KA BUKE A NEHEMIA 10 - Ka Baibala Hemolele

1 ʻO nā inoa o ka poʻe nāna i kau i ka sila e paʻa ai, a me nā mea a lākou i hoʻohiki ai e hana.

MOKUNA X.

¹ ¶ Eia hoʻi ka poʻe nāna i kau i ka sila e paʻa ai: ʻo Nehemia ke kiaʻāina, ke keiki a Hakalia, a ʻo Zidekia,

² Seraia, ʻAzaria, Ieremia,

³ Pasura, ʻAmaria, Malekia,

⁴ Hatusa, Sebania, Maluka,

⁵ Harima, Meremota, ʻObadia,

⁶ Daniʻela, Ginetona, Baruka,

⁷ Mesulama, ʻAbiia, Miiamina,

⁸ Maʻazia, Bilegai, Semaia; ʻo ia ka poʻe kāhuna.

⁹ ʻO nā Levi: ʻo Iesua ke keiki a ʻAzania, ʻo Binui kekahi o nā mamo a Henadada, ʻo Kademiʻela.

¹⁰ A ʻo ko lākou mau hoahānau: Sebania, Hodia, Kelita, Pelaia, Hanana,

¹¹ Mika, Rehoba, Hasabia,

¹² Zakura, Serebia, Sebania,

¹³ Hodia, Bani, Beninu.

¹⁴ ʻO ka poʻe koʻikoʻi o nā kānaka: Parosa, Pahata-Moaba, ʻElama, Zatu, Bani,

¹⁵ Buni, ʻAzegada, Bebai,

¹⁶ ʻAdoniia, Bigevai, ʻAdina,

¹⁷ ʻAtera, Hizekia, ʻAzura,

¹⁸ Hodia, Hasuma, Bezai,

¹⁹ Haripa, ʻAnatota, Nebai,

²⁰ Magepiasa, Mesulama, Hezira,

²¹ Mesezabeʻela, Zadoka, Iadua,

²² Pelatia, Hanana, ʻAnaia,

²³ Hosea, Hanania, Hasuba,

²⁴ Halohesa, Pileha, Sobeka,

²⁵ Rehuma, Hasabena, Maʻaseia,

²⁶ A me ʻAhia, Hanana, ʻAnana,

²⁷ Maluka, Harima, Baʻana.

²⁸ ¶ A ʻo ke koena o ka poʻe kānaka: ʻo nā kāhuna, ʻo nā Levi, ʻo ka poʻe kiaʻi puka, ʻo ka poʻe mele, ʻo ka poʻe Netini, a me ka poʻe a pau i hoʻokaʻawale ʻia aʻela mai loko mai o nā lāhui kanaka o nā ʻāina a ma ke Kānāwai o ke Akua, ko lākou poʻe wāhine, ʻo ko lākou poʻe keiki kāne a me kā lākou poʻe kaikamāhine, ka poʻe a pau e hiki iā lākou ke ʻike a e hoʻomaopopo hoʻi;

²⁹ hoʻopili maila lākou i ko lākou mau hoahānau, i nā luna o lākou, a hoʻohiki ihola me ka hoʻopaʻa loa ʻana e hele ma ke Kānāwai o ke Akua, ka mea i hāʻawi ʻia mai ma ka lima o Mose ke kauā a ke Akua, a e mālama a e hana i nā kauoha a pau a Iēhova ko kākou Haku, a me kāna mau ʻōlelo kūpaʻa a me kona mau kapu;

³⁰ a i hāʻawi ʻole aku mākou i kā mākou mau kaikamāhine i nā lāhui kanaka o ka ʻāina, a i lawe ʻole hoʻi mākou i kā lākou mau kaikamāhine na nā keiki kāne a mākou;

³¹ a inā e halihali mai nā kānaka ʻē i nā mea kālepa, a i kekahi ʻai paha, i ka lā Sābati e kūʻai, ʻaʻole mākou e lawe i kā lākou i ka Sābati, i ka lā hoʻāno; a i ka hiku o ka makahiki e hoʻōki mākou i kēlā ʻaiʻē kēia ʻaiʻē me ka hoʻokaʻa ʻole ʻia mai.

³² ¶ A kau ihola mākou ma luna o mākou iho i nā kānāwai e ʻauhau iā mākou iho i ka hapakolu o ka sekela i kēlā makahiki i kēia makahiki no ka ʻoihana o ka hale o ko mākou Akua:

³³ no ka berena hōʻike a me ka mōhai makana mau a me ka mōhai kuni mau, no nā Sābati, no nā Mahina Hou, no nā ʻahaʻaina i ʻōlelo ʻia ai, a no nā mea laʻa, a no nā mōhai hala e uhi ai i ka hala no kā ʻIseraʻela, a no nā ʻoihana a pau o ka hale o ko mākou Akua.

³⁴ ¶ A hailona ihola mākou, ʻo ka poʻe kāhuna, nā Levi a me ka poʻe kānaka, ma ko ka hale o ko mākou poʻe kūpuna, no ka hāʻawi ʻana mai i ka wahie e lawe mai ma ka hale o ko mākou Akua, i nā manawa i ʻōlelo ʻia ai, i kēlā makahiki i kēia makahiki, i mea puhi ma luna o ke kuahu o Iēhova ko mākou Akua, e like me ka mea i kākau ʻia ai i loko o ke Kānāwai.

³⁵ A e lawe mai i nā mea i ʻohi mua ʻia o ko mākou ʻāina, a me nā mea i ʻohi mua ʻia o kēlā hua kēia hua o nā lāʻau a pau, i kēlā makahiki kēia makahiki, ma ka hale o Iēhova;

³⁶ a me nā hiapo o kā mākou poʻe keiki kāne, a me kā mākou poʻe holoholona, e like me ka mea i kākau ʻia ai i loko o ke Kānāwai, a me nā mea hānau mua o kā mākou poʻe bipi a me kā mākou ʻohana hipa, e lawe mai nō ma ka hale o ko kākou Akua, i nā kāhuna e lawelawe ana ma ka hale o ko kākou Akua;

³⁷ a i lawe mākou i kauwahi hana mua ʻia o kā mākou palaoa kāwili ʻia, a me nā makana a mākou, a me ka hua o kēlā lāʻau o kēia lāʻau, ka waina a me ka ʻaila, i nā kāhuna ma nā keʻena o ka hale o ko kākou Akua; a me ka hapaʻumi o kā mākou mahina ʻai i nā Levi, a na lākou nō, na nā Levi ka hapaʻumi ma nā kūlanakauhale a pau o ko mākou mahi ʻana.

³⁸ A ʻo ke kahuna, ka mamo a ʻAʻarona, ʻo ia pū kekahi me nā Levi i ka lawe ʻana o nā Levi i ka hapaʻumi; a e halihali mai nā Levi i ka hapaʻumi o ka hapaʻumi ma ka hale o ko kākou Akua ma nā keʻena i loko o ka hale waihona waiwai.

³⁹ No ka mea, e lawe nō kā ʻIseraʻela a me nā Levi i ka hoʻokupu ʻana o ka ʻai, ʻo ka waina a me ka ʻaila ma nā keʻena, a ma laila nō nā ipu o ka luakini, a me nā kāhuna nāna e lawelawe, a me ka poʻe kiaʻi puka, a me ka poʻe mele; ʻaʻole mākou e haʻalele i ka hale o ko kākou Akua.