KA BUKE MUA A SAMUʻELA 10 - Ka Baibala Hemolele

1 Poni akula ʻo Samuʻela iā Saula; a ʻōlelo akula iā ia. 17 Hōʻuluʻulu aʻela ʻo Samuʻela i nā kānaka ma Mizepa, a koho aku iā Saula i aliʻi.

MOKUNA X.

¹ ¶ Lawe akula ʻo Samuʻela i ka hue ʻaila, a ninini ihola ma luna o kona poʻo, a honi akula iā ia, ʻī akula, “ʻAʻole anei kēia no ka poni ʻana mai o Iēhova iā ʻoe i aliʻi ma luna o kona hoʻoilina?

² “A hala ʻoe mai oʻu aku nei i kēia lā, a laila e loaʻa nō iā ʻoe nā kānaka ʻelua ma ka hale lua o Rāhela, ma ka mokuna o kā Beniamina, ma Zeleza; a e ʻī mai lāua iā ʻoe, ‘Ua loaʻa nā hoki āu i hele ai e ʻimi; aia hoʻi, ua pau ka manaʻo ʻana o kou makua kāne i nā hoki, a ua kaumaha ʻo ia iā ʻolua, i ka ʻī ʻana aʻe, “He aha kaʻu e hana ai no kuʻu keiki?”’

³ “A ma laila aku ʻoe e hele ai, a hiki ma ka lāʻau ʻoka o Tabora, a e hālāwai mai me ʻoe i laila nā kānaka ʻekolu e piʻi ana i ke Akua ma Betela; ʻo kekahi e hali ana i nā kao keiki ʻekolu, a ʻo kekahi e hali ana i nā paʻi palaoa ʻekolu, a ʻo kekahi e hali ana i ka hue waina.

⁴ “A e aloha mai lākou iā ʻoe, a e hāʻawi mai iā ʻoe i ʻelua paʻi berena; nāu nō ia e lawe mai ko lākou lima mai.

⁵ “Ma hope iho e hiki aku ʻoe i ka puʻu o ke Akua, ma laila ka noho ʻana o ka poʻe koa o ko Pilisetia; a hiki aku ʻoe i laila i ke kūlanakauhale, e hālāwai ʻoe me ka poʻe kāula e iho ana ma kahi kiʻekiʻe mai, me ka mea kani, a me ke kuolokani, a me ka mea hōkio, a me ka mea ʻūkēkē i mua o lākou; a e wānana lākou.

⁶ “A e hiki mai ka ʻUhane o Iēhova ma luna ou, a e wānana pū ʻoe me lākou, a e lilo ʻoe i kanaka ʻokoʻa.

⁷ “Aia hiki mai kēia mau hōʻailona iā ʻoe, e hana ʻoe i ka mea i loaʻa i kou lima; no ka mea, me ʻoe nō ke Akua.

⁸ “A e iho ʻē ʻoe ma mua oʻu i Gilegala; aia hoʻi e iho ana au i ou lā, e kaumaha aku i nā mōhai kuni, a e kaumaha aku hoʻi i nā mōhai hoʻomalu; i nā lā ʻehiku ʻoe e kali ai, a hiki aku au i ou lā, a e hōʻike aku iā ʻoe i ka mea āu e hana aku ai.”

⁹ ¶ A i ka wā i huli aʻe ia e hele aku mai o Samuʻela aku, hāʻawi mai ke Akua i naʻau ʻokoʻa nona; a hiki ʻiʻo mai ua mau hōʻailona lā a pau ia lā.

¹⁰ A hiki aku lāua ma laila ma ka puʻu, aia hoʻi, he poʻe kāula i hālāwai mai me ia; a hiki mai ka ʻUhane o ke Akua ma luna ona, a wānana pū akula ia me lākou.

¹¹ A ʻo nā mea a pau i ʻike iā ia i ka manawa ma mua, ʻike lākou, aia hoʻi, e wānana ana ʻo ia me ka poʻe kāula, ʻī aʻela kekahi kanaka i kona hoalauna, “He aha kēia i hiki mai ai i ke keiki a Kisa? ʻO Saula anei kekahi me ka poʻe kāula?”

¹² ʻŌlelo mai kekahi no laila mai, ʻī maila, “ʻO wai ko lākou makua kāne?” No ia mea ua maʻa ia ʻōlelo, “ʻO Saula anei kekahi me ka poʻe kāula?”

¹³ A pau kāna wānana ʻana, hele mai ia i kahi kiʻekiʻe.

¹⁴ ¶ Nīnau maila kekahi makua kāne o Saula iā ia, a i kāna kauā, “I hea lā ʻolua i hele ai?” ʻĪ akula kēlā, “I kahi e ʻimi ai i nā hoki; a ʻike māua, ʻaʻole, hele māua i o Samuʻela lā.”

¹⁵ ʻĪ maila kahi makua kāne o Saula, “Ke noi aku nei au iā ʻoe, e haʻi mai iaʻu, he aha ka mea a Samuʻela i ʻōlelo mai ai iā ʻolua?”

¹⁶ ʻĪ akula ʻo Saula i kekahi makua kāne ona, “Ua haʻi maopopo mai ia iā māua i ka loaʻa ʻana o nā hoki.” Akā, ʻo ka mea no ke aupuni a Samuʻela i ʻōlelo ai, ʻaʻole ia i haʻi aku iā ia.

¹⁷ ¶ Hōʻuluʻulu aʻela ʻo Samuʻela i nā kānaka i o Iēhova lā ma Mizepa.

¹⁸ ʻĪ akula i nā mamo a ʻIseraʻela, “Pēnēia ka ʻōlelo a Iēhova ke Akua o kā ʻIseraʻela, ‘Ua lawe mai nei au i kā ʻIseraʻela mai ʻAigupita mai, a ua hoʻopakele iā ʻoukou i ka lima o ko ʻAigupita, a i ka lima o ko nā aupuni a pau, a me ka poʻe i hoʻoluhi iā ʻoukou.’

¹⁹ “A ua hoʻowahāwahā ʻoukou i ko ʻoukou Akua i kēia lā, ʻo ia kai hoʻōla iā ʻoukou i nā mea ʻino a pau a me nā pōpilikia o ʻoukou; ua ʻī aku ʻoukou iā ia, ‘E hoʻonoho i aliʻi ma luna o mākou.’ No ia mea, e hōʻike ʻoukou iā ʻoukou iho i mua o Iēhova ma ko ʻoukou mau hanauna, a ma ko ʻoukou mau tausani.”

²⁰ A hoʻokokoke mai ʻo Samuʻela i nā hanauna kanaka a pau o kā ʻIseraʻela, ua lawe ʻia ka hanauna o kā Beniamina.

²¹ A hoʻokokoke mai ia i ka hanauna o kā Beniamina ma ko lākou mau ʻohana, ua lawe ʻia ka ʻohana o Materi, a ua lawe ʻia ʻo Saula ke keiki a Kisa; a ʻimi lākou iā ia, ʻaʻole i loaʻa.

²² No ia mea, nīnau hou lākou iā Iēhova, “E hiki mai auaneʻi ua kanaka lā ma ʻaneʻi?” ʻĪ maila ʻo Iēhova, “Aiʻa, ua peʻe ʻo ia ma loko o nā ukana.”

²³ Holo lākou a lawe mai iā ia mai laila mai; a i ke kū ʻana ʻo ia i waena o nā kānaka, ua ʻoi kona kiʻekiʻe ma mua o ko nā kānaka, a pau, mai kona poʻohiwi aku, a hala loa i luna.

²⁴ ʻŌlelo akula ʻo Samuʻela i nā kānaka a pau, “E nānā ʻoukou iā ia nei, i ka mea a Iēhova i wae ai, ʻaʻohe kona like i waena o nā kānaka a pau.” Hoʻōho akula nā kānaka a pau, ʻī akula, “E ola ke aliʻi!”

²⁵ A laila haʻi akula ʻo Samuʻela i ke ʻano o ke aupuni, a kākau i loko o ka buke, a waiho ia i mua o Iēhova. A hoʻihoʻi akula ʻo Samuʻela i nā kānaka a pau, i kēlā mea i kēia mea i kona hale iho.

²⁶ A hoʻi akula ʻo Saula i kona wahi ma Gibea; a hele pū me ia kekahi poʻe kānaka, na ke Akua i hoʻopā mai ko kākou naʻau.

²⁷ Akā, ʻōlelo maila ka poʻe hewa, “Pehea lā e hoʻōla mai ai kēia kanaka iā kākou?” A hoʻowahāwahā lākou iā ia, ʻaʻole i lawe mai lākou i nā haʻawina iā ia; akā, noho mālie nō ia.