KA BUKE MUA A SAMUʻELA 11 - Ka Baibala Hemolele

1 Kaua mai ʻo Nahasa i ko Iabesa Gileada. 4 Hoʻopakele ʻo Saula iā lākou. 12 Hoʻoaliʻi akula nā kānaka iā Saula ma Gilegala.

MOKUNA XI.

¹ ¶ A hele mai ʻo Nahasa no kā ʻAmona, a hoʻomoana kūʻē iā Iabesa Gileada; a ʻōlelo maila nā kānaka a pau o Iabesa iā Nahasa, “E hana ʻoe i kuʻikahi me mākou, a laila e hoʻokauā aku mākou nāu.”

² ʻĪ maila ʻo Nahasa no kā ʻAmona iā lākou, “Penei kaʻu e hana ai me ʻoukou, e pōʻalo aku au i nā maka ʻākau a pau o ʻoukou, a kau aku ia i mea hōʻino ma luna o kā ʻIseraʻela a pau.”

³ ʻŌlelo akula nā lunakahiko o Iabesa iā ia, “E ahonui mai ʻoe iā mākou i na lā ʻehiku i hoʻouna aku ai mākou i nā ʻelele ma nā wahi a pau o kā ʻIseraʻela; inā paha ʻaʻohe mea nāna mākou e hoʻopakele, a laila e hele mākou i ou lā.”

⁴ A hele mai nā ʻelele ma Gibea no Saula, a haʻi mai i nā ʻōlelo ma loko o ka pepeiao o nā kānaka; a hoʻokiʻekiʻe aʻela nā kānaka a pau i ko lākou leo i luna, a uē akula.

⁵ Aia hoʻi, hele maila ʻo Saula ma hope o nā bipi mai ke kula mai, nīnau maila ʻo Saula, “No ke aha lā i uē ai nā kānaka?” A haʻi mai lākou iā ia i nā mea no nā kānaka o Iabesa.

⁶ ¶ A hiki mai ka ʻUhane o ke Akua ma luna o Saula, a wela nui kona inaina.

⁷ Lawe aʻela ʻo Saula i mau bipi kāne kaulua, a ʻokiʻoki liʻiliʻi iā lāua, a hoʻouna akula ma nā lima o ka poʻe ʻelele i nā mokuna a pau o kā ʻIseraʻela, i ka ʻī ʻana aku, “Pēlā e hana ʻia ai nā bipi a ka mea hele ʻole ma muli o Saula a ma muli o Samuʻela.” A kau maila ka makaʻu o Iēhova i nā kānaka, a hele mai lākou me ka manaʻo lōkahi.

⁸ A helu akula ʻo ia iā lākou ma Bezeka, ʻakolu haneri tausani o nā mamo a ʻIseraʻela, a he kanakolu tausani kānaka o kā Iuda.

⁹ ʻĪ akula lākou i nā ʻelele i hele mai. “Pēnēia ʻoukou e ʻōlelo aku ai i nā kānaka o Iabesa Gileada, ‘ʻApōpō a wela mai ka lā, e hoʻopakele ʻia ʻoukou.’” A hoʻi akula nā ʻelele, a hōʻike akula i nā kānaka o Iabesa; ʻoliʻoli ihola lākou.

¹⁰ No ia mea, ʻī akula nā kānaka o Iabesa, “ʻApōpō e hele aku mākou i waho i o ʻoukou lā, a e hana mai ʻoukou iā mākou i nā mea a pau a ʻoukou e makemake ai.”

¹¹ A i ka lā ʻapōpō, hoʻonoho ihola ʻo Saula i nā kānaka i ʻekolu poʻe; a hele lākou i waenakonu o ka poʻe kaua i ka moku ʻana o ka pawa o ke ao, a pepehi ihola i kā ʻAmona a hiki i ka wela o ka lā; a ʻo ke koena, hele liʻiliʻi akula lākou, ʻaʻole ʻelua kānaka ma kahi hoʻokahi.

¹² ¶ Nīnau maila nā kānaka iā Samuʻela, “ʻO wai kai ʻōlelo, ‘E aliʻi anei ʻo Saula ma luna o kākou?’ E lawe mai i ua poʻe kānaka lā, a e pepehi mākou iā lākou.”

¹³ ʻŌlelo maila ʻo Saula, “ʻAʻole e pepehi ʻia kekahi kanaka i kēia lā; no ka mea, ua hana mai ʻo Iēhova i ke ola i loko o kā ʻIseraʻela i kēia lā.”

¹⁴ ¶ ʻŌlelo akula ʻo Samuʻela i nā kānaka, “Inā kākou e hele ma Gilegala, a e hoʻokūpaʻa i laila i ke aupuni.”

¹⁵ A hele nā kānaka a pau ma Gilegala; a hoʻoaliʻi akula lākou iā Saula i laila i mua o Iēhova ma Gilegala; a i laila lākou i kaumaha aku ai i nā mōhai hoʻomalu i mua o Iēhova; a hauʻoli nui ihola ʻo Saula, a me nā kānaka a pau o kā ʻIseraʻela i laila.