KA BUKE A NEHEMIA 6 - Ka Baibala Hemolele

1 No ka ʻimi ʻana o Sanebalata mā e hoʻoweliweli iā Nehemia a e hoʻōki aʻe i kāna hana ʻana i ka pā.

MOKUNA VI.

¹ ¶ A lohe ihola ʻo Sanebalata, a me Tobia, a me Gesema no ʻArabia, a me ke koena o ko mākou poʻe ʻenemi, ua uhau ihola au i ka pā, ʻaʻole hoʻi i koe kauwahi ona i wāwahi ʻia ai, (ʻaʻole naʻe au i kūkulu i luna ia manawa i nā pani ma nā puka);

² a laila, hoʻouna maila ʻo Sanebalata a me Gesema i oʻu nei, ʻī maila, “ʻEā, e hālāwai pū kākou ma nā kūlanakauhale o ka pāpū ʻo ʻOno.” Akā, manaʻo ihola lāua e hana ʻino mai iaʻu.

³ A hoʻouna akula au i o lākou lā i mau ʻelele, e ʻōlelo aku, “He hana nui kaʻu e hana nei, ʻaʻole e hiki iaʻu ke iho aku; no ke aha lā e oki ai ka hana, i koʻu waiho ʻana ia, a iho aku i o ʻoukou lā?”

⁴ ʻEhā kā lākou hoʻouna ʻana mai iaʻu e like me kēia ʻōlelo ʻana; a pane akula nō hoʻi au iā lākou e like nō me kēia ʻōlelo ʻana.

⁵ A laila hoʻouna maila ʻo Sanebalata iaʻu i kāna kauā me ka palapala i hohola ʻia ma kona lima, e like nō me kēlā hana ʻana, a ʻo ka lima hoʻi ia.

⁶ A ma loko o laila ua palapala ʻia, “Ua lohe ʻia e nā lāhui kanaka, a na Gasemu nō i ʻōlelo aʻe, e ʻōhumu ana ʻoe a me kā Iuda e kipi’; no ia mea kou uhau ʻana i ka pā, i lilo ʻoe i aliʻi no lākou e like me kēia mau ʻōlelo.

⁷ “A ua hoʻonoho hoʻi ʻoe i poʻe kāula e haʻi aku ma Ierusalema nou, me ka ʻī ʻana aku, ‘He aliʻi ma Iuda’; eia hoʻi, e lohe auaneʻi ke aliʻi e like me kēia mau ʻōlelo. No laila, ʻeā, e kūkākūkā pū lākou.”

⁸ A laila, hoʻouna akula au i ona lā, ʻī akula, “ʻAʻole i hana ʻia e like me kēia mau mea āu i ʻōlelo mai ai; akā, mai loko mai o kou naʻau iho kou kuhi ʻana ia mau mea.”

⁹ No ka mea, hoʻomakaʻu mai lākou a pau iā mākou, ʻī aʻela, “E kuʻu ʻia aku ko lākou mau lima mai ka hana aku, i paʻa ʻole ia.” Akā, ʻānō, e hoʻoikaika mai ʻoe i koʻu mau lima.

¹⁰ ¶ A laila komo akula au i loko o ka hale o Semaia ke keiki a Delaia ke keiki a Mehetabeʻela, ka mea i pani paʻa ʻia ma loko; a ʻī maila, “E hoʻākoakoa pū kākou ma ka hale o ke Akua, i waenakonu o ka luakini, a e pani kākou i nā puka o ka luakini; no ka mea, e hiki mai auaneʻi lākou e pepehi iā ʻoe; i ka pō nō e hiki mai ai lākou e pepehi iā ʻoe.”

¹¹ A ʻī akula au, “E hoʻoheʻe wale anei ke kanaka me aʻu nei? ʻO wai hoʻi ka mea e like me aʻu nei e komo i loko o ka luakini i ola ia? ʻAʻole au e komo!”

¹² A ʻike ihola au, aia hoʻi, ʻaʻole i hoʻouna mai ke Akua iā ia; akā, ua haʻi kūʻē maila ʻo ia ia ʻōlelo iaʻu; no ka mea, ua hoʻolimalima ʻo Tobia lāua ʻo Sanebalata iā ia.

¹³ A no ia mea ʻo ia i hoʻolimalima ʻia ai, i makaʻu ai au, a hana pēlā, a hewa, i loaʻa iā lākou ka ʻōlelo hōʻino, e hōʻino mai ai iaʻu.

¹⁴ E hoʻomanaʻo ʻoe, e koʻu Akua, iā Tobia a me Sanebalata e like me kēia mau hana ʻana a lāua, a iā Noadia hoʻi, ke kāula wahine, a me nā kāula ʻē aʻe i manaʻo e hoʻomakaʻu mai iaʻu.

¹⁵ ¶ A ua paʻa ka pā i ka lā iwakāluakumamālima o ʻElula, i nā lā he kanalimakumamālua.

¹⁶ A lohe ko mākou poʻe ʻenemi a pau, a ʻike hoʻi nā lāhui kanaka a pau a puni mākou, kūlou loa ihola ko lākou maka i lalo; no ka mea, ʻike lākou, ua hana ʻia kēia hana e ko mākou Akua.

¹⁷ Eia hoʻi, ia mau lā, hoʻomāhuahua ihola ka poʻe kaukaualiʻi o Iuda i nā palapala a lākou i hoʻouka aku ai i o Tobia lā, a hiki maila hoʻi kā Tobia i o lākou lā.

¹⁸ No ka mea, he nui ka poʻe ma Iuda i hoʻohiki ʻia nona; no ka mea, he hūnōna kāne nō ia no Sekania ke keiki a ʻAra; a ua lawe hoʻi ʻo Iohanana kāna keiki i ke kaikamahine a Mesulama ke keiki a Berekia.

¹⁹ Eia hoʻi, ʻōlelo maila lākou i mua oʻu ma nā mea maikaʻi ona, a haʻi akula hoʻi lākou i kaʻu mau mea iā ia. A hoʻouna mai ʻo Tobia i nā palapala e hoʻomakaʻu mai iaʻu.