KA BUKE A NEHEMIA 2 - Ka Baibala Hemolele

1 Ua hoʻouna ʻia ʻo Nehemia ma Ierusalema.

MOKUNA II.

¹ ¶ I ka malama ʻo Nisana, i ka iwakālua o ka makahiki o ke aliʻi o ʻAretasaseta, i mua ona ka waina, a ua lawe au i ka waina, a hāʻawi aku i ke aliʻi; ʻaʻohe oʻu kaumaha ma mua i mua o kona alo.

² A ʻī maila ke aliʻi iaʻu, “No ke aha lā i ʻinoʻino ai kou maka, ʻaʻole hoʻi ou maʻi? ʻAʻohe mea ʻē aʻe kēia, ʻo ke kaumaha nō ia o ka naʻau.” A laila makaʻu nui loa ihola au,

³ A ʻī akula i ke aliʻi, “I ola mau loa ke aliʻi; he aha ka mea e ʻole ai e ʻinoʻino koʻu maka i ka wā e waiho neoneo ana ke kūlanakauhale, kahi o nā ilina a koʻu mau mākua kāne, a ʻo nā pani puka nō hoʻi ona ua hoʻopau ʻia i ke ahi?”

⁴ A ʻōlelo maila ke aliʻi iaʻu, “He aha kāu e ʻimi nei?” A laila pule akula au i ke Akua o ka lani.

⁵ A ʻī akula au i ke aliʻi, “Inā he mea ʻoluʻolu ia i ke aliʻi, a i loaʻa hoʻi ke aloha i kāu kauā i mua o kou alo, a laila e hoʻouna ʻoe iaʻu ma Iuda, ma ke kūlanakauhale o nā ilina o koʻu mau mākua kāne, i kūkulu au ia.”

⁶ A ʻī maila ke aliʻi iaʻu, (ʻo ke aliʻi wahine kekahi e noho pū ana me ia,) “Pehea ka lōʻihi o kou manawa e hele ai? Āhea lā ʻoe e hoʻi mai ai?” A he mea ʻoluʻolu ia i ke aliʻi e hoʻouna iaʻu; a haʻi aku au iā ia i manawa.

⁷ A ʻōlelo aku nō hoʻi au i ke aliʻi, “Inā he mea pono ia i ke aliʻi, e hāʻawi ʻia mai iaʻu kekahi mau palapala na nā kiaʻāina ma kēlā ʻaoʻao o ka Muliwai, i lawe lākou iaʻu a hiki au ma Iuda;

⁸ a i palapala na ʻAsapa ka mea mālama i ko ke aliʻi ulu lāʻau, i hāʻawi mai ia iaʻu i mau lāʻau e kāpili ai i nā puka o ka pā kiaʻi o ka hale, a no ka pā o ke kūlanakauhale, a no ka hale hoʻi aʻu e komo ai.” A hāʻawi mai nō ke aliʻi iaʻu, ma muli o ka lima lokomaikaʻi o koʻu Akua ma luna oʻu.

⁹ ¶ A hiki maila au i nā kiaʻāina ma kēia ʻaoʻao o ka Muliwai, hāʻawi aku au iā lākou i nā palapala a ke aliʻi. A ua hoʻouna mai nō hoʻi ke aliʻi me aʻu i mau luna koa a i poʻe hoʻoholo lio.

¹⁰ A lohe ʻo Sanebalata ka Horona, a me Tobia ke kauā, ka ʻAmona, he mea kaumaha loa nō iā lāua ka hiki ʻana mai o kekahi kanaka e ʻimi i ka mea e pono ai nā mamo a ʻIseraʻela.

¹¹ A hiki aku au ma Ierusalema, a ma laila nō au i nā lā ʻekolu.

¹² A laila ala aʻela au i luna i ka pō, ʻo wau a me kekahi poʻe kānaka ʻuʻuku me aʻu; akā, ʻaʻole au i haʻi aku i kekahi kanaka i ka mea a koʻu Akua i hoʻokomo mai ai i loko o koʻu naʻau e hana no Ierusalema. A ʻaʻohe holoholona me aʻu, ʻo ka holoholona wale nō aʻu i hoʻoholo ai.

¹³ A hele aku au ma ka Puka Awāwa i ka pō, ma ke alo o ka Pūnāwai, a ka Puka Lepo, a nānā akula au i nā pā o Ierusalema i hoʻohiolo ʻia a me nā pani puka ona i hoʻopau ʻia i ke ahi.

¹⁴ A hele aku au a i ka Puka Wai Puna, a i ka Loko hoʻi o ke Aliʻi; a ʻaʻohe wahi no ka holoholona ma lalo oʻu e hiki aku ai.

¹⁵ A laila piʻi akula au i ka pō ma ke kahawai, a nānā akula au i ka pā, a huli aʻela hoʻi au, a komo ma ka Puka Awāwa, a hoʻi maila.

¹⁶ A ʻo nā luna, ʻaʻole lākou i ʻike i kahi aʻu i hele ai, a me ka mea aʻu i hana ai; ʻaʻole hoʻi au i hōʻike aku ia i kā Iuda, ʻaʻole nō hoʻi i nā kāhuna, a me ka poʻe kaukaualiʻi, a me ka poʻe luna, a me ka poʻe i koe nāna ka hana.

¹⁷ ¶ A laila, ʻōlelo akula au iā lākou, “Ke ʻike nei ʻoukou i ka pōpilikia i loaʻa iā kākou, ua neoneo ʻo Ierusalema, a ʻo nā puka ona ua pau i ke ahi; ʻauhea ʻoukou; ʻeā, e kūkulu kākou i ka pā o Ierusalema, i ʻole e hōʻino hou iā kākou.”

¹⁸ A haʻi akula au iā lākou i ka lima o koʻu Akua, he lokomaikaʻi ma luna oʻu, a me nā ʻōlelo nō hoʻi a ke aliʻi, āna i ʻōlelo mai ai iaʻu. A ʻī aʻela lākou, “E kū aʻe kākou a e kūkulu.” A hoʻoikaika ihola ko lākou mau lima ma kēia mea e pono ai.

¹⁹ A lohe ʻo Sanebalata, ka Horona, a me Tobia ke kauā, ka ʻAmona, a me Gesema, ka ʻArabia, ua ʻaka henehene mai lākou iā mākou, a ua hoʻowahāwahā mai nō hoʻi iā mākou, ʻī maila, “He aha kēia mea a ʻoukou e hana nei? E kipi aku anei ʻoukou i ke aliʻi?”

²⁰ A pane akula au iā lākou, a ʻī akula au iā lākou, “ʻO ke Akua o ka lani, ʻo ia ka mea nāna mākou e kōkua mai; a ʻo mākou, kāna poʻe kauā, e kū i luna nō mākou a e kūkulu; akā, ʻaʻole o ʻoukou kuleana, ʻaʻole nō he pono, ʻaʻole hoʻi he mea e hoʻomanaʻo ai i loko o Ierusalema.”