KA BUKE A NEHEMIA 9 - Ka Baibala Hemolele

1 No ka hoʻokē ʻai ʻana o kā Iuda me ka haʻi ʻana aku i ko lākou hewa i ke Akua, a me ka hoʻohaʻahaʻa ʻana iā lākou iho i mua ona.

MOKUNA IX.

¹ ¶ I ka lā iwakāluakumamāhā o kēia malama, ua hōʻuluʻulu ʻia maila kā ʻIseraʻela me ka hoʻokē ʻai ʻana, a me ke kapa ʻinoʻino, a me ka lepo ma luna iho o lākou.

² Hoʻokaʻawale ʻia aʻela kā ʻIseraʻela mai waena aku o nā malihini a pau, kū aʻela lākou, a haʻi akula i ko lākou hala, a me nā hewa o ko lākou poʻe kūpuna.

³ Kū aʻela lākou i luna ma ko lākou wahi, a heluhelu ihola ma ka Buke o ke Kānāwai o Iēhova ko lākou Akua a hala ka hapahā o ka lā; a i kekahi hapahā, haʻi akula lākou i ka hewa, a hoʻomana aku iā Iēhova ko lākou Akua.

⁴ Kū aʻela ma kahi kiʻekiʻe, ʻo nā Levi, ʻo Iesua, a me Bani, Kademiʻela, Sebania, Buni, Serebia, Bani, Kenani, a kāhea akula lākou me ka leo nui iā Iēhova ko lākou Akua.

⁵ ¶ A ʻōlelo akula nā Levi, ʻo Iesua, a me Kademiʻela, Bani, Hasabenia, Serebia, Hodia, Sebania, Petahia, “E kū aʻe ʻoukou, e hoʻomaikaʻi aku iā Iēhova ko ʻoukou Akua Ia ao aku ia ao aku! A e hoʻomaikaʻi ʻia aku kou inoa hanohano I hoʻokiʻekiʻe ʻia ma luna aʻe o ka hoʻomaikaʻi ʻana a pau a me ka hoʻoleʻa ʻana aku!

⁶ “ʻO ʻoe nō ʻo Iēhova, a ʻo ʻoe wale nō; Nāu nō i hana ka lani, A me ka lani o nā lani, a me ko laila mau mea a pau, I ka honua, a me nā mea a pau ma luna iho ona, I nā kai, a me nā mea a pau i loko o laila, Nāu nō hoʻi e mālama ia mau mea a pau; A ke hoʻomana nei ko ka lani iā ʻoe.

⁷ “ʻO ʻoe nō, ʻo Iēhova, ke Akua Nāna i koho iho iā ʻAberama, A alakaʻi maila iā ia mai loko mai o ʻUra no ko Kaledea, A kapa ihola ʻoe i kona inoa ʻo ʻAberahama.

⁸ “Loaʻa ihola iā ʻoe kona naʻau he kūpaʻa i mua ou, A hoʻohiki ihola ʻoe me ia i ka berita E hāʻawi i ka ʻāina o nā Kanaʻana, Nā Heta, nā ʻAmora A me nā Pereza, a me nā Iebusa, A me nā Giregasa, E hāʻawi nō i kāna poʻe mamo, A hoʻokō iho nō ʻoe i kāu ʻōlelo; No ka mea, he mea hana pololei nō ʻoe.

⁹ ¶ “ʻIke akula ʻoe i ka pōpilikia o ko mākou poʻe kūpuna ma ʻAigupita, A hoʻolohe nō hoʻi ʻoe ma ke kai ʻula i ko lākou kāhea ʻana aku.

¹⁰ “Hana ihola ʻoe i nā mea hōʻike, a me nā mea kupanaha ma luna o Paraʻo, A ma luna o kāna poʻe kauā a pau, A ma luna hoʻi o ka poʻe kānaka a pau o kona ʻāina. No ka mea, ua ʻike ʻoe i kā lākou hana hoʻokiʻekiʻe ʻana ma luna o lākou. Pēlā nō ʻoe i hoʻokaulana i kou inoa e like me ia i nēia lā.

¹¹ “Hoʻokaʻawale aʻela nō hoʻi ʻoe i ke kai i mua o lākou, I hele lākou i waenakonu o ke kai ma ka ʻāina maloʻo; A kiola akula ʻoe i ka poʻe e alualu ana iā lākou i loko o ka hohonu, Me he pōhaku lā i loko o nā wai nui.

¹² “Me ke kia ao nō ʻoe i alakaʻi ai iā lākou i ke ao; A me ke kia ahi nō hoʻi i ka pō I mālamalama no lākou Ma ke alanui a lākou e hele ai.

¹³ “Iho maila ʻoe ma luna o ka mauna ʻo Sinai, ʻŌlelo pū me lākou mai ka lani mai, A hāʻawi maila ʻoe iā lākou i nā ʻōlelo kūpaʻa he pololei, a me nā kapu he ʻoiaʻiʻo, I nā kānāwai a me nā kauoha he maikaʻi:

¹⁴ “Hōʻike maila ʻoe iā lākou i kou Sābati hoʻāno, A kau akula ma luna o lākou i nā kauoha, a me nā ʻōlelo kūpaʻa, A me ke kānāwai ma ka lima o Mose kāu kauā.

¹⁵ “Hāʻawi maila ʻoe iā lākou i ka berena mai ka lani mai no ko lākou pōloli, A hoʻokahe maila hoʻi i ka wai no lākou mai loko mai o ka pōhaku no ko lākou make wai ʻana, A ʻōlelo aku ʻoe iā lākou e komo a e lilo iā lākou ka ʻāina Āu i hoʻohiki ai e hāʻawi iā lākou.

¹⁶ ¶ “Akā, ʻo lākou a me ko mākou poʻe kūpuna ua hana hoʻokiʻekiʻe nō, A hōʻoʻoleʻa i ko lākou ʻāʻī, ʻAʻole hoʻi i hoʻolohe i kāu mau kauoha.

¹⁷ “Hōʻole aku lākou, ʻaʻole e hoʻolohe, ʻAʻole hoʻi lākou i hoʻomanaʻo i kāu mau hana kupanaha Āu i hana ai me lākou. Hōʻoʻoleʻa nō lākou i ko lākou ʻāʻī, A i ko lākou kipi ʻana, Koho ihola lākou i luna, I hoʻi aku ai lākou ma ko lākou hoʻokauā ʻana. Akā, ʻo ʻoe ke Akua, E kala ana i ka hala, He ʻoluʻolu a me ka lokomaikaʻi, He ahonui a me ke aloha nui, No laila, ʻaʻole ʻoe i haʻalele iā lākou.

¹⁸ “Eia hoʻi, i ka wā a lākou i hana ai i bipi keiki i hoʻoheʻeheʻe ʻia, A ʻōlelo aʻela, ‘Eia kou Akua Nāna ʻoe i alakaʻi mai loko mai o ʻAigupita,’ A hana nō hoʻi lākou i nā mea hoʻonāukiuki loa;

¹⁹ “A laila, ʻaʻole ʻoe i haʻalele iā lākou ma ka wao nahele, No kou lokomaikaʻi he nui loa. ʻAʻole nō i haʻalele ke kia ao iā lākou i ke ao, E alakaʻi ana iā lākou ma ke alanui; ʻAʻole hoʻi i haʻalele ke kia ahi i ka pō, I mālamalama no lākou, Ma ke alanui a lākou e hele ai.

²⁰ “Hāʻawi maila nō hoʻi ʻoe i kou ʻUhane maikaʻi e aʻo mai iā lākou, ʻAʻole hoʻi ʻoe i kāʻili i kāu mane mai ko lākou waha mai, A hāʻawi aku ʻoe iā lākou i ka wai no ko lākou make wai ʻana.

²¹ “Hoʻokahi kanahā makahiki āu i mālama aku ai iā lākou ma ka wao nahele, ʻAʻole lākou i nele i kekahi mea; ʻAʻole i weluwelu ko lākou ʻaʻahu, ʻAʻole hoʻi i pehu ko lākou mau wāwae.

²² “Hāʻawi mai ʻoe iā lākou i nā aupuni a me nā lāhui kanaka, A hoʻopuehu aku ʻoe ia poʻe ma ke kihi, I lilo no lākou ka ʻāina ʻo Sihona, A me ka ʻāina o ke aliʻi o Hesebona, A me ka ʻāina o ʻOga ke aliʻi o Basana.

²³ “Hoʻomāhuahua ihola nō hoʻi ʻoe i kā lākou poʻe mamo e like me nā hōkū o ka lani, A hoʻokomo aʻela iā lākou i loko o ka ʻāina Āu i ʻōlelo ai i ko lākou poʻe kūpuna, E komo lākou a e lilo ia iā lākou.

²⁴ “Komo ihola ka poʻe mamo A lilo ka ʻāina iā lākou, A hoʻopio iho ʻoe i ka poʻe kamaʻāina, I ko Kanaʻana, I mua o lākou, a hāʻawi ʻoe iā lākou i loko o ko lākou lima, I ko lākou mau aliʻi A me nā lāhui kanaka o ka ʻāina, E hana aku iā lākou e like me ko lākou makemake.

²⁵ “A lawe pio ihola lākou i nā kūlanakauhale i paʻa i ka pā, a me ka ʻāina maikaʻi, A lilo ihola iā lākou nā hale i lako i kēlā mea maikaʻi kēia mea maikaʻi, Nā pūnāwai i ʻeli ʻia, nā māla waina, A me nā māla ʻoliva a me nā lāʻau hua he nui. A ʻai ihola lākou a māʻona, a momona hoʻi, A ʻoliʻoli ihola lākou i kou hoʻomaikaʻi nui ʻana.

²⁶ ¶ “Akā, kūʻē akula lākou A kipi aku iā ʻoe, A kāpae hoʻi i kou kānāwai ma ko lākou kua, Luku ihola lākou i kāu poʻe kāula, ka poʻe i aʻo pinepine aku iā lākou E hoʻohuli iā lākou i ou lā, A hana ihola lākou i nā mea hoʻonāukiuki loa.

²⁷ “No ia mea, hāʻawi akula ʻoe iā lākou i loko o ka lima o ko lākou poʻe ʻenemi, I hoʻopōpilikia ua poʻe lā iā lākou; Akā, i ka wā o ko lākou pilikia ʻana, Kāhea akula lākou iā ʻoe, A hoʻolohe mai nō ʻoe mai ka lani mai; A e like me kou lokomaikaʻi he nui nō, Hāʻawi mai nō ʻoe iā lākou i poʻe hoʻōla, Nāna lākou i hoʻopakele aʻe Mai loko mai o ka lima o ko lākou poʻe ʻenemi.

²⁸ “Akā, i ka wā i malu ai lākou, Huli aʻela lākou e hana i ka mea ʻino i mua o kou alo; A laila waiho akula ʻoe iā lākou i loko o ka lima o ko lākou poʻe ʻenemi, I aliʻi ai ua poʻe lā ma luna o lākou; Akā, huli aʻela lākou a kāhea akula iā ʻoe, A hoʻolohe nō ʻoe mai ka lani mai; a hoʻopakele pinepine nō ʻoe iā lākou e like me kou aloha;

²⁹ “A aʻo pinepine aku nō hoʻi ʻoe iā lākou E hoʻohuli iā lākou ma kou kānāwai; Akā, hana hoʻokiʻekiʻe lākou, ʻAʻole hoʻi i hoʻolohe i kāu mau kauoha; Hana ʻino nō lākou i kāu mau ʻōlelo kūpaʻa, (‘Nā mea e ola ai ke kanaka ke hana ʻia’), Hāʻawi lākou i ka poʻohiwi kipi, A hōʻoʻoleʻa i ko lākou ʻāʻī, ʻAʻole hoʻi i hoʻolohe.

³⁰ “Akā, hoʻomanawanui nō ʻoe iā lākou i nā makahiki he nui nō, A aʻo pinepine aku ʻoe iā lākou me kou ʻUhane i loko o ka poʻe kāula. ʻAʻole naʻe i hāliu mai ko lākou pepeiao; No laila hāʻawi akula ʻoe iā lākou i loko o ka lima o nā lāhui kanaka o nā ʻāina.

³¹ “ʻAʻole naʻe ʻoe i hoʻopau loa iā lākou no kou lokomaikaʻi he nui nō, ʻAʻole hoʻi i haʻalele ʻoe iā lākou; No ka mea, he Akua lokomaikaʻi nō ʻoe a me ke aloha.

³² ¶ “ʻĀnō hoʻi, e ko mākou Akua, Ke Akua nui, mana, a hoʻoweliweli, E mālama ana i ka berita a me ka lokomaikaʻi, Mai manaʻo mai ʻoe he ʻuʻuku ka pōpilikia a pau I hiki maila ma luna o mākou nei, Ma luna o ko mākou poʻe aliʻi, ma luna o nā luna o mākou, A ma luna o ko mākou poʻe kāhuna, a ma luna o nā kāula o mākou, Ma luna o ko mākou poʻe mākua, a ma luna hoʻi o kou poʻe kānaka a pau, Mai nā lā mai o nā aliʻi o ʻAsuria a hiki i kēia lā.

³³ “Ua hala ʻole nō naʻe ʻoe ma nā mea a pau i hiki maila ma luna o mākou; No ka mea, ua hana nō ʻoe ma ka pololei, A ʻo mākou kai hana hewa.

³⁴ “A ʻo ko mākou poʻe aliʻi, ko mākou poʻe luna, Ko mākou poʻe kāhuna, a me ko mākou poʻe mākua, ʻAʻole lākou i mālama i kou kānāwai, ʻAʻole hoʻi i hoʻolohe i kāu mau kauoha a me kāu mau ʻōlelo aʻo Āu i aʻo pinepine mai ai iā lākou.

³⁵ “No ka mea, ʻaʻole i hoʻokauā lākou nāu ma ko lākou aupuni, A ma kou lokomaikaʻi nui āu i hāʻawi mai ai iā lākou, A ma ka ʻāina nui a momona āu i waiho mai ai i mua o lākou; ʻAʻole hoʻi i huli aʻe lākou mai kā lākou hana hewa ʻana aku.

³⁶ “Eia hoʻi, i kēia lā, he poʻe kauā mākou! A ʻo ka ʻāina āu i hāʻawi mai ai i ko mākou poʻe kūpuna, E ʻai i ka hua ona a me kona maikaʻi, ʻeā, He poʻe kauā nō mākou ma luna ona!

³⁷ “A e kau mai ana ma luna ona ka hoʻokupu nui ʻana i nā aliʻi Āu i hoʻonoho ai ma luna o mākou No ko mākou hewa; A e aliʻi ana lākou ma luna o ko mākou mau kino, a me ko mākou poʻe holoholona, E like me ko lākou makemake, A i loko nō mākou o ka pōpilikia nui.

³⁸ “No kēia mea a pau Ke hoʻohiki nei mākou i mea ʻoiaʻiʻo, a kākau iho nō hoʻi, A na ko mākou poʻe luna, nā Levi, a me nā kāhuna o mākou e kau i ka sila e paʻa ai.”