KA BUKE A IOSUA 4 - Ka Baibala Hemolele

1 Nā pōhaku hōʻailona he ʻumikumamālua, 10 a me ka hele ʻana o nā mamo a ʻIseraʻela.

MOKUNA IV.

¹ ¶ A pau ka lāhui kanaka i ka hele i kēlā kapa o Ioredane, a laila ʻōlelo maila ʻo Iēhova iā Iosua, ʻī maila:

² “E lawe ʻoukou no ʻoukou iho, i ʻumi kānaka a me kumamālua, mai loko mai o ka poʻe kānaka, e pākahi ke kanaka i ka ʻohana hoʻokahi.

³ “A e kauoha aku iā lākou, penei, ‘E lawe aku ʻoukou, mai loko aku o Ioredane nei no kahi i kū ai nā wāwae o nā kāhuna, i nā pōhaku he ʻumi a me kumamālua, a e lawe pū ia mau mea me ʻoukou, a e waiho ma kahi a ʻoukou e hoʻomoana ai i kēia pō.’”

⁴ Hea akula ʻo Iosua i ka poʻe kānaka he ʻumikumamālua, āna i hoʻomākaukau ai no nā mamo a ʻIseraʻela, pākahi ke kanaka i ka ʻohana hoʻokahi;

⁵ ‘ōlelo maila ʻo Iosua iā lākou, “E hele aʻe ʻoukou ma mua o ka pahu o Iēhova, ʻo ko ʻoukou Akua, ma loko o Ioredane, a e lawe pākahi ke kanaka ma kona poʻohiwi i ka pōhaku no ʻoukou; e hoʻohālike i ka helu ʻana me nā ʻohana o nā mamo a ʻIseraʻela.

⁶ “I lilo kēia i hōʻailona no ʻoukou, i ka wā e nīnau mai ai kā ʻoukou poʻe keiki ma hope aku nei, i ka ʻī ʻana mai, ‘He mea aha kēia mau pōhaku iā ʻoukou?’

⁷ “A laila, e haʻi aku ʻoukou iā lākou, ua hoʻokaʻawale ʻia nā wai o Ioredane i mua o ka pahu berita o Iēhova. I ka wā i hele ai ia ma loko o Ioredane, ua hoʻokaʻawale ʻia nā wai o Ioredane; a e lilo nō kēia mau pōhaku i hōʻailona mau loa e hoʻomanaʻo ai nā mamo a ʻIseraʻela.”

⁸ ¶ Hana ihola nā mamo a ʻIseraʻela pēlā, e like me kā Iosua i kauoha mai ai, a lawe lākou i ʻumikumamālua pōhaku, mai loko mai o Ioredane, me ka ʻōlelo a Iēhova iā Iosua, e like hoʻi me ka helu ʻana o nā ʻohana o nā mamo a ʻIseraʻela, a lawe pū aʻela me lākou a hiki i kahi a lākou i moe ai, a waiho ihola ma laila.

⁹ Kūkulu ihola ʻo Iosua i ʻumikumamālua pōhaku ma loko o Ioredane, ma kahi i kū ai nā kapuaʻi o nā kāhuna, ʻo ka poʻe lawe i ka pahu berita. Ma laila nō i waiho ʻia ai ia mau mea a hiki loa mai i kēia lā.

¹⁰ A ʻo nā kāhuna, ka poʻe i lawe i ka pahu, kū mālie lākou ma loko o Ioredane, a pau i ka hana ʻia nā mea a Iēhova i kauoha mai ai iā Iosua e ʻōlelo mai i kānaka, e like hoʻi me nā mea a pau a Mose i kauoha mai ai iā Iosua. Wikiwiki ihola nā kānaka, a hele akula i kēlā kapa.

¹¹ A pau nā kānaka i ka hele aʻe, a laila, hele aʻela no ka pahu o Iēhova, a me nā kāhuna i mua o nā kānaka.

¹² A ʻo nā mamo a Reubena, a me nā mamo a Gada a me ka ʻohana hapa a Manase, hele mākaukau lākou ma mua o nā mamo a ʻIseraʻela, e like me ka ʻōlelo a Mose iā lākou.

¹³ Hoʻokahi kanahā tausani o ia pūʻali mākaukau i ke kaua, i hele aʻe i mua o Iēhova i ke kaua i nā wahi pāpū o Ieriko.

¹⁴ Ia lā, hoʻokiʻekiʻe maila ʻo Iēhova iā Iosua, i nā maka o kā ʻIseraʻela a pau, a makaʻu nō lākou iā ia i nā lā a pau o kona ola ʻana, me lākou i makaʻu ai iā Mose.

¹⁵ ¶ ʻŌlelo maila ʻo Iēhova iā Iosua, ʻī maila,

¹⁶ “E kauoha aʻe ʻoe i nā kāhuna, i ka poʻe i lawe i ka pahu Kānāwai, e piʻi lākou mai loko mai o Ioredane.”

¹⁷ Kauoha maila nō ʻo Iosua i nā kāhuna, ʻī maila, “E piʻi mai ʻoukou mai loko mai o Ioredane.”

¹⁸ A i ka wā i piʻi aku ai nā kāhuna, ka poʻe i lawe i ka pahu berita o Iēhova, mai loko mai o Ioredane, a pae nā kapuaʻi o nā kāhuna ma kahi maloʻo, a laila, hoʻi hou nā wai o Ioredane i ko lākou wahi, a kahe hou nō ma luna o kona kapa a puʻu, e like ma mua.

¹⁹ ¶ Piʻi akula nā kānaka a pau, mai loko mai o Ioredane, i ka lā ʻumi o ka malama mua, a hoʻomoana ihola lākou ma Gilegala ma ka palena o Ieriko, aia ma ka hikina.

²⁰ A ʻo kēlā mau pōhaku, he ʻumikumamālua a lākou i lawe mai ai, mai Ioredane mai, kūkulu ihola ʻo Iosua ma Gilegala.

²¹ ʻŌlelo maila ia i nā mamo a ʻIseraʻela, ʻī maila, “I ka wā e nīnau mai ai kā ʻoukou poʻe keiki i ko lākou makua kāne ma hope aku nei, i ka ʻī ʻana mai, ‘He mea aha kēia mau pōhaku?’

²² “A laila, e hōʻike aku ʻoukou i kā ʻoukou poʻe keiki, me ka ʻī ʻana aku, ‘Ma kahi maloʻo i hele mai ai kā ʻIseraʻela,’ a hiki i kēia ʻaoʻao o Ioredane nei.

²³ “No ka mea, ua hoʻomaloʻo mai ʻo Iēhova, ko ʻoukou Akua i nā wai o Ioredane, ma mua o ʻoukou, a pau ʻoukou i ka hele aʻe, e like me kā Iēhova ko ʻoukou Akua i hana ai i ke Kai ʻUla, i ka mea āna i hoʻomaloʻo ai ma mua o kākou, a hala aʻe kākou;

²⁴ i ʻike nā kānaka a pau o ka honua nei i ka lima o Iēhova, ua ikaika ia; i makaʻu hoʻi ʻoukou iā Iēhova, i ko ʻoukou Akua, i nā lā a pau loa.”