KA BUKE A NEHEMIA 3 - Ka Baibala Hemolele

1 ʻO ka poʻe nāna i hoʻāla hou aʻe i ka pā.

MOKUNA III.

¹ ¶ A laila kū aʻela i luna ʻo ʻEliasiba ke kahuna nui a me kona mau hoahānau, ʻo nā kāhuna, a hana ihola lākou i ka Puka Hipa; hoʻolaʻa ihola lākou ia, a kūkulu nō hoʻi i luna i kona mau pani; hoʻolaʻa ihola lākou ia a hiki i ka Hale Kiaʻi o Mea, a i ka Hale Kiaʻi hoʻi o Hananeʻela.

² A ma laila aku uhau ihola nā kānaka o Ieriko; a ma laila aku uhau ihola ʻo Zakura ke keiki a ʻImeri.

³ ¶ A hana ihola nā keiki a Hasenaʻa i ka Puka Iʻa; kāpili iho lākou ia, a kūkulu nō hoʻi i luna i kona mau pani a me kona mau kī a me kona mau kaola.

⁴ A ma laila aku hoʻāla hou aʻela ʻo Meremota ke keiki a ʻUria ke keiki a Koza. A ma laila aku hoʻāla hou aʻela ʻo Mesulama ke keiki a Berekia, ke keiki a Mesezabeʻela. A ma laila aku hoʻāla hou aʻe ʻo Zadoka ke keiki a Baʻana.

⁵ A ma laila aku hoʻāla hou aʻela ʻo ko Tekoa; akā, ʻo ko lākou poʻe kaukaualiʻi, ʻaʻole i hoʻokomo lākou i ko lākou ʻāʻī ma ka hana a ko lākou haku.

⁶ ¶ A hoʻāla hou aʻela ʻo Ioada ke keiki a Pesea, lāua ʻo Mesulama ke keiki a Besodia i ka Puka Kahiko; kāpili ihola lāua ia, a kūkulu nō hoʻi i luna i kona mau pani a me kona mau kī a me kona mau kaola.

⁷ A ma laila aku hoʻāla hou aʻela ʻo Melatia no Gibeona, a me Iadona no Meronota, ʻo nā kānaka o Gibeona, a me Misepa, a hiki i ka noho aliʻi o ke kiaʻāina ma kēia ʻaoʻao o ka Muliwai.

⁸ A ma laila aku hoʻāla hou aʻela ʻo ʻUriʻela ke keiki a Harehaia, kekahi o ka poʻe hana gula. A ma laila aku hoʻāla hou aʻela ʻo Hanania ke keiki o nā mea hana i nā mea ʻono; a waiho lākou iā Ierusalema a hiki i ka Pā Pālahalaha.

⁹ A ma laila aku hoʻāla hou aʻela ʻo Repaia ke keiki a Hura, ka luna o kekahi hapalua o Ierusalema.

¹⁰ A ma laila aku hoʻāla hou aʻela ʻo Iedaia ke keiki a Harumapa ma kahi e kūpono ana i kona hale. A ma laila aku hoʻāla hou aʻela ʻo Hatusa ke keiki a Hasabania.

¹¹ A hoʻāla hou aʻela ʻo Malakia ke keiki a Harima lāua ʻo Hasuba ke keiki a Pahata-Moaba, i ka paukū e pili pū ana, a me ka Hale Kiaʻi ma nā Umu.

¹² A ma laila aku hoʻāla hou aʻela ʻo Saluma ke keiki a Halohesa, ka luna o kekahi hapalua o Ierusalema, ʻo ia a me kāna mau kaikamāhine.

¹³ A hoʻāla hou aʻela ʻo Hanuna a me ko Zanoa i ka Puka Awāwa; a hana ihola lākou ia, a kūkulu nō hoʻi i luna i kona mau pani a me kona mau kī a me kona mau kaola, a i nā kūbita o ka pā hoʻokahi tausani a hiki ma ka Puka Lepo.

¹⁴ A hoʻāla hou aʻela ʻo Malakia ke keiki a Rekaba, ka luna o kekahi mokuna ʻo Beta Hakerema, i ka Puka Lepo; hana ihola nō ʻo ia ia, a kūkulu nō hoʻi i luna i kona mau pani a me kona mau kī a me kona mau kaola.

¹⁵ A hoʻāla hou aʻela ʻo Saluna ke keiki a Kola-Hoze, ka luna o kekahi mokuna ʻo Mizepa, i ka Puka Wai Puna; a hana ihola nō ʻo ia ia, a kāpili ihola ia ma luna iho a malu, a kūkulu nō hoʻi i luna i kona mau pani a me kona mau kī a me kona mau kaola, a i ka pā o ka loko ʻo Siloa no ka Māla a ke Aliʻi, a hiki i nā ʻānuʻunuʻu e iho ai mai ke kūlanakauhale aku o Dāvida.

¹⁶ A ma laila aku hoʻāla hou aʻela ʻo Nehemia ke keiki a ʻAzabuka, ka luna o kekahi hapalua o Beta Zura, a hiki i kahi e kū pono ana i nā lua kupapaʻu o Dāvida, a i ka loko hoʻi i hana ʻia, a me ka Hale o ka Poʻe Ikaika.

¹⁷ A ma laila aku hoʻāla hou aʻela ʻo kā Levi, ʻo Rehuma ke keiki a Bani. A ma laila aku hoʻāla hou aʻela ʻo Hasabia, ka luna o kekahi hapalua o Keila; ʻo ia nō kona ʻokana.

¹⁸ A ma laila aku hoʻāla hou aʻela ʻo ko lākou mau hoahānau, ʻo Bavai ke keiki a Henadada, ka luna o kekahi hapalua o Keila.

¹⁹ A ma laila aku hoʻāla hou aʻela ʻo ʻEzera ke keiki a Iesua, ka luna o Mizepa, i ka paukū e pili pū ana, mai ke alo aku o ka piʻi ʻana ma ka hale e waiho ai i nā mea kaua a i ka popoiwi o ka pā.

²⁰ A ma laila aku hoʻāla hou aʻela me ka hoʻoikaika nui ʻo Baruka ke keiki a Zabai, i ka paukū e pili ana, mai ka popoiwi aku a i ka puka o ka hale o ʻEliasiba ke kahuna nui.

²¹ A ma laila aku hoʻāla hou aʻela ʻo Meremota ke keiki a ʻUria ke keiki a Koza, i ka paukū e pili pū ana mai ka puka aku o ka hale o ʻEliasiba a hiki i ka pau ʻana o ka hale o ʻEliasiba.

²² A ma laila aku hoʻāla hou aʻela ka poʻe kāhuna, ʻo nā kānaka o ka pāpū.

²³ A ma laila aku hoʻāla hou aʻela ʻo Beniamina lāua ʻo Hasuba i kahi e kū pono ana i ko lāua hale. A ma laila aku hoʻāla hou aʻela ʻo ʻAzaria ke keiki a Maʻaseia ke keiki a ʻAnania ma kahi e kokoke ana i kona hale.

²⁴ A ma laila aku hoʻāla hou aʻela ʻo Binui ke keiki a Henadada i ka paukū e pili pū ana, mai ka hale aku o ʻAzaria a i ka popoiwi a hiki loa aku nō i ke kihi.

²⁵ A ʻo Palala ke keiki a ʻUzai, mai ke alo aku o ka popoiwi, a me ka hale kiaʻi e ʻoiʻoi aku ana ma mua aku o ka hale kiʻekiʻe o ke aliʻi i loko o ka pā o ka hale paʻahao. A ma laila aku ʻo Pedaia ke keiki a Parosa.

²⁶ A ua noho nō ka poʻe Netini i loko o ʻOpela, hoʻāla lākou a hiki ma ke alo o ka Puka Wai ma ka hikina, a ma ka hale kiaʻi hoʻi e ʻoi aku ana i waho.

²⁷ A ma laila aku hoʻāla hou aʻela ʻo ko Tekoa i ka paukū e pili pū ana mai ke alo aku o ka hale kiaʻi nui e ʻoi aku ana i waho, a hiki i ka pā o ʻOpela.

²⁸ ¶ A ma luna iho o ka Puka Lio hoʻāla hou aʻela ka poʻe kāhuna, ʻo kēlā kanaka kēia kanaka ma kahi e kū pono ana i kona hale iho.

²⁹ A ma laila aku hoʻāla hou aʻela ʻo Zadoka ke keiki a ʻImera ma kahi e kū pono ana i kona hale iho. A ma laila aku hoʻāla hou aʻela ʻo Semaia ke keiki a Sekania ka mea nāna i mālama i ka Puka ma ka Hikina.

³⁰ A ma laila aku hoʻāla hou aʻela ʻo Hanani ke keiki a Selemia lāua ʻo Hanuna, ʻo ke ono ia o nā keiki kāne a Zalapa, i ka paukū e pili pū ana. A ma laila aku hoʻāla hou aʻela ʻo Mesulama ke keiki a Berekia ma kahi e kū pono ana i kona keʻena.

³¹ A ma laila aku hoʻāla hou aʻela ʻo Malakia ke keiki a ka mea hana gula, a hiki ma kahi o ka poʻe Netini a me ka poʻe kālepa, ma ke alo o ka Puka Mipekada, a hiki ma kahi kiʻekiʻe o ke kihi.

³² A ma waena o kahi kiʻekiʻe o ke kihi a me ka Puka Hipa, hoʻāla hou aʻela ka poʻe hana gula a me ka poʻe kālepa.