KA BUKE MUA A SAMUʻELA 12 - Ka Baibala Hemolele

1 Ka ʻōlelo a Samuʻela i kā ʻIseraʻela a pau. 6 Hōʻike aku ia i ko lākou hewa. 16 Kāhea akula ia iā Iēhova e hāʻawi mai i ka hekili a me ka ua. 20 Kauoha akula iā lākou e mālama iā Iēhova.

MOKUNA XII.

¹ ¶ ʻŌlelo akula ʻo Samuʻela i kā ʻIseraʻela a pau, “Aia hoʻi, ua hoʻolohe au i ko ʻoukou leo ma nā mea a pau a ʻoukou i ʻōlelo mai ai iaʻu, a ua hoʻonoho aku au i aliʻi ma luna o ʻoukou.

² “ʻĀnō hoʻi, ke hele nei ke aliʻi i mua o ʻoukou; a ua ʻelemakule wau, ua poʻo hina; a eia hoʻi kaʻu mau keiki me ʻoukou; a ua hele au i mua o ʻoukou mai kuʻu wā kamaliʻi a hiki i kēia lā.

³ “Eia hoʻi wau; e hōʻike mai ʻoukou iaʻu i mua o Iēhova, a i mua hoʻi o kona mea i poni ʻia; ʻo ka bipi a wai kaʻu i lawe ai? A ʻo ka hoki a wai kaʻu i kāʻili ai? Kā wai lā kaʻu i ʻālunu ai? ʻO wai lā kaʻu i hoʻokaumaha ai? Ma ka lima o wai kaʻu i lawe ai i ke kīpē i hūnā ai koʻu maka iā ia? A e hoʻihoʻi aku au ia mea iā ʻoukou.”

⁴ ʻĪ maila lākou, “ʻAʻole ʻoe i ʻālunu i kā mākou, ʻaʻole hoʻi i hoʻokaumaha mai iā mākou, ʻaʻole ʻoe i lawe i kekahi mea ma ka lima o kekahi kanaka.”

⁵ ʻĪ akula ʻo ia iā lākou, “ʻO Iēhova ke hōʻike iā ʻoukou, a ʻo kona mea i poni ʻia ke hōʻike i kēia lā, ʻaʻole i loaʻa iā ʻoukou kekahi mea ma kuʻu lima.” ʻĪ maila lākou, “ʻO ia ke hōʻike.”

⁶ ¶ ʻŌlelo akula ʻo Samuʻela i nā kānaka, “ʻO Iēhova nō ka mea nāna i hoʻonoho mai ʻo Mose a me ʻAʻarona, a nāna hoʻi i lawe mai ko ʻoukou poʻe kūpuna mai ka ʻāina ʻo ʻAigupita mai.

⁷ “No ia hoʻi, e kū mālie ʻoukou, a e aʻo aku au iā ʻoukou i mua o Iēhova i nā mea pono a pau a Iēhova i hana mai ai iā ʻoukou a me ko ʻoukou poʻe kūpuna.

⁸ “I ka manawa a Iakoba i hele ai ma ʻAigupita, a i uē ai ko ʻoukou poʻe kūpuna iā Iēhova, a laila hoʻouna maila ʻo Iēhova iā Mose a me ʻAʻarona, a na lāua i alakaʻi ko ʻoukou mau kūpuna mai ʻAigupita mai, a hoʻonoho iā lākou ma kēia wahi.

⁹ “A iā lākou i hoʻopoina ai iā Iēhova ko lākou Akua, kūʻai akula ia iā lākou i ka lima o Sisera, i ka luna o ka poʻe kaua no Hazora, a i ka lima o ko Pilisetia, a i ka lima o ke aliʻi o Moaba, a kaua mai lākou iā lākou.

¹⁰ “Auē aku lākou iā Iēhova, ʻī akula, ‘Ua hana hewa mākou; no ka mea, ua haʻalele mākou iā Iēhova, a ua mālama mākou iā Baʻalima a me ʻAsetarota; akā, ʻānō e hoʻopakele mai ʻoe iā mākou i ka lima o ko mākou poʻe ʻenemi, a e mālama mākou iā ʻoe.’

¹¹ “A hoʻouna mai ʻo Iēhova iā Ierubaʻala, a me Bedana, a me Iepeta, a me Samuʻela, a hoʻopakele mai iā ʻoukou i ka lima o ko ʻoukou poʻe ʻenemi ma nā ʻaoʻao a pau, a noho maluhia ihola ʻoukou.

¹² “A ʻike ʻoukou iā Nahasa, ke aliʻi o nā mamo a ʻAmona e hele mai ana e kūʻē iā ʻoukou, ʻī maila ʻoukou iaʻu, ‘ʻAʻole; akā e hoʻonoho ʻia ke aliʻi ma luna o mākou’; i ka manawa o ko Iēhova ko ʻoukou Akua aliʻi ʻana ma luna o ʻoukou.

¹³ “No ia mea, e nānā ʻoukou i ke aliʻi, i ka mea a ʻoukou i wae ai, a me ka mea a ʻoukou i makemake ai; aia hoʻi, ua hoʻonoho mai ʻo Iēhova i aliʻi ma luna o ʻoukou.

¹⁴ “Inā paha e makaʻu ʻoukou iā Iēhova, a e mālama iā ia, a e hoʻolohe i kona leo, ʻaʻole hoʻi e hōʻole i ke kauoha a Iēhova; a laila ʻoukou, a me ke aliʻi e aliʻi ana ma luna o ʻoukou e hahai ma muli o Iēhova ko ʻoukou Akua.

¹⁵ “Akā, i hoʻolohe ʻole ʻoukou i ka leo o Iēhova, i hōʻole hoʻi i ke kauoha a Iēhova; a laila e kūʻē mai ka lima o Iēhova iā ʻoukou, e like me ke kūʻē i ko ʻoukou poʻe kūpuna.

¹⁶ “No ia hoʻi, e kū mālie ʻoukou, a ʻike i kēia mea nui a Iēhova e hana mai ai i mua o ko ʻoukou maka.

¹⁷ “ʻAʻole anei kēia ka manawa e ʻoki ai i ka palaoa? E kāhea aku au iā Iēhova, a e hāʻawi mai ʻo ia i ka hekili a me ka ua, i manaʻo ai ʻoukou, a i ʻike ai hoʻi, ua nui ko ʻoukou hewa i hana ai ʻoukou i mua o Iēhova, i ko ʻoukou noi ʻana i aliʻi no ʻoukou.”

¹⁸ Kāhea akula ʻo Samuʻela iā Iēhova, a hāʻawi mai ʻo Iēhova i ka hekili a me ka ua ia lā; a makaʻu nui ihola nā kānaka a pau iā Iēhova a iā Samuʻela.

¹⁹ ¶ ʻŌlelo maila nā kānaka a pau iā Samuʻela, “E pule ʻoe iā Iēhova i kou Akua no kāu poʻe kauā, i make ʻole ai mākou; no ka mea, me nā hewa a pau a mākou, ua pākuʻi mākou i kēia hewa hou, ʻo ke noi ʻana i aliʻi no mākou.”

²⁰ ʻŌlelo akula ʻo Samuʻela i nā kānaka, “Mai makaʻu; ua hana ʻoukou i kēia hewa a pau; akā, mai huli aʻe ʻoukou mai ka hahai ʻana iā Iēhova, e mālama ʻoukou iā Iēhova me ko ʻoukou naʻau a pau.

²¹ “Mai huli aʻe ʻoukou ma muli o nā mea lapuwale, nā mea hiki ʻole ke kōkua mai; no ka mea, ua lapuwale lākou.

²² “No ka mea, ʻaʻole e haʻalele mai ʻo Iēhova i kona poʻe kānaka no kona inoa nui; no ka mea, ua ʻoluʻolu ʻo Iēhova e hoʻolilo iā ʻoukou i poʻe kānaka nona.

²³ “ʻO wau hoʻi, ʻaʻole loa wau e hana hewa iā Iēhova ma ka hoʻōki ʻana i ka pule no ʻoukou; akā, e aʻo aku au iā ʻoukou i ka ʻaoʻao maikaʻi a me ka pono.

²⁴ “E makaʻu naʻe ʻoukou iā Iēhova, a e hoʻokauā aku nāna me ka ʻoiaʻiʻo me ko ʻoukou naʻau a pau; no ka mea, e hoʻomanaʻo ʻoukou i nā mea nui āna e hana mai ai no ʻoukou.

²⁵ “Akā, i hana hewa mau ʻoukou, e hoʻopau ʻia auaneʻi ʻoukou, a me ko ʻoukou aliʻi.”