KA BUKE MUA A SAMUʻELA 1 - Ka Baibala Hemolele

1 No ʻElekana a me kāna mau wāhine. 9 Pule akula ʻo Hana i ke Akua, i keiki kāne nāna. 21 No ka hana ʻana a Samuʻela, a no ka hoʻolilo iā ia no ke Akua.

MOKUNA I.

¹ ¶ ʻO kekahi kanaka no Ramataima Zopima, no ka mauna ʻo ʻEperaima, ʻo ʻElekana kona inoa, ke keiki a Ierohama, ke keiki a ʻElihu, ke keiki a Tohu, ke keiki a Zupa, no ʻEperata.

² ʻElua āna wāhine; ʻo Hana ka inoa o kekahi, a ʻo Penina ka inoa o kekahi; a he mau keiki na Penina; akā, ʻo Hana ʻaʻohe āna keiki.

³ I kēlā makahiki kēia makahiki, hele aku ua kanaka lā mai kona kūlanakauhale aku e hoʻomana, a e kaumaha aku iā Iēhova o nā lehulehu ma Silo; ma laila nā keiki ʻelua a ʻEli, ʻo Hopeni lāua ʻo Pinehasa, nā kāhuna a Iēhova.

⁴ A hiki mai ka lā a ʻElekana i kaumaha aku ai, hāʻawi akula ia i nā haʻawina na Penina, na kāna wahine, a na kāna mau keiki kāne a pau, a na kāna mau kaikamāhine.

⁵ A hāʻawi pāpālua akula ia na Hana; no ka mea, ua aloha aku ʻo ia iā Hana; akā, ua pā ia iā Iēhova.

⁶ Hoʻonāukiuki akula kona ʻenemi iā ia, i mea e hoʻonāulu aku ai iā ia; no ka mea, ua hoʻopaʻa ʻo Iēhova i kona ʻōpū.

⁷ Pēlā kāna i hana ai mai kēlā makahiki a kēia makahiki, iā ia i piʻi aku ai i ka hale o Iēhova, pēlā nō ia i hoʻonāukiuki aku ai iā ia, a uē ihola ʻo Hana, ʻaʻole ia i ʻai.

⁸ A laila nīnau akula ʻo ʻElekana kāna kāne iā ia, “E Hana, he aha kāu i uē ai? No ke aha lā ʻaʻole ʻoe i ʻai? He aha ka mea i kaumaha ai kou naʻau? ʻAʻole anei e ʻoi aku koʻu pono iā ʻoe i mua o nā keiki kāne he ʻumi?”

⁹ ¶ Kū aʻela ʻo Hana ma hope o kā lākou ʻai ʻana a me kā lākou inu ʻana ma Silo; a e noho ana ʻo ʻEli ke kahuna ma luna o ka noho ma ka lapauila o ka hale o Iēhova.

¹⁰ Ua kaumaha kona naʻau, pule akula ʻo ia iā Iēhova, a uē nui ihola.

¹¹ Hoʻohiki ihola ia i ka hoʻohiki ʻana, ʻī akula, “E Iēhova o nā lehulehu, a i ʻike pono mai ʻoe i ka ʻehaʻeha o kāu kauā wahine, a i hoʻomanaʻo mai iaʻu, ʻaʻole i hoʻopoina i kāu kauā wahine, a i hāʻawi mai hoʻi i keiki kāne no kāu kauā wahine; a laila e hoʻolilo au iā ia no Iēhova i nā lā a pau o kona ola ʻana; ʻaʻole e hoʻopili ʻia mai ka pahi āmū ma kona poʻo.”

¹² ¶ A i kāna pule nui ʻana i mua o Iēhova, nānā akula ʻo ʻEli i kona waha.

¹³ Ma loko o kona naʻau kā Hana ʻōlelo ʻana; ʻakoʻako wale nō kona lehelehe, ʻaʻole i lohe ʻia kona leo; no laila manaʻo ihola ʻo ʻEli, ua ʻona ia.

¹⁴ Nīnau akula ʻo ʻEli iā ia, “Pehea lā ka lōʻihi o kou ʻona ʻana? E hoʻolei ʻoe i kou waina mai ou aku lā!”

¹⁵ ʻŌlelo akula ʻo Hana, ʻī akula, “ʻAʻole, e kuʻu haku; he wahine ʻehaʻeha wau ma ka naʻau; ʻaʻole au i inu i ka waina, ʻaʻole i ka mea ʻona; akā, ua ninini aku au i kuʻu ʻuhane i mua o Iēhova.

¹⁶ “Mai manaʻo mai ʻoe i kāu kauā wahine, he kaikamahine na ka hewa; no ka mea, no ka nui o kuʻu ʻehaʻeha ʻana, a me ke kaumaha, ua ʻōlelo iho nei au a kēia wā.”

¹⁷ ʻŌlelo akula ʻo ʻEli, ʻī akula, “Ō hele ʻoe me ke aloha; a na ke Akua o kā ʻIseraʻela e hoʻokō mai kāu mea āu i noi aku ai iā ia.”

¹⁸ ʻĪ maila ia, “I loaʻa i kāu kauā wahine ke aloha i mua o kou maka.” A hele akula ua wahine lā ma kona wahi i hele ai, a ʻai ihola, ʻaʻole minamina hou kona maka.

¹⁹ ¶ Ala aʻela lākou i kakahiaka nui, a hoʻomana akula i mua o Iēhova, a hoʻi akula a hiki i ko lākou hale ma Rama; a ʻike ihola ʻo ʻElekana iā Hana i kāna wahine; a hoʻomanaʻo maila ʻo Iēhova iā ia.

²⁰ A hiki mai ka manawa ma hope o kā Hana hāpai ʻana, hānau maila ia, he keiki kāne, a kapa akula ia i kona inoa ʻo Samuʻela; “No ka mea, ua noi aku au iā ia iā Iēhova.”

²¹ ¶ A ʻo ua kanaka lā, ʻo ʻElekana, a me ko kona hale a pau, hele akula e kaumaha aku iā Iēhova i ka mōhai makahiki, a me kona hoʻohiki ʻana.

²² Akā, ʻaʻole hiki aku ʻo Hana; no ka mea, ʻōlelo akula ia i kāna kāne, “Aia e ukuhi ʻia aku ai ke keiki, a laila lawe aku au iā ia, e ʻikea ia ma ke alo o Iēhova, a e noho mau loa ia i laila.”

²³ ʻĪ maila ʻo ʻElekana kāna kāne iā ia, “E hana ʻoe i ka pono i kou manaʻo; e noho, a hiki mai ka manawa e ukuhi aku ai ʻoe iā ia; e hoʻokō mai ʻo Iēhova i kāna ʻōlelo.” Noho ihola ka wahine e hānai i ke keiki, a hiki i ka wā e ukuhi aku ai iā ia.

²⁴ A i ka wā i ukuhi aku ai ia i ke keiki, lawe akula ʻo ia iā ia me nā bipi kāne ʻekolu, hoʻokahi ʻepa palaoa, hoʻokahi hue waina hoʻi, a lawe akula iā ia i ka hale o Iēhova ma Silo; a ʻōpiopio nō hoʻi ke keiki.

²⁵ Pepehi iho lākou i ka bipi kāne, a lawe akula i ke keiki iā ʻEli.

²⁶ ʻŌlelo akula ia, “E kuʻu haku, ma kou ola ʻana, e kuʻu haku, ʻo wau nō ka wahine i kū pū me ʻoe ma ʻaneʻi e pule ana iā Iēhova.

²⁷ “ʻO kēia keiki kaʻu i pule aku ai; a ua hāʻawi mai ʻo Iēhova iaʻu i kaʻu noi aʻu i noi aku ai iā ia.

²⁸ “No ia mea, ke hāʻawi aku nei au iā ia no Iēhova. I nā lā a pau o kona ola ʻana e hāʻawi ʻia ʻo ia no Iēhova.” A hoʻomana akula lākou iā Iēhova ma laila.