetia, a hiki ma ke awāwa, a ma nā ʻīpuka o ʻEkerona; a hāʻule ihola nā mea ʻeha o nā Pilisetia ma ke ala o Saʻaraima, a hiki i Gata a me ʻEkerona.

⁵³ A hoʻi akula nā mamo a ʻIseraʻela mai ke alualu ʻana i ko Pilisetia, a hao aʻela nā halelewa o lākou.

⁵⁴ Lawe ʻo Dāvida i ke poʻo o ke kanaka Pilisetia, a hali akula ia mea ma Ierusalema, a waiho akula ia i kāna mea kaua ma kona halelewa.

⁵⁵ ¶ A ʻike akula ʻo Saula i ko Dāvida hele ʻana e hālāwai me ke kanaka Pilisetia, nīnau akula ʻo ia iā ʻAbenera, i ka luna o ke kaua, “E ʻAbenera ē, he keiki na wai kēia kanaka ʻōpiopio?” ʻĪ maila ʻo ʻAbenera, “Ma ke ola o kou ʻuhane, e ke aliʻi, ʻaʻole au i ʻike.”

⁵⁶ ʻĪ akula ke aliʻi, “E nīnau aku ʻoe i ka mea nāna kēia kanaka ʻōpiopio.”

⁵⁷ A i ko Dāvida hoʻi ʻana, mai ka pepehi ʻana i ke kanaka no ko Pilisetia, lawe akula ʻo ʻAbenera iā ia, a alakaʻi akula iā ia i mua o Saula, me ke poʻo o ke kanaka Pilisetia ma kona lima.

⁵⁸ Nīnau akula ʻo Saula, “E ke kanaka ʻōpiopio, he keiki ʻoe na wai?” ʻĪ maila ʻo Dāvida, “He keiki au na kāu kauā, na Iese no Betelehema.”