KA BUKE A NEHEMIA 12 - Ka Baibala Hemolele

1 No ka hoʻolaʻa ʻana i ka pā o Ierusalema no Iēhova.

MOKUNA XII.

¹ ¶ Eia nā kāhuna a me nā Levi i piʻi aʻela me Zerubabela ke keiki a Sealetiʻela a me Iesua: ʻo Seraia, Ieremia, ʻEzera,

² ʻAmaria, Maluka, Hatusa,

³ Sekania, Rehuma, Meremota,

⁴ ʻIdo, Gineto, ʻAbiia,

⁵ Miiamina, Maʻadia, Bilega,

⁶ Semaia, a me Ioiariba, Iedaia,

⁷ Salu, ʻAmoka, Hilekia, Iedaia. ʻO ia ka poʻe koʻikoʻi o nā kāhuna a me ko lākou poʻe hoahānau i nā lā o Iesua.

⁸ ¶ A ʻo nā Levi: Iesua, Binui, Kademiʻela, Serebia, Iuda, Matania; ʻo ia a me kona poʻe hoahānau ka poʻe ma luna o ka hoʻoleʻa ʻana aku.

⁹ A ʻo Bakebukia, a me ʻUni a me ko lāua mau hoahānau, ma ke alo aku lākou o kēlā poʻe ma ke kiaʻi ʻana.

¹⁰ A na Iesua ʻo Ioiakima, a na Ioiakima ʻo ʻEliasiba, a na ʻEliasiba ʻo Ioiada,

¹¹ a na Ioiada ʻo Ionatana, a na Ionatana ʻo Iadua.

¹² ¶ I nā lā iā Ioiakima, he poʻe kāhuna, he poʻe koʻikoʻi lākou o nā mākua: na Seraia ʻo Meraia; na ʻIremia ʻo Hanania;

¹³ na ʻEzera ʻo Mesulama; na ʻAmaria ʻo Iehohanana;

¹⁴ na Meliku ʻo Ionatana; na Sebania ʻo Iosepa;

¹⁵ na Harima ʻo ʻAdena; na Meraiota ʻo Helekai;

¹⁶ na ʻIdo ʻo Zekaria; na Ginetona ʻo Mesulama;

¹⁷ na ʻAbiia ʻo Zikeri; na Miniamina; na Moadia ʻo Piletai;

¹⁸ na Bilega ʻo Samua; na Semaia ʻo Iehonatana;

¹⁹ a na Ioiariba ʻo Matenai; na Iedaia ʻo ʻUzi;

²⁰ na Salai ʻo Kalai; na ʻAmoka ʻo ʻEbera;

²¹ Na Hilekia ʻo Hasabia; na Iedaia ʻo Nataneʻela.

²² ¶ ʻO nā Levi i nā lā iā ʻEliasiba, Ioiada, a me Iohanana, a me Iadua, ua kākau ʻia lākou he poʻe koʻikoʻi o nā mākua; pēlā nō hoʻi nā kāhuna a hiki i ke kau iā Dariu no Peresia.

²³ ʻO nā mamo a Levi, ka poʻe koʻikoʻi o nā mākua, ua kākau ʻia lākou ma ka buke o ka ʻoihana aliʻi a hiki i nā lā iā Iohanana ke keiki a ʻEliasiba.

²⁴ A ʻo ka poʻe koʻikoʻi o nā Levi, ʻo Hasabia, Serebeia a me Iesua ke keiki a Kademiʻela, a ʻo nā hoahānau o lākou ma ko lākou alo aku e hoʻonani a e hoʻoleʻa aku, e like me ke kauoha a Dāvida ke kanaka o ke Akua, he papa ma ke alo aku o kekahi papa.

²⁵ ʻO Matania, a me Bakebukia, ʻo ʻObadia, Mesulama, Telemona, ʻAkuba, he poʻe kiaʻi puka lākou e kiaʻi ana ma nā waihona waiwai o nā puka.

²⁶ ʻO ia nō ka poʻe i nā lā iā Ioiakima ke keiki a Iesua, ke keiki a Iozadaka, a i nā lā iā Nehemia ke kiaʻāina, a me ʻEzera ke kahuna, ke kākau ʻōlelo.

²⁷ ¶ A i ka hoʻolaʻa ʻana o ka pā o Ierusalema, ʻimi akula lākou i nā Levi mai loko mai o nā wahi a pau loa o lākou, e hoʻākoakoa mai iā lākou i Ierusalema, e hana i ka hoʻolaʻa ʻana me ka ʻoliʻoli, a me ka hoʻoleʻa ʻana aku a me ke mele, me nā kimebala, nā lira a me nā mea kani.

²⁸ Hoʻākoakoa ʻia maila ka poʻe mele mai ka pāpū mai a puni Ierusalema, a mai nā kauhale o ko Netopa.

²⁹ A mai loko mai o Gilegala, a mai nā ʻāina mai o Geba a me ʻAzemaveta; no ka mea, ua kūkulu ka poʻe mele i mau kauhale no lākou a puni Ierusalema.

³⁰ Huikala ihola nā kāhuna a me nā Levi iā lākou iho, a huikala nō hoʻi lākou i ka poʻe kānaka a me nā puka a me ka pā.

³¹ ¶ A laila alakaʻi aʻela au i nā luna o kā Iuda ma luna aʻe o ka pā, a hoʻomākaukau ihola au i ʻelua poʻe nui e hoʻoleʻa, e hele aʻe ma ka ʻaoʻao ʻākau aku kekahi, ma luna aʻe o ka pā a i ka Puka Lepo.

³² A hele aʻela ma hope o lākou ʻo Hosaia, a me ka hapalua o nā luna o kā Iuda,

³³ a me ʻAzaria, ʻEzera, a me Mesulama,

³⁴ Iuda a me Beniamina a me Samaia a me Ieremia,

³⁵ a me kekahi o nā keiki a nā kāhuna me nā pū puhi: ʻo Zekaria ke keiki a Ionatana, ke keiki a Semaia, ke keiki a Matania, ke keiki a Mikaia, ke keiki a Zakura, ke keiki a ʻAsapa;

³⁶ a me kona mau hoahānau, ʻo Semaia a me ʻAzaraʻela, Milalai, Gilalai, Maʻai, Netaneʻela a me Iuda, Hanani, me nā mea kani a Dāvida ke kanaka o ke Akua; a ʻo ʻEzera ke kākau ʻōlelo ma mua ia o lākou.

³⁷ A ma ka Puka Wai Puna e kū pono ana i ko lākou alo, piʻi aʻela lākou ma nā ʻānuʻunuʻu o ke kūlanakauhale o Dāvida ma kahi kiʻekiʻe o ka pā, ma luna aku o ka hale o Dāvida, a i ka Puka Wai ma ka hikina.

³⁸ ¶ A ʻo ka lua o ka poʻe hoʻoleʻa, hele aʻela lākou ma ka ʻaoʻao hema aku, a ʻo wau ma hope o lākou, a me ka hapalua o ka poʻe kānaka ma luna aʻe o ka pā, a ma luna aʻe o ka Hale Kiaʻi ma kahi o nā Umu a hiki i ka Pā Pālahalaha;

³⁹ a ma luna aʻe o ka puka o ʻEperaima, a ma luna aʻe o ka Puka Kahiko, a ma luna o ka Puka Iʻa, a me ka Hale Kiaʻi o Hananeʻela, a me ka Hale Kiaʻi o Mea, a hiki i ka Puka Hipa; a kū lākou ma ka Puka Hale Paʻahao.

⁴⁰ Kū ihola nā poʻe hoʻoleʻa ʻelua i loko o ka hale o ke Akua, a ʻo wau hoʻi, a me ka hapalua o nā luna me aʻu;

⁴¹ a me nā kāhuna; ʻEliakima, Maʻaseia, Miniamina, Mikaia, ʻElioenai, Zekaria, Hanania, me nā pū;

⁴² a me Maʻaseia, a me Semaia, a me ʻEleazara, a me ʻUzi a me Iehohanana, a me Malekia, a me ʻElama, a me ʻEzera. A hoʻoleʻa akula ka poʻe mele, a me Iezerahia ko lākou luna.

⁴³ Mōhai akula lākou ia lā i nā mōhai nui, a hauʻoli ihola; no ka mea, ua hoʻohauʻoli ke Akua iā lākou me ka ʻoliʻoli nui; hauʻoli nō hoʻi nā wāhine a me nā kamaliʻi; a lohea ka hauoli ʻana o Ierusalema ma kahi lōʻihi.

⁴⁴ ¶ A hoʻonoho ʻia ia lā kekahi poʻe kānaka ma luna o nā keʻena no nā mea laʻa, no nā makana, no nā hua mua, a no nā hapaʻumi, e hōʻiliʻili i loko o laila, na nā ʻāina mai o nā kūlanakauhale, i nā haʻawina i kauoha ʻia ai no ka poʻe kāhuna a me nā Levi; no ka mea, hauʻoli ihola kā Iuda ma luna o nā kāhuna a ma luna o nā Levi e kū mai ana.

⁴⁵ Mālama ihola ka poʻe mele a me ka poʻe kiaʻi puka i ka ʻoihana a ko lākou Akua, a me ka ʻoihana o ka huikala ʻana, e like me ke kauoha a Dāvida, a me Solomona kāna keiki.

⁴⁶ No ka mea, i nā lā o Dāvida a me ʻAsapa, mai ka wā kahiko mai, he poʻe luna nō ma luna o ka poʻe mele, a he mau mele nō e hoʻoleʻa aku ai a e hoʻonani aku ai i ke Akua.

⁴⁷ A i nā lā o Zerubabela a i nā lā o Nehemia, hāʻawi maila kā ʻIseraʻela a pau i nā haʻawina no ka poʻe mele a me ka poʻe kiaʻi puka, kekahi i kēlā lā i kēia lā; a hoʻāno aʻela lākou i nā mea no nā Levi; a hoʻāno aʻela ʻo nā Levi no nā mamo a ʻAʻarona.