KA BUKE A IOSUA 24 - Ka Baibala Hemolele

1 No ka lokomaikaʻi o Iēhova i nā mamo a ʻIseraʻela.

MOKUNA XXIV.

¹ ¶ A laila, hōʻiliʻili maila ʻo Iosua i nā ʻohana a pau a ʻIseraʻela ma Sekema, a kāhea akula ʻo ia i nā lunakahiko a ʻIseraʻela, a me ko lākou aliʻi, a me ko lākou luna kānāwai, a me ka poʻe luna o lākou; a noho ihola lākou i mua o ke alo o ke Akua.

² ʻŌlelo maila ʻo Iosua i nā kānaka a pau, “Ke ʻī mai nei ʻo Iēhova, ke Akua o ʻIseraʻela penei, ‘Ua noho nō ko ʻoukou kūpuna ma kēlā kapa o ka muliwai, i ka wā kahiko, ʻo Tera ka makua kāne o ʻAberahama, ʻo ka makua kāne hoʻi o Nahora; a mālama nō lākou i nā akua ʻē.

³ ‘A lawe au i ko ʻoukou kupuna iā ʻAberahama, mai kēlā kapa aʻe o ka muliwai, a alakaʻi au iā ia i nā ʻāina a pau ʻo Kanaʻana nei, a hoʻonui i kona hua, a hāʻawi nō au iā ʻIsaʻaka nāna.

⁴ ‘A hāʻawi au na ʻIsaʻaka iā Iakoba a me ʻEsau; a hāʻawi au na ʻEsau i ka mauna ʻo Seira, i wahi e noho ai nona; akā, ʻo Iakoba a me kāna mau keiki, hele lākou i lalo i ʻAigupita.

⁵ ‘Hoʻouna aku au iā Mose, a me ʻAʻarona, a hoʻomāinoino au iā ʻAigupita, ma ka mea aʻu i hana ai ma waena o lākou; a ma hope iho, lawe mai au iā ʻoukou ma waho.

⁶ ‘A lawe mai nō au i ko ʻoukou poʻe mākua, mai ʻAigupita mai; a hele mai lākou a hiki i ke kai, a hahai mai ka poʻe ʻAigupita ma hope o ko ʻoukou poʻe mākua, me nā hale kaʻa, a me ko lākou poʻe holo lio, a hiki i ke Kai ʻUla.

⁷ ‘A kāhea lākou iā Iēhova, a laila, kau ʻo ia i ka pōʻeleʻele ma waena o ʻoukou a me ko ʻAigupita, hoʻopopoʻi mai ʻo ia i ke kai, a uhi mai ma luna o lākou. Pēlā nō i ʻike ai ko ʻoukou mau maka i nā mea a pau aʻu i hana ai i ko ʻAigupita; a ua noho ʻoukou ma ka wao nahele, i nā lā he nui loa.

⁸ ‘A ua alakaʻi mai nei au iā ʻoukou i ka ʻāina o kā ʻAmora, ka poʻe i noho ma kēlā kapa o Ioredane, a kaua mai lākou iā ʻoukou; akā, hāʻawi nō wau iā lākou i loko o ko ʻoukou mau lima, a noho ʻoukou ma ko lākou ʻāina; a luku akula au iā lākou i mua o ʻoukou.

⁹ ‘A laila kū i luna ʻo Balaka, ke keiki a Zipora, ʻo ke aliʻi o Moaba, a kaua mai ʻo ia i kā ʻIseraʻela, a hoʻouna akula ʻo ia, a kāhea akula iā Balaʻama, i ke keiki a Beora e ʻōlelo hōʻino iā ʻoukou.

¹⁰ ‘Akā, ʻaʻole au i makemake e hoʻolohe iā Balaʻama; no ia mea, hoʻomaikaʻi mai ʻo ia iā ʻoukou, a hoʻopakele au iā ʻoukou, mai kona lima aku.

¹¹ ‘A hele mai ʻoukou, ma luna, mai o Ioredane, a hiki i Ieriko; a kaua mai ka poʻe noho ma Ieriko iā ʻoukou, a me kā ʻAmora, a me kā Pereza, a me ko Kanaʻana; a me kā Heta, a me kā Giregasa, a me kā Heva, a me kā Iebusa; a hāʻawi au iā lākou i ko ʻoukou mau lima.

¹² ‘A hoʻouna au i mua o ʻoukou i nā nalo hope ʻeha, a kipaku akula au iā lākou, mai ko ʻoukou alo aku, i nā aliʻi ʻelua o kā ʻAmora; ʻaʻole na kā ʻoukou pahi kaua, ʻaʻole nō hoʻi na kā ʻoukou kakaka.

¹³ ‘A hāʻawi au iā ʻoukou i ka ʻāina nona ʻoukou i hoʻoluhi ʻole ai, a me nā kūlanakauhale i kūkulu ʻole ʻia ai e ʻoukou, a ke noho nei ʻoukou ma laila; a ke ʻai nei ʻoukou i kona māla waina, a me nā māla ʻoliva a ʻoukou i kanu ʻole ai.’

¹⁴ ¶ “ʻĀnō lā, e makaʻu ʻoukou iā Iēhova, a e mālama iā ia, me ka manaʻo maikaʻi, a me ka ʻoiaʻiʻo; a e haʻalele ʻoukou i nā akua a ko ʻoukou mau mākua i mālama ai, ma kēlā kapa aku o ka muliwai, a ma ʻAigupita; a e mālama ʻoukou iā Iēhova.

¹⁵ “A inā he mea ʻino i ko ʻoukou manaʻo ke mālama iā Iēhova, e koho ʻoukou i kēia lā i kā ʻoukou mea e mālama aku ai; i nā akua paha a ko ʻoukou poʻe kūpuna i mālama ai ma kēlā kapa aku o ka muliwai, i nā akua paha o kā ʻAmora, no lākou nō ka ʻāina e noho nei ʻoukou; akā, ʻo wau, a me ko ka hale oʻu, e mālama mākou iā Iēhova.”

¹⁶ ¶ A laila, ʻōlelo akula nā kānaka, ʻī maila, “ʻAʻole loa mākou e haʻalele iā Iēhova, a e mālama i nā akua ʻē;

¹⁷ no ka mea, ʻo Iēhova, ko kākou Akua, ʻo ia nō ka mea nāna i lawe mai iā kākou, a me ko kākou poʻe mākua mai ka ʻāina ʻo ʻAigupita mai, mai loko mai hoʻi o ka hale hoʻoluhi; ka mea nāna i hana i nā mea nui i mua o ko kākou mau maka, a mālama mai ʻo ia iā kākou ma ke alanui a pau a kākou i hele mai ai, a ma waena o nā kānaka a pau ma kahi a kākou i hele ai.

¹⁸ “A na Iēhova nō i kipaku aku, mai ko kākou alo aku i nā kānaka a pau, i kā ʻAmora, i noho i ka ʻāina; ʻānō lā e mālama kākou iā Iēhova; no ka mea, ʻo ia nō ko kākou Akua.”

¹⁹ ¶ A ʻōlelo maila ʻo Iosua i nā kānaka, “ʻAʻole hiki iā ʻoukou ke mālama iā Iēhova; no ka mea, he Akua ʻihiʻihi ʻo ia, he Akua lili nō hoʻi; ʻaʻole e kala mai ʻo ia i ko ʻoukou hala, a me ko ʻoukou hewa.

²⁰ “No ka mea, inā e haʻalele ʻoukou iā Iēhova, a e mālama i nā akua ʻē, a laila e huli ʻo ia a e hōʻino mai ʻo ia iā ʻoukou, a e hoʻopau ʻo ia iā ʻoukou ma hope iho o kona lokomaikaʻi ʻana mai iā ʻoukou.”

²¹ A laila, ʻōlelo akula nā kānaka iā Iosua, “ʻAʻole loa pēlā; no ka mea, e mālama aku nō mākou iā Iēhova!”

²² ʻŌlelo maila ʻo Iosua i nā kānaka, “He poʻe hōʻike ʻoukou no ʻoukou iho, ua koho ʻoukou iā Iēhova no ʻoukou, e mālama aku iā ia.” ʻŌlelo akula lākou, “He poʻe hōʻike nō mākou!”

²³ “ʻĀnō lā, e kipaku ʻoukou i nā akua ʻē, mai ko ʻoukou alo aku, a e hoʻopili ʻoukou me ko ʻoukou naʻau iā Iēhova i ke Akua o kā ʻIseraʻela.”

²⁴ ʻŌlelo akula nā kānaka iā Iosua, “ʻO Iēhova, ʻo ko kākou Akua, ʻo kā mākou ia e mālama aku ai, a ʻo kona leo kā mākou e hoʻolohe aku ai!”

²⁵ A hana ihola ʻo Iosua i berita me nā kānaka i kēlā lā, a waiho ʻo ia no lākou i ke kānāwai a me ke kapu ma Sekema.

²⁶ A kākau ihola ʻo Iosua i kēia mau ʻōlelo ma loko o ka Buke o ke Kānāwai o ke Akua, a lawe nō hoʻi ʻo ia i pōhaku nui, a kūkulu ihola i ua pōhaku lā ma laila, ma ka lāʻau e kokoke ana i ka halelewa o Iēhova.

²⁷ ʻŌlelo akula ʻo Iosua i nā kānaka a pau, “Eia hoʻi kēia pōhaku, ʻo ia ko kākou mea hōʻike; no ka mea, ua lohe ia mea i nā ʻōlelo a pau a Iēhova, āna i kauoha mai ai iā kākou; a he mea hōʻike nō ia no ʻoukou, o hōʻole ʻoukou i ke Akua.”

²⁸ A hoʻokuʻu akula ʻo Iosua i ka poʻe kānaka, i kēlā kanaka i kēia kanaka i kona ʻāina.

²⁹ ¶ Ma hope iho o kēia mau mea, make ihola ʻo Iosua, ke keiki a Nuna, ke kauā a Iēhova, a ʻo kona mau lā a pau, hoʻokahi ia haneri makahiki a me ka ʻumi keu.

³⁰ A kanu ihola lākou iā ia ma ke kihi o kona ʻāina, ma Timena Sera, ma ka puʻu ʻo ʻEperaima, ma ke kūkulu ʻākau o ka puʻu ʻo Gaʻasa.

³¹ A mālama nō kā ʻIseraʻela iā Iēhova i nā lā a pau o Iosua, a i nā lā a pau o nā lunakahiko, i ola ma hope iho o Iosua, ka poʻe i ʻike i nā mea a pau a Iēhova i hana mai ai i kā ʻIseraʻela.

³² ¶ A ʻo nā iwi o Iosepa a nā mamo a ʻIseraʻela i lawe mai ai, mai ʻAigupita mai, kanu ihola lākou ia mea ma Sekema, i kahi ma ke kula a Iakoba i kūʻai ai me nā keiki a Hamora, ka makua o Sekema, i nā moni hoʻokahi haneri; a ili mai nō ia no nā keiki a Iosepa.

³³ A make ʻo ʻEleazara ke keiki a ʻAʻarona; a kanu ihola lākou iā ia ma ka puʻu ʻo Pinehasa ʻo kāna keiki, i hāʻawi ʻia mai nona ma ka mauna ʻo ʻEperaima.