KA BUKE MUA A SAMUʻELA 16 - Ka Baibala Hemolele

1 ʻŌlelo mai ke Akua iā Samuʻela e hele i Betelehema e poni iā Dāvida i aliʻi no kā ʻIseraʻela. 14 Hiki mai ka ʻuhane ʻino ma luna o Saula. 19 Kiʻi aku iā Dāvida e hoʻokani i ka mea kani, i ola ia.

MOKUNA XVI.

¹ ¶ ʻŌlelo maila ʻo Iēhova iā Samuʻela, “Pehea lā ka lōʻihi o kou uē ʻana iā Saula; no ka mea, ua haʻalele au iā ia, ʻaʻole ʻo ia ke aliʻi ma luna o kā ʻIseraʻela? E hoʻopiha ʻoe i kou pepeiaohao i ka ʻaila, a e hele, e hoʻouna aku au iā ʻoe i o Iese lā no Betelehema; no ka mea, ua wae iho au i aliʻi noʻu i waena o kāna mau keiki.”

² ʻĪ akula ʻo Samuʻela, “Pehea lā wau e hele ai? Inā lohe ʻo Saula, e pepehi mai ia iaʻu.” ʻŌlelo maila ʻo Iēhova, “E lawe pū me ʻoe i bipi wahine, a e ʻī aku, ‘Ua hele mai nei au e kaumaha aku iā Iēhova.’

³ “A e kāhea aku ʻoe iā Iese e hele i ka mōhai, a e hōʻike aku au iā ʻoe i kāu mea e hana aku ai; a e poni iho ʻoe noʻu i ka mea aʻu e ʻōlelo aku ai iā ʻoe.”

⁴ A hana akula ʻo Samuʻela i kā Iēhova i ʻōlelo mai ai, a hele akula i Betelehema; a haʻalulu nā lunakahiko o ke kūlanakauhale i kona hiki ʻana mai, ʻī maila, “I hele mai nei ʻoe me ke aloha?”

⁵ ʻĪ akula ia, “Me ke aloha nō; i hele mai nei au e kaumaha aku iā Iēhova; e hoʻomaʻemaʻe ʻoukou iā ʻoukou iho, a e hele pū mai me aʻu i ka mōhai.” Hoʻomaʻemaʻe akula ʻo ia iā Iese a me kāna mau keiki, a kāhea akula ʻo ia iā lākou i ka mōhai.

⁶ ¶ A i ko lākou hiki ʻana mai, nānā aku ʻo ia iā ʻEliaba, ʻī ihola, “He ʻoiaʻiʻo i mua oʻu ka poni a Iēhova.”

⁷ A ʻōlelo maila ʻo Iēhova iā Samuʻela, “Mai nānā ʻoe i kona ʻano ma waho, ʻaʻole hoʻi i ka lōʻihi o kona kino; ua hōʻole aku au iā ia; no ka mea, ʻaʻole ma ka mea a ke kanaka i ʻike; ke nānā nei ke kanaka i nā helehelena; akā, ke nānā nei ʻo Iēhova i ka naʻau.”

⁸ A kāhea akula ʻo Iese iā ʻAbinadaba, a hōʻike iā ia i mua o Samuʻela. ʻĪ maila ia, “ʻAʻole i wae mai ʻo Iēhova i kēia.”

⁹ Hōʻike akula ʻo Iese iā Sama. ʻĪ maila ia, “ʻAʻole ʻo Iēhova i wae mai i kēia.”

¹⁰ Hōʻike akula ʻo Iese i kāna mau keiki kāne ʻehiku i mua o Samuʻela. ʻĪ maila ʻo Samuʻela iā Iese, “ʻAʻole ʻo Iēhova i wae mai iā lākou nei.”

¹¹ Nīnau akula ʻo Samuʻela iā Iese, “ʻO ka pau anei kēia o nā keiki?” ʻĪ maila ia, “ʻO ka pōkiʻi wale nō i koe, aia hoʻi, ke mālama nei ia i nā hipa.” ʻĪ akula ʻo Samuʻela iā Iese, “E kiʻi, a lawe mai iā ia; no ka mea, ʻaʻole kākou e noho iho a hiki mai ia.”

¹² Kiʻi akula ia, a lawe mai iā ia. He ʻehu, he nani kona mau maka, he maikaʻi ke nānā aku. ʻŌlelo mai ʻo Iēhova, “E kū aʻe ʻoe, a e poni iā ia; no ka mea, ʻo ia nō ia!”

¹³ A laila lālau akula ʻo Samuʻela i ka pepeiaohao ʻaila, a poni iā ia i waena o kona mau hoahānau; a hiki maila ka ʻUhane o Iēhova ma luna o Dāvida ia lā, a ma ia hope aku. Kū aʻela ʻo Samuʻela, a hele aku ma Rama.

¹⁴ ¶ A haʻalele ka ʻUhane o Iēhova iā Saula, a hikilele mai ka ʻuhane ʻino ma luna ona na Iēhova mai.

¹⁵ ʻĪ maila nā kauwā a Saula iā ia, “Aia hoʻi, ʻānō ua hikiwawe mai ka ʻuhane ʻino i ou lā na ke Akua mai.

¹⁶ “ʻĀnō, e ko mākou haku, e ʻōlelo mai i kāu mau kauā i mua ou, e ʻimi lākou i kanaka akamai i ka hoʻokani i ka lira; a i hiki mai ka ʻuhane ʻino ma luna ou na ke Akua mai; a laila ʻo ia e hoʻokani ai me kona lima, a ola ʻoe.”

¹⁷ ʻĪ akula ʻo Saula i kāna mau kauā, “ʻĀnō e ʻimi ʻoukou noʻu i kanaka akamai i ka hoʻokani, a e lawe mai i oʻu nei.”

¹⁸ A laila ʻōlelo mai kekahi o nā kauā, ʻī maila, “Aia hoʻi, ua ʻike au i kekahi keiki a Iese no Betelehema, ua akamai i ka hoʻokani, a ua koa loa, a he kanaka kaua, a me ke akamai i ka ʻōlelo, a he helehelena maikaʻi, a me ia nō ʻo Iēhova.”

¹⁹ Hoʻouna akula ʻo Saula i nā ʻelele i o Iese lā, ʻī akula, “E hoʻouna mai i oʻu nei iā Dāvida, i kāu keiki, aia nō ia me ka poʻe hipa.”

²⁰ Lawe aʻela ʻo Iese i ka hoki, me ka berena, a me ka hue waina, a me kahi keiki kao, a hoʻouna akula ma ka lima o Dāvida, kāna keiki, i o Saula lā.

²¹ Hele akula ʻo Dāvida i o Saula lā, a kū i mua ona; a ua nui kona aloha mai iā ia; a lilo ia i mea halihali i kāna mea kaua.

²² Hoʻouna akula ʻo Saula i o Iese lā, ʻī akula, “Ke noi aku nei au iā ʻoe, e ʻae mai ʻoe, e kū ʻo Dāvida i mua oʻu; no ka mea, ua loaʻa iā ia ke aloha i mua o koʻu maka.”

²³ A i ka manawa i hiki mai ai ka ʻuhane ʻino ma luna o Saula na ke Akua mai, lālau akula ʻo Dāvida i ka lira, a hoʻokani akula me kona lima; a ua ʻoluʻolu ʻo Saula, a ua ola hoʻi, a haʻalele ka ʻuhane ʻino iā ia.