KA BUKE A NEHEMIA 13 - Ka Baibala Hemolele

1 No ko Nehemia hoʻōki ʻana i kekahi mau hewa.

MOKUNA XIII.

¹ ¶ Ia lā ua heluhelu ʻia ma ka Buke o Mose i loko o nā pepeiao o ka poʻe kānaka; a loaʻa i loko o laila ka mea i kākau ʻia ai, i ʻole e komo kā ʻAmona a me kā Moaba i loko o ka ʻaha kanaka o ke Akua i ka manawa pau ʻole;

² No ka mea, ʻaʻole lākou i hele aku e hālāwai me kā ʻIseraʻela me ka berena a me ka wai; akā, kūʻē iā lākou a hoʻolimalima iā Balaʻama e hōʻino iā lākou; hoʻololi nō naʻe ko kākou Akua i ka hōʻino ʻana i hoʻomaikaʻi ana.

³ A lohe lākou i ke Kānāwai, hoʻokaʻawale aʻela lākou i nā malihini a pau mai kā ʻIseraʻela aku.

⁴ ¶ A ma mua o kēia manawa, ʻo ʻEliasiba ke kahuna, iā ia i hāʻawi ʻia ke keʻena o ka hale o ko kākou Akua, he hoalauna nō ia no Tobia.

⁵ A ua hoʻomākaukau ʻo ia nona, i keʻena nui kahi a lākou i waiho ai ma mua i ka mōhai makana, i ka mea ʻala a me nā ipu a me ka hapaʻumi o ka ʻai, i ka waina hou a me ka ʻaila, nā mea i kauoha ʻia ai na nā Levi a me ka poʻe mele a me ka poʻe kiaʻi puka; a me ka makana no ka poʻe kāhuna.

⁶ Akā, i kēia manawa a pau, ʻaʻole au ma Ierusalema; no ka mea, i ka makahiki kanakolukumamālua o ʻAretasaseta ke aliʻi o Babulona, hiki akula au i ke aliʻi, a hala kekahi mau lā, nonoi akula au i ke aliʻi noʻu.

⁷ A hiki maila au i Ierusalema a ʻike ihola i ka mea ʻino a ʻEliasiba i hana ai no Tobia, i ka hoʻomākaukau ʻana i keʻena nona ma nā keʻena o ka hale o ke Akua.

⁸ A laila, ʻeha loa ihola au; a kiola akula au ma waho i ka ukana o ka hale o Tobia, mai loko aku o ke keʻena.

⁹ A laila, kauoha akula au, a huikala lākou i ke keʻena; a hoʻihoʻi maila au ma laila i nā ipu o ka hale o ke Akua, i ka mōhai makana a me ka mea ʻala.

¹⁰ ¶ A ʻike ihola au, ʻaʻole i hāʻawi ʻia mai nā haʻawina no nā Levi; a ua ʻauheʻe kēlā kanaka kēia kanaka ma kona ʻāina iho, ʻo nā Levi a me ka poʻe mele, ka poʻe nāna e lawelawe i ka hana.

¹¹ A laila, aʻo akula au i nā luna, a ʻōlelo akula au, “No ke aha lā i haʻalele ʻia ai ka hale o ke Akua?” A hōʻuluʻulu maila au iā lākou, a hoʻonoho ihola iā lākou ma ko lākou wahi.

¹² A laila, lawe maila kā Iuda a pau i ka hapaʻumi o ka ʻai me ka waina hou a me ka ʻaila ma nā keʻena e waiho ai nā mea laʻa.

¹³ A hoʻonoho iho au i nā puʻukū waiwai ma luna o nā waihona waiwai iā Selemia ke kahuna, a me Zadoka ke kākau ʻōlelo, a me Pedaia kekahi o nā Levi; a ma hope o lākou ʻo Hanana ke keiki a Zakura, ke keiki a Matania; no ka mea, ua manaʻo ʻia lākou he poʻe hana pololei; no laila, na lākou nō e mahele na ko lākou poʻe hoahānau.

¹⁴ E hoʻomanaʻo mai ʻoe iaʻu, e koʻu Akua, no kēia hana, ʻaʻole hoʻi e holoi iho ʻoe i koʻu lokomaikaʻi aʻu i hana ai no ka hale o koʻu Akua, a no kāna mau ʻoihana.

¹⁵ ¶ Ia mau lā, ʻike akula au ma Iuda i kekahi poʻe e hehi ana i nā lua kaomi waina i ka Sābati, a e halihali ana i nā pua, a e hoʻouka ana i nā hoki; a e lawe ana i ka waina, i nā hua waina, a me nā fiku, a me kēlā mea kēia mea kūʻai ma Ierusalema i ka Sābati; a pāpā akula au ia lā nō, i ko lākou kūʻai ʻana i ka ʻai.

¹⁶ Noho ihola i loko o laila nā kānaka o Turo i lawe mai i ka iʻa, a me kēlā mea kēia mea kūʻai, a kūʻai iho nō i ka Sābati me kā Iuda i loko nō o Ierusalema.

¹⁷ A laila pāpā akula au i nā kaukaualiʻi o kā Iuda, a ʻōlelo aku au iā lākou, “He aha kēia mea hewa a ʻoukou e hana nei, a hana ʻino i ka lā Sābati?

¹⁸ “ʻAʻole anei i hana ko ʻoukou poʻe mākua pēlā, a kau maila ko kākou Akua i kēia pōpilikia a pau ma luna o kākou, a ma luna o kēia kūlanakauhale? Akā, e hoʻomāhuahua ana ʻoukou i ka inaina ma luna o kā ʻIseraʻela i kā ʻoukou hana ʻino ʻana i ka Sābati.”

¹⁹ ¶ A i ka wā i pouli mai ai nā puka o Ierusalema ma mua o ka Sābati, ʻōlelo akula au, e pani lākou i nā puka, a ʻōlelo aku nō hoʻi au, e wehe ʻole ʻia lākou a hala ka Sābati; a hoʻonoho ihola au i kekahi o kaʻu poʻe kauā ma nā puka i komo ʻole kekahi ukana i ka lā Sābati.

²⁰ A ʻo ka poʻe kālepa a me ka poʻe e kūʻai ana i kēlā mea kēia mea kūʻai, ʻakahi a ʻelua hoʻi ko lākou moe ʻana ma waho o Ierusalema.

²¹ A laila pāpā akula au iā lākou, a ʻōlelo akula iā lākou, “No ke aha lā ʻoukou e moe ai ma kahi e pili ana i ka pā? Inā e hana hou ʻoukou pēlā, e lālau nō koʻu lima iā ʻoukou!” Mai ia manawa mai, ʻaʻole lākou i hiki mai i ka Sābati.

²² A ʻōlelo akula au i nā Levi, i huikala lākou iā lākou iho, a i hele mai lākou a e mālama i nā puka i hoʻāno ka lā Sābati. No kēia mea hoʻi, e hoʻomanaʻo mai ʻoe iaʻu, e koʻu Akua, a e ahonui mai ʻoe iaʻu e like me ka nui o kou lokomaikaʻi!

²³ ¶ Eia hoʻi, ia mau lā ʻike akula au i kekahi poʻe o kā Iuda i mare i nā wāhine o ʻAsedoda, a ʻo ʻAmona, a ʻo Moaba.

²⁴ A he hapa ka ʻōlelo ʻana o kā lākou poʻe keiki ma ka ʻōlelo a ʻAsedoda, ʻaʻole hoʻi i ʻike lākou ke ʻōlelo e like me kā Iuda; akā, e like me kēlā lāhui kanaka a me kēia lāhui kanaka.

²⁵ A pāpā aku au iā lākou, a hōʻino aku au iā lākou, a kuʻi aku i kekahi poʻe o lākou, a huki aʻela i ko lākou lauoho, a kēnā aku iā lākou e hoʻohiki ma ke Akua, “ʻAʻole ʻoukou e hāʻawi aku i kā ʻoukou mau kaikamāhine na kā lākou poʻe keiki kāne, ʻaʻole hoʻi e lawe ʻoukou i kā lākou mau kaikamāhine na kā ʻoukou keiki kāne, ʻaʻole hoʻi na ʻoukou iho.

²⁶ “ʻAʻole anei i hana hewa ʻo Solomona ke aliʻi o kā ʻIseraʻela ma kēia mau mea? Ma nā lāhui kanaka he nui loa, ʻaʻole aliʻi e like me ia, ua aloha ʻia ʻo ia e kona Akua, a ua hoʻolilo ke Akua iā ia i aliʻi ma luna o kā ʻIseraʻela a pau; akā, ʻo nā wāhine o nā ʻāina ʻē, alakaʻi nō lākou iā ia ma ka hewa.

²⁷ “A e hoʻolohe anei mākou iā ʻoukou e hana i kēia hewa nui, a e kipi aku i ko kākou Akua ma ka mare ʻana i nā wāhine o nā ʻāina ʻē?”

²⁸ A ʻo kekahi o nā keiki a Ioiada, ke keiki a ʻEliasiba ke kahuna nui, he hūnōna kāne ʻo ia na Sanebalata no Horona; a hoʻokuke akula au iā ia mai oʻu aku lā.

²⁹ E hoʻomanaʻo mai ʻoe iā lākou, e koʻu Akua, no ko lākou hoʻohaumia ʻana i ka ʻoihana kahuna, a me ka berita o ka ʻoihana kahuna, a ʻo nā Levi.

³⁰ ¶ Pēlā au i hoʻokaʻawale aku ai iā lākou mai nā malihini aku a pau, a hoʻoponopono ihola au i nā ʻoihana a ka poʻe kāhuna a me nā Levi, kēlā kanaka kēia kanaka ma kāna ʻoihana iho;

³¹ a i ka hāʻawi ʻana mai o ka wahie i nā manawa i ʻōlelo ʻia ai, a i nā hua mua. E hoʻomanaʻo mai ʻoe iaʻu, e koʻu Akua, i mea e pono ai!