KA BUKE MUA A SAMUʻELA 13 - Ka Baibala Hemolele

1 Wae akula ʻo Saula i ʻekolu tausani kānaka nona. 3 Luku akula ʻo Ionatana i ko Pilisetia. 5 Hoʻākoakoa ʻia aʻela nā kānaka ma Gilegala. 6 Hoʻomākaukau nui akula ko Pilisetia i ke kaua. 9 Kaumaha hewa akula ʻo Saula i ka mōhai. 11 Ka ʻōlelo a Samuʻela iā ia.

MOKUNA XIII.

¹ ¶ Hoʻokahi makahiki o ko Saula aliʻi ʻana; a pau nā makahiki ʻelua o kona aliʻi ʻana,

² Wae akula ʻo Saula nona i ʻekolu tausani kānaka o kā ʻIseraʻela; ʻelua tausani me Saula ma Mikemasa, a ma ka mauna ʻo Betela, a hoʻokahi tausani me Ionatana ma Gibea o Beniamina; a hoʻihoʻi akula ia i nā kānaka i koe i ko lākou halelewa iho.

³ A luku akula ʻo Ionatana i ka poʻe koa o ko Pilisetia ma Geba; a lohe ko Pilisetia. A puhi akula ʻo Saula i ka pū ma ka ʻāina a pau, i ka ʻī ʻana aʻe, “E hoʻolohe ka poʻe Hebera!”

⁴ A lohe aʻela kā ʻIseraʻela a pau i ka mea i ʻōlelo ʻia mai, ua pepehi ʻo Saula i ka poʻe koa o ko Pilisetia, a ua hoʻowahāwahā ʻia ʻo kā ʻIseraʻela e ko Pilisetia. A ua hōʻuluʻulu ʻia nā kānaka ma hope o Saula ma Gilegala.

⁵ ¶ Hoʻākoakoa aʻela ko Pilisetia e kaua aku i kā ʻIseraʻela, he kanakolu tausani hale kaʻa, ʻeono tausani hoʻoholo lio, a me nā kānaka e like me ke one ma kahakai he nui loa; a hele mai lākou, a hoʻomoana ma Mikemasa, ma ka hikina o Bete ʻAvena.

⁶ A ʻike akula nā kānaka o kā ʻIseraʻela i ko lākou pōpilikia; (no ka mea, ua pilikia nā kānaka,) peʻe akula nā kānaka i loko o nā ana, a ma loko o nā lāʻau kukū, a ma nā pōhaku, a me nā wahi kiʻekiʻe, a ma loko o nā lua.

⁷ A ʻo kekahi poʻe Hebera hele akula ma kēlā ʻaoʻao o Ioredane ma ka ʻāina ʻo Gada, a ʻo Gileada; a ma Gilegala ʻo Saula, a haʻalulu nā kānaka ma muli ona.

⁸ ¶ Noho ihola ia i nā lā ʻehiku e like me ka manawa a Samuʻela i ʻōlelo ai; ʻaʻole i hiki mai ʻo Samuʻela ma Gilegala; a ua hele liʻiliʻi nā kānaka mai ona aku lā.

⁹ ʻŌlelo akula ʻo Saula, “E lawe mai iaʻu i mōhai kuni, a me nā mōhai hoʻomalu.” Kaumaha akula ia i ka mōhai kuni.

¹⁰ A i ka manawa i pau ai kāna kaumaha ʻana aku i ka mōhai kuni, aia hoʻi, hiki maila ʻo Samuʻela; hele akula ʻo Saula e hālāwai me ia, e hoʻomaikaʻi aku iā ia.

¹¹ Nīnau akula ʻo Samuʻela, “He aha kāu i hana ai?” ʻĪ maila ʻo Saula, “No kaʻu ʻike ʻana i nā kānaka e hele liʻiliʻi ana mai oʻu aku nei, a no kou hiki ʻole mai i nā lā i ʻōlelo ʻia ai, a no ka hoʻākoakoa ʻana o ko Pilisetia ma Mikemasa;

¹² no laila, ʻī ihola au, ‘E iho mai auaneʻi ko Pilisetia ma luna oʻu ma Gilegala, ʻaʻole au i noi aku iā Iēhova’; no ia mea, hoʻoikaika ihola au iaʻu iho, a kaumaha akula i ka mōhai kuni.”

¹³ ʻŌlelo akula ʻo Samuʻela iā Saula, “Ua hana naʻaupō ʻoe, ʻaʻole ʻoe i mālama i ke kauoha a Iēhova kou Akua, āna i kauoha mai ai iā ʻoe; i hoʻokūpaʻa mau loa ai ʻo Iēhova i kou aupuni ma luna o kā ʻIseraʻela.

¹⁴ “ʻĀnō hoʻi, ʻaʻole e mau ana kou aupuni; ua ʻimi mai ʻo Iēhova i kanaka nona e like me kona naʻau iho, a ua hoʻonoho mai ʻo Iēhova iā ia i luna no kona poʻe kānaka, no kou mālama ʻole i ka mea a Iēhova i kauoha mai ai iā ʻoe.”

¹⁵ ¶ Kū aʻela ʻo Samuʻela, a piʻi akula mai Gilegala aku a i Gibea o Beniamina. A helu akula ʻo Saula i nā kānaka me ia, ʻaono paha haneri kānaka.

¹⁶ A ʻo Saula a me Ionatana kāna keiki, a ʻo nā kānaka me lāua, noho ihola ma Gibea o Beniamina; akā, hoʻomoana ihola ko Pilisetia ma Mikemasa.

¹⁷ Hele maila ka poʻe luku, mai ka poʻe koa o ko Pilisetia mai, ʻekolu poʻe; huli aʻela kekahi poʻe ma ke ala o ʻOpera ma ka ʻāina ʻo Suala.

¹⁸ Huli aʻela kekahi poʻe ma ke ala o Bete Horona; a huli aʻe kekahi poʻe ma ke ala o ka mokuna e kū pono ana i ke awāwa ʻo Zeboima, ma ka wao nahele.

¹⁹ ¶ ʻAʻole nō i loaʻa ka ʻāmara ma ka ʻāina a pau o kā ʻIseraʻela; no ka mea, ʻī aʻela ko Pilisetia, “O hana auaneʻi ka poʻe Hebera i ka pahi kaua, a i ka ihe paha na lākou.”

²⁰ Akā, hele nō kā ʻIseraʻela a pau i ko Pilisetia e hana ai i kāna ʻōʻō palau, a me kāna hō, a me kāna koʻi lipi, a me kāna ʻōʻō.

²¹ He apuapu naʻe iā lākou no ka ʻōʻō palau, a no nā hō, a no nā ʻō manamana, a no nā koʻi lipi, a no ka hoʻokala i nā kui.

²² A i ka lā i kāua ai, ʻaʻole he pahi kaua, ʻaʻole hoʻi he ihe ma ka lima o nā kānaka me Saula, a me Ionatana; akā, ua loaʻa iā Saula a me Ionatana kāna keiki.

²³ A hele akula ka poʻe koa o ko Pilisetia i ke ala ʻololī ʻo Mikemasa.