KA BUKE A IOSUA 7 - Ka Baibala Hemolele

1 Ka hewa o ʻAkana, a me ke kaua ma ʻAi.

MOKUNA VII.

¹ ¶ Lawe hala ihola nā mamo a ʻIseraʻela ma ka mea laʻa; no ka mea, ʻo ʻAkana, ke keiki a Karemi, ke keiki a Zabedi, ke keiki a Zera, no ka ʻohana o Iuda, lālau akula ia i ka mea laʻa, a laila, wela ihola ka inaina o Iēhova i nā mamo a ʻIseraʻela.

² ¶ Hoʻouna akula ʻo Iosua i mau kānaka, mai Ieriko aku a ʻAi, ma ke alo o Bete ‘Avena, ma ka hikina o Betela, ʻōlelo akula iā lākou, ʻī akula, “Ō piʻi ʻoukou, a e mākaʻi i ka ʻāina.” Piʻi akula ua mau kānaka lā, mākaʻi ihola iā ʻAi.

³ Hoʻi maila lākou iā Iosua, ʻōlelo mai iā ia, “Mai piʻi aku nā kānaka a pau. ʻElua tausani kānaka e piʻi, ʻekolu paha, a e luku iā ʻAi, mai hoʻokaumaha i nā kānaka a pau ma laila; no ka mea, ua ʻuʻuku lākou.”

⁴ Piʻi akula i laila, ʻekolu tausani kānaka o lākou; a heʻe ihola lākou i mua o nā kānaka o ʻAi.

⁵ Pepehi maila nā kānaka o ʻAi i kanakolukumamāono o lākou; a hahai iā lākou mai ka puka mai a hiki i Sebarima, a i ka iho ʻana, pepehi maila lākou. Maʻule ihola ka naʻau o kānaka, a lilo ihola i mea e like me ka wai.

⁶ ¶ Haehae ihola ʻo Iosua i kona ʻaʻahu, moe ihola kona alo i lalo i ka lepo i mua o ka pahu o Iēhova, i ke ahiahi, ʻo ia, a me nā lunakahiko o kā ʻIseraʻela, kau aʻela i ka lepo ma luna o ko lākou poʻo iho.

⁷ ʻŌlelo akula ʻo Iosua, “Auē, e Iēhova, e ka Haku ē! No ke aha lā ʻoe i lawe iki mai ai i kēia poʻe kānaka, ma kēia ʻaoʻao o Ioredane, e hāʻawi iā mākou i ka lima o kā ʻAmora, e make ai mākou? E aho i ʻoluʻolu mākou, e noho ma kēlā ʻaoʻao o Ioredane!

⁸ “E koʻu Haku, he aha lā kaʻu e ʻōlelo aku ai, i ka wā e huli ai kā ʻIseraʻela i ko lākou kua i nā ʻenemi o lākou?

⁹ “E lohe auaneʻi ko Kanaʻana, a me ka poʻe a pau e noho lā ma ka ʻāina, a e hoʻopuni mai lākou iā mākou, a e hōʻoki loa lākou i ko mākou inoa, mai ka honua aku. Pehea lā ʻoe e hana ai i kou inoa nui?”

¹⁰ ¶ ʻŌlelo maila ʻo Iēhova iā Iosua, “E kū mai ʻoe i luna! He aha lā kāu e moe nei i lalo ke alo?

¹¹ “Ua lawehala kā ʻIseraʻela, ua ʻae hoʻi lākou ma luna o kaʻu berita, aʻu i kauoha aku ai iā lākou, a ua lawe hoʻi lākou i ka mea laʻa, a ua ʻaihue a ua hoʻopunipuni hoʻi, a ua waiho pū nō hoʻi ia mea me ko lākou mea iho.

¹² “No laila, ʻaʻole hiki i nā mamo a ʻIseraʻela, ke kū i mua o ko lākou poʻe ʻenemi, ua huli lākou i ko lākou kua i nā ʻenemi o lākou; no ka mea, ua laʻa lākou; ʻaʻole loa hoʻi au e noho pū hou me ʻoukou, ke hoʻopau ʻole ʻoukou ia mea laʻa mai o ʻoukou aku.

¹³ “E kū i luna, a e hoʻomaʻemaʻe i kānaka, a e ʻōlelo aku, ‘E hoʻomaʻemaʻe ʻoukou iā ʻoukou iho, no ka lā ʻapōpō; no ka mea, ke ʻī mai nei ʻo Iēhova, ke Akua o kā ʻIseraʻela penei, “He mea laʻa i waena pono o ʻoukou, e kā ʻIseraʻela; ʻaʻole ʻoukou e hiki ke kū i mua o ko ʻoukou ʻenemi a kipaku ʻoukou i kēlā mea laʻa, mai o ʻoukou aku.”

¹⁴ ‘I ke kakahiaka, e neʻe mai ʻoukou ma ko ʻoukou ʻohana; a ʻo ka ʻohana a Iēhova e lawe ai, e neʻeneʻe mai lākou ma ko lākou hale; a ʻo ka hale a Iēhova e lawe ai, e neʻe mai lākou ma ko lākou ʻōhua; a ʻo ko ka ʻōhua a Iēhova e lawe ai, e neʻe pākahi mai nā kānaka.

¹⁵ ‘Eia hoʻi ka hope, ʻO ka mea e loaʻa me ka mea laʻa, e puhi ʻia ʻo ia i ke ahi, ʻo ia, a me kona mea a pau; no ka mea, ua ʻae ʻo ia ma luna o ka berita o Iēhova, a ua hana i ka mea lapuwale ma waena o kā ʻIseraʻela.’”

¹⁶ ¶ Ala maila ʻo Iosua i ke kakahiaka, a alakaʻi maila i kā ʻIseraʻela ma ko lākou ʻohana, a ua lawe ʻia ka ʻohana a Iuda.

¹⁷ Alakaʻi maila ia i ka ʻohana a Iuda, a lawe ʻia ihola ka hale a Zara. A alakaʻi maila ia i ka hale a Zara, pākahi ke kanaka, a ua lawe ʻia ʻo Zabedi.

¹⁸ Alakaʻi pākahi maila ia i ko kāna ʻohana, a ua lawe ʻia ʻo ʻAkana, ke keiki a Karemi, ke keiki a Zabedi, ke keiki a Zera, no ka ʻohana a Iuda.

¹⁹ ʻŌlelo maila ʻo Iosua iā ʻAkana, “E kuʻu keiki, e hoʻomaikaʻi aku ʻoe iā Iēhova, i ke Akua o kā ʻIseraʻela, a e haʻi maopopo aku iā ia, a e hōʻike mai iaʻu i ka mea āu i hana ai. Mai hūnā iaʻu.”

²⁰ Pane akula ʻo ʻAkana iā Iosua, ʻī akula, “ʻOiaʻiʻo nō, ua hana hewa wau iā Iēhova i ke Akua o kā ʻIseraʻela, a penei nō hoʻi kaʻu i hana aku ai:

²¹ i koʻu ʻike ʻana aku ma loko o ka waiwai pio, he ʻaʻahu maikaʻi no Babulona, a ʻelua haneri paha sekela kālā, a me kekahi ʻaukā gula, he kanalima sekela, kuko ihola au, a lawe nō; a ua hūnā ʻia ma ka lepo ma loko o koʻu halelewa, a aia ke kālā ma lalo iho o ia mea.”

²² ¶ Hoʻouna akula ʻo Iosua i mau ʻelele, a holokikī lākou i ka halelewa; aia hoʻi, ua hūnā ʻia, ma loko o ka halelewa, a ʻo ke kālā hoʻi ma lalo iho.

²³ A lawe lākou i ua mau mea lā ma waho o ka halelewa, a lawe maila i o Iosua lā, a i nā mamo a pau a ʻIseraʻela, a hāliʻi ihola lākou ia mau mea i mua o Iēhova.

²⁴ Lālau akula ʻo Iosua, a me kā ʻIseraʻela a pau iā ʻAkana, i ke keiki a Zera, a me ke kālā, a me ka ʻaʻahu, a me ka ʻaukā gula, a me kāna mau keiki kāne, a me kāna mau kaikamāhine, a me kona mau bipi, a me kona mau hoki, a me kona mau hipa, a me kona halelewa, a me kona mau mea a pau, a lawe iā lākou i ke awāwa ʻo ʻAkora.

²⁵ ʻŌlelo akula ʻo Iosua, “No ke aha lā ʻoe i hana ʻino mai ai iā mākou? E hana ʻino mai ana ʻo Iēhova iā ʻoe i kēia lā.” A ʻo kā ʻIseraʻela a pau, hailuku akula lākou iā ia i ka pōhaku, a pau ko lākou hailuku ʻana i ka pōhaku, pupuhi ʻia ihola lākou i ke ahi.

²⁶ Hoʻopuʻu ihola lākou i ahu pōhaku ma luna ona, a hiki mai i nēia lā. A laila huli maila ʻo Iēhova, mai ka wela mai o kona huhū. No ia mea, ua kapa ʻia aku ka inoa o ia wahi, ʻo ke awāwa ʻo ʻAkora a hiki i kēia lā.