KA BUKE MUA A SAMUʻELA 14 - Ka Baibala Hemolele

1 No ka hana a Ionatana, a me ka mea nāna i hali kāna mea kaua. 17 No ka hana a Saula.

MOKUNA XIV.

¹ ¶ A i kekahi lā, ʻōlelo akula ʻo Ionatana ke keiki a Saula i ke kanaka uʻi, nāna i hali kāna mea kaua, “ʻEā, e hele kāua i ka pā kaua o ko Pilisetia ma kēlā ʻaoʻao.” Akā, ʻaʻole ia i haʻi aku i kona makua kāne.

² Noho ihola ʻo Saula ma ka ʻaoʻao mamao loa o Gibea, ma lalo o ka lāʻau pomegerane ma Migerona; a ʻo nā kānaka me ia, ʻaono paha haneri lākou.

³ A ʻo ʻAhiia, ke keiki a ʻAhituba, a ke kaikuaʻana o ʻIkaboda, ke keiki a Pinehasa, ke keiki a ʻEli, ke kahuna a Iēhova ma Silo, ua hoʻokomo ʻia ka ʻēpoda. ʻAʻole i ʻike nā kānaka, ua hala ʻo Ionatana.

⁴ A ma ke ala a Ionatana i ʻimi ai e hele i ka poʻe koa o ko Pilisetia, he pōhaku ʻoi ma kēia ʻaoʻao, a he pōhaku ʻoi ma kēlā ʻaoʻao; ʻo Bozeza ka inoa o kekahi, a ʻo Sene ka inoa o kekahi.

⁵ A ʻo ka mea ʻoi o kekahi, ua kiʻekiʻe ia ma ke kūkulu ʻākau e kū pono ana i Mikemasa, a ʻo kekahi ma ke kūkulu hema e kū pono ana i Gibea.

⁶ ¶ ʻŌlelo akula ʻo Ionatana i ke kanaka uʻi, nāna i hali kāna mea kaua, “ʻEā, e hele kāua i kahi paʻa o ua poʻe lā i ʻoki poepoe ʻole ʻia; e hana mai paha ʻo Iēhova no kāua; no ka mea, ʻaʻohe mea keʻakeʻa iā Iēhova, ke hoʻōla ma ka poʻe nui, a ma ka poʻe ʻuʻuku.”

⁷ ʻĪ maila ka mea nāna i hali kāna mea kaua iā ia, “E hana ʻoe i ka mea a pau ma loko o kou naʻau; ō hele; aia hoʻi, ʻo wau pū kekahi me ʻoe e like me kou manaʻo.”

⁸ ʻŌlelo akula ʻo Ionatana, “Aia hoʻi, e hele kāua i ua poʻe kānaka lā, a e hōʻike iā kāua iho iā lākou.

⁹ “Inā e ʻōlelo mai lākou iā kāua pēnēia, ‘E noho mālie ʻolua a hiki aku mākou i o ʻolua lā’; a laila kū mālie kāua ma ko kāua wahi, ʻaʻole e piʻi aku i o lākou lā.

¹⁰ “Akā, i ʻōlelo mai lākou iā kāua pēnēia, ‘E piʻi mai ʻolua i o mākou nei’; a laila e piʻi aku kāua; no ka mea, ua hoʻolilo mai ʻo Iēhova iā lākou i ko kāua lima; a ʻo ia ka hōʻailona no kāua.”

¹¹ Hōʻike akula lāua iā lāua iho i ka poʻe koa o ko Pilisetia; ʻī aʻela ko Pilisetia, “E nānā i ka poʻe Hebera e hele mai ana mai loko mai o nā lua a lākou i peʻe ai.”

¹² ʻŌlelo maila nā kānaka o ka poʻe koa iā Ionatana, a me ka mea nāna i hali kāna mea kaua, ʻī maila, “E piʻi mai ʻolua i o mākou nei, a e hōʻike aku mākou iā ʻolua i kekahi mea.” ʻĪ akula Ionatana i ka mea nāna i hali kāna mea kaua, “E piʻi mai ʻoe ma hope oʻu; no ka mea, ua hoʻolilo mai ʻo Iēhova iā lākou i loko o ka lima o kā ʻIseraʻela.”

¹³ Piʻi aʻela ʻo Ionatana ma kona lima, a ma kona wāwae, a ʻo ka mea nāna i hali kāna mea kaua ma hope ona; a hāʻule lākou i mua o Ionatana; a ʻo ka mea nāna i hali kāna mea kaua pepehi akula ia ma hope ona.

¹⁴ A ʻo ka pepehi mua ʻana a Ionatana a me ka mea nāna i hali kāna mea kaua, he iwakālua paha kānaka ia, ma kahi kokoke, e like paha me ka hapalua o ka ʻeka ʻāina hoʻokahi.

¹⁵ He haʻalulu i waena o ka poʻe koa ma ke kula, a i waena o nā kānaka a pau; a ʻo ka poʻe kaua, a ʻo ka poʻe luku, haʻalulu ihola lākou, naue ka ʻāina; a he haʻalulu nui.

¹⁶ ¶ Nānā akula ka poʻe kiaʻi o Saula ma Gibea o Beniamina; aia hoʻi, ua heʻe akula ka poʻe nui, a holo lākou, a hele liʻiliʻi aku.

¹⁷ ʻŌlelo akula ʻo Saula i nā kānaka me ia, “E helu ʻānō, i ʻike kākou i ka mea i hele aʻe mai o kākou aku. “Helu akula lākou, aia hoʻi, ʻaʻole ʻo Ionatana, a me ka mea nāna i hali kāna mea kaua.

¹⁸ ʻĪ akula ʻo Saula iā ʻAhiia, E lawe mai ma ʻaneʻi i ka pahu o ke Akua; “no ka mea, i kēlā manawa, aia nō ka pahu o ke Akua me nā mamo a ʻIseraʻela.

¹⁹ A iā Saula i kamaʻilio ai me ke kahuna, ua nui loa ka haunaele i waena o ka poʻe koa o ko Pilisetia; ʻī akula ʻo Saula i ke kahuna, “E hoʻi hou mai i kou lima.”

²⁰ Hōʻuluʻulu ʻia aʻela ʻo Saula me nā kānaka a pau me ia, a hele aku i ke kaua; aia hoʻi, ua kūʻē ka pahi kaua a kēlā kanaka kēia kanaka i kona hoa, a ua nui loa ka piʻoloke.

²¹ A ʻo ka poʻe Hebera i noho ai me ko Pilisetia ma mua, a i hele pū ai me lākou i kahi i hoʻomoana ai, mai kēlā wahi kēia wahi, ʻo lākou kekahi i hui pū ai me kā ʻIseraʻela me Saula a me Ionatana.

²² A ʻo nā kānaka a pau o kā ʻIseraʻela i peʻe ai ma ka mauna ʻo ʻEperaima, iā lākou i lohe ai, ua holo ko Pilisetia, ʻo lākou nō hoʻi kekahi i hahai ma hope o lākou i ke kaua.

²³ A hoʻopakele mai ʻo Iēhova i kā ʻIseraʻela ia lā; a hele akula ke kaua ma Bete ʻAvena.

²⁴ ¶ A ua pilikia nā kānaka o kā ʻIseraʻela ia lā; no ka mea, ua hoʻohiki aku ʻo Saula i nā kānaka, ʻī akula, “Pōʻino ke kanaka, ke ʻai ia i ka ʻai a hiki i ke ahiahi, i hoʻopaʻi aku ai au i koʻu poʻe ʻenemi.” No laila, ʻaʻole i ʻai nā kānaka i ka ʻai.

²⁵ A hele nā kānaka a pau ma ka ulu lāʻau; a he meli ma luna o ka ʻāina.

²⁶ A hiki nā kānaka ma ka ulu lāʻau, aia hoʻi, e kahe ana ʻo ka meli, ʻaʻole ka lima o kekahi kanaka i hoʻopā aku i kona waha; no ka mea, makaʻu nā kānaka i ka hoʻohiki ʻana.

²⁷ Akā, ʻaʻole i lohe ʻo Ionatana i ke kauoha a kona makua kāne i nā kānaka i ka hoʻohiki ʻana; no laila, ʻō akula ia i ke koʻokoʻo ma kona lima, a hou ihola i loko o ka waihona meli, a hoʻopā kona lima i kona waha, a hoʻomālamalama ʻia kona mau maka.

²⁸ A laila, ʻōlelo maila kekahi o nā kānaka, ʻī maila, “Ua kauoha ikaika mai kou makua kāne i nā kānaka me ka hoʻohiki, ʻī maila, ‘Pōʻino ke kanaka, ke ʻai i ka ʻai i kēia lā.’” A ua nāwaliwali nā kānaka.

²⁹ ʻŌlelo akula ʻo Ionatana, ʻī akula, “Ua hoʻopilikia koʻu makua kāne i ka ʻāina; ke noi aku nei au iā ʻoukou, e nānā, ua hoʻomālamalama ʻia koʻu mau maka, no kuʻu hoʻāʻo ʻana i kauwahi ʻuʻuku o kēia meli.

³⁰ “ʻAʻole anei he nui aku, inā paha ua ʻai nui nā kānaka i kēia lā i ka mea o ko lākou poʻe ʻenemi i loaʻa ai iā lākou? ʻAʻole anei he nui aku ka luku i waena o ko Pilisetia?”

³¹ ¶ A luku akula lākou i ko Pilisetia ia lā, mai Mikemasa a hiki i ʻAialona; a ua nāwaliwali loa nā kānaka.

³² Lālau akula nā kanaka i ka waiwai pio, a lawe i nā hipa, a me nā bipi, a me nā bipi keiki, a pepehi ihola ma ka ʻāina; a ʻai ihola nā kānaka me ke koko.

³³ Haʻi akula lākou iā Saula, ʻī akula, “Aia hoʻi, ke hana hewa nei nā kānaka iā Iēhova, i kā lākou ʻai ʻana me ke koko!” ʻĪ maila kēlā, “Ua hana pono ʻole ʻoukou; e ʻolokaʻa mai i pōhaku nui i oʻu nei i kēia lā.”

³⁴ ʻŌlelo akula ʻo Saula, “E hele ʻoukou i waena o nā kānaka, e ʻī aku iā lākou, ‘E lawe mai i oʻu nei kēlā kanaka kēia kanaka i kāna bipi a me kāna hipa, a e pepehi ma ʻaneʻi, a ʻai iho; a mai hana hewa iā Iēhova i ka ʻai ʻana me ke koko.’” A lawe maila nā kānaka a pau, ʻo kēlā kanaka kēia kanaka i kāna bipi, me ia ia pō, a pepehi ihola ma laila.

³⁵ Hana akula ʻo Saula i kuahu no Iēhova, ʻo ia ke kuahu āna i hoʻomaka ai e hana no Iēhova.

³⁶ ¶ ʻĪ akula ʻo Saula, “E hahai aku kākou i ko Pilisetia i ka pō, a e luku aku iā lākou a hiki i ka mālamalama o ke ao, a mai waiho kākou i kekahi kanaka o lākou.” ʻĪ maila lākou, “E hana ʻoe i ka mea pono i kou maka.” ʻĪ maila ke kahuna, “E hoʻokoke mai nei kākou i ke Akua.”

³⁷ Nīnau akula ʻo Saula i ke Akua, “E hahai aku anei au i ko Pilisetia? E hoʻolilo mai anei ʻoe iā lākou i ka lima o kā ʻIseraʻela?” Akā, ʻaʻole ia i ʻōlelo mai iā ia ia lā.

³⁸ ʻŌlelo akula ʻo Saula, “E hoʻokokoke mai ʻoukou i ʻaneʻi, e nā alakaʻi o nā kānaka; i ʻike pono kākou i ka mea o kēia hewa i kēia lā.

³⁹ “No ka mea, ma ke ola o Iēhova nāna i hoʻōla i kā ʻIseraʻela, inā paha i loko o Ionatana kaʻu keiki kēia mea, e make ʻiʻo nō ia.” ʻAʻole kekahi kanaka i waena o kā ʻIseraʻela i ʻōlelo mai iā ia.

⁴⁰ ʻŌlelo akula ia i kā ʻIseraʻela a pau, “ʻO ʻoukou ma kekahi ʻaoʻao, a ʻo wau a me Ionatana kuʻu keiki, ma kekahi ʻaoʻao.” ʻĪ maila nā kānaka iā Saula, “E hana ʻoe i ka mea pono i kou maka.”

⁴¹ ʻŌlelo akula ʻo Saula iā Iēhova ke Akua o kā ʻIseraʻela, “E hōʻike mai i ka ʻoiaʻiʻo.” A ua lawe ʻia ʻo Saula a me Ionatana; a pakele nā kānaka.

⁴² ʻĪ akula ʻo Saula, “E hailona i waena o māua a me Ionatana kuʻu keiki.” A ua lawe ʻia ʻo Ionatana.

⁴³ ¶ A laila ʻī akula ʻo Saula iā Ionatana, “E haʻi mai ʻoe iaʻu i kāu mea i hana ai.” Haʻi akula ʻo Ionatana, ʻī akula, “Ua hoʻāʻo iho au i kahi meli ʻuʻuku wale nō me ke koʻokoʻo ma kuʻu lima, aia hoʻi, e make ana au!”

⁴⁴ ʻĪ akula ʻo Saula, “Pēlā ke Akua e hana mai ai, pēlā ʻiʻo hoʻi; no ka mea, e make ʻiʻo nō ʻoe, e Ionatana.”

⁴⁵ ʻŌlelo maila nā kānaka iā Saula, “E make anei ʻo Ionatana, nāna i hana kēia ola nui i waena o kā ʻIseraʻela? ʻAʻole loa, ma ke ola o Iēhova, ʻaʻole e hāʻule iho ma ka honua kekahi lauoho o kona poʻo; no ka mea, ua hana pū aku ia me ke Akua i kēia lā.” A hoʻopakele akula nā kānaka iā Ionatana, ʻaʻole ia i make.

⁴⁶ Haʻalele akula ʻo Saula i ka hahai ʻana i ko Pilisetia; a hoʻi akula ko Pilisetia i ko lākou wahi.

⁴⁷ ¶ A lawe aʻela ʻo Saula i ke aupuni o kā ʻIseraʻela, kaua akula i kona poʻe ʻenemi a pau, ma nā ʻaoʻao a pau i ko Moaba, a me nā mamo a ʻAmona, a me kā ʻEdoma, a me nā aliʻi o Zoba, a me ko Pilisetia, a ma nā wahi a pau āna i huli aʻe, ua lanakila ia.

⁴⁸ Hana ikaika akula ia, a luku akula i kā ʻAmeleka, a hoʻopakele i kā ʻIseraʻela i ka lima o ka poʻe i luku mai iā lākou.

⁴⁹ ¶ Eia nā keiki a Saula: ʻo Ionatana, ʻo Isui a me Melekisua; a ʻo ka inoa o kāna mau kaikamāhine ʻelua, ʻo Meraba ka inoa o ke kaikuaʻana, a ʻo Mikala ka inoa o ke kaikaina.

⁵⁰ A ʻo ʻAhinoama ka inoa o ka wahine a Saula, ke kaikamahine a ʻAhimaʻaza; a ʻo ka inoa o kona ʻalihikaua, ʻo ʻAbenera, ke keiki a Nera, kahi makua o Saula.

⁵¹ A ʻo Kisa ka makua kāne o Saula; a ʻo Nera ka makua kāne o ʻAbenera, ke keiki a ʻAbiʻela.

⁵² ¶ A ua nui ke kaua ʻana i ko Pilisetia i nā lā a pau o Saula; a ʻike akula ʻo Saula i ke kanaka ikaika, a i ke kanaka koʻakā, lawe akula kēlā iā ia nona.