KA BUKE A IOSUA 3 - Ka Baibala Hemolele

1 Ka hele ʻana aʻe o nā mamo a ʻIseraʻela ma loko o Ioredane, a komo i ka ʻāina ʻo Kanaʻana.

MOKUNA III.

¹ ¶ Kū aʻela ʻo Iosua i kakahiaka, a hele akula, mai Sitima aku, a hiki akula i Ioredane, ʻo ia, a me nā mamo a pau a ʻIseraʻela, a ma laila lākou i hoʻomoana ai ma mua o ko lākou hele ʻana aʻe i kēlā kapa.

² Eia hoʻi kekahi, i ka pau ʻana o nā lā ʻekolu, hele aʻela nā luna ma waena o ka poʻe kānaka;

³ kauoha maila iā lākou, ʻī maila, “A ʻike ʻoukou i ka pahu berita a Iēhova a ko ʻoukou Akua, a me ka poʻe kāhuna nā Levi e amo ana ia mea; a laila ʻoukou e haʻalele ai i ko ʻoukou wahi, a e hahai ma muli o ia mea.

⁴ “I wahi kaʻawale hoʻi ma waena o ia mea a me ʻoukou, i ʻelua tausani kūbita paha ka lōʻihi. Mai hoʻokokoke aku, i ʻike ʻoukou i ke ala a ʻoukou e hele ai; no ka mea, ʻakahi nō ʻoukou a hele i kēia ala.”

⁵ ¶ ʻŌlelo maila ʻo Iosua i nā kānaka, “E huikala ʻoukou iā ʻoukou iho; no ka mea, ʻapōpō e hana mai nō ʻo Iēhova i nā mea kupanaha i waena o ʻoukou.”

⁶ ʻŌlelo maila, ʻo Iosua i nā kāhuna, ʻī maila, “E hāpai i ka pahu berita, a e hele aʻe i mua o nā kānaka.” Hāpai aʻela lākou i ka pahu berita, hele akula i mua o nā kānaka.

⁷ ¶ ʻŌlelo maila ʻo Iēhova iā Iosua, “I kēia lā nō, e hoʻomaka au i ka hoʻokiʻekiʻe iā ʻoe i mua o kā ʻIseraʻela a pau, i ʻike lākou i koʻu noho pū ʻana me ʻoe, e like me aʻu i noho pū ai me Mose.

⁸ “E kauoha aku ʻoe i nā kāhuna, i ka poʻe halihali i ka pahu berita, e ʻī aku, ‘A hiki ʻoukou ma ka lihi wai o Ioredane, e kū mālie ʻoukou ma loko o Ioredane.’”

⁹ ʻŌlelo maila ʻo Iosua i nā mamo a ʻIseraʻela, “E neʻeneʻe mai ʻoukou, a e hoʻolohe i nā ʻōlelo a Iēhova a ko ʻoukou Akua.”

¹⁰ ʻĪ maila ʻo Iosua, “Eia ka mea e ʻike ai ʻoukou i ka noho pū ʻana o ke Akua ola me ʻoukou, a e ʻoiaʻiʻo nō, e kipaku aku ia ma mua o ʻoukou i kā Kanaʻana, a me kā Heta, a me kā Heva, a me kā Pereza, a me kā Giregasa, a me kā ʻAmora, a me kā Iebusa.

¹¹ “Aia hoʻi, ke hele aʻe nei ka pahu berita a ka Haku o ka honua a pau, ma mua o ʻoukou i loko o Ioredane.

¹² “E lawe hoʻi ʻoukou, no ʻoukou, i ʻumi kānaka a me kumamālua, mai loko mai o nā ʻohana a ʻIseraʻela, pākahi ke kanaka i ka ʻohana hoʻokahi.

¹³ “A hiki i ka wā e hoʻomaha ai ma loko o ka wai o Ioredane nā kapuaʻi o ka poʻe kāhuna nāna e lawe ka pahu o Iēhova, ka Haku o ka honua a pau; a laila, e hoʻokaʻawale ʻia nā wai o Ioredane, ʻo nā wai e kahe ana mai luna mai, a e kū nō i luna me he puʻu lā.”

¹⁴ ¶ Pēlā ʻiʻo nō, i ka wā i hele aku ai nā kānaka, mai ko lākou wahi aku i hoʻomoana ai, e hele i kēlā kapa o Ioredane, a hāpai ka poʻe kāhuna i ka pahu berita i mua o nā kānaka.

¹⁵ A hiki ka poʻe i halihali i ka pahu i Ioredane, a komo nā wāwae o nā kāhuna, ka poʻe i halihali i ka pahu ma ka lihi wai, (no ka mea, i ka manawa e oʻo ai ka ʻai, ua hālana ʻo Ioredane ma luna o kona kapa a pau),

¹⁶ a laila, kū mālie nō nā wai i kahe ma luna mai, a piʻi akula, a lilo i puʻu lōʻihi loa a hiki wale aku i ke kūlanakauhale i ʻAdama, e pili ana i Zaretana; a ʻo ka wai i kahe ma ke kai o ka pāpū, ʻo ia hoʻi ka Moana Kai, moku ihola ia a maloʻo; a hele akula nā kānaka i kēlā kapa, ma ke alo o Ieriko.

¹⁷ Kū mālie ihola nā kāhuna, ka poʻe lawe i ka pahu berita o Iēhova, ma kahi maloʻo, ma waena o Ioredane, a hele kā ʻIseraʻela a pau ma ka ʻāina maloʻo, a pau loa ia lāhui kanaka i ka hala i kēlā kapa o Ioredane.