KA BUKE A IOSUA 19 - Ka Baibala Hemolele

1 Ka ʻāina no Simeona a me Zebuluna. 17 No ʻIsakara hoʻi, a me ʻAsera. 32 No Napetali, a me Dana.

MOKUNA XIX.

¹ ¶ Ua puka mai ka lua o nā hailona ʻana no Simeona, no ka ʻohana a ka poʻe mamo a Simeona ma muli o ko lākou mau ʻōhua; a aia ko lākou ʻāina hoʻoili ma waena o ka ʻāina hoʻoili o ka poʻe mamo a Iuda.

² Aia i loko o ko lākou hoʻoilina o Beʻeraseba, a me Seba, a me Molada,

³ ʻo Hazara Suala, a me Bala, a me ʻAzema,

⁴ ʻo ʻEletolada, a me Betula, a me Horema,

⁵ ʻo Zikelaga, a me Bete Marekabota, a me Hazara Susa,

⁶ a me Bete Lebaota, a me Saruhena: he ʻumikumamākolu mau kūlanakauhale a me ko lākou mau kauhale;

⁷ ʻo ʻAina, ʻo Rimona, a me ʻEtera, a me ʻAsana: ʻehā kūlanakauhale a me ko lākou mau kauhale;

⁸ ʻo nā kauhale a pau a puni i kēia mau kūlanakauhale a hiki i Baʻalate Beʻera, ʻo Ramata ma ka Hema. ʻO ia ka hoʻoilina o ka ʻohana o ka poʻe mamo a Simeona ma muli o ko lākou mau ʻōhua.

⁹ Ma ka hoʻoilina o ka poʻe mamo a Iuda ka hoʻoilina o ko Simeona poʻe mamo; no ka mea, ʻo ke kuleana o kā Iuda ua nui loa aku ia no lākou; no laila ua loaʻa ka noho ʻana i kā Simeona poʻe mamo ma waena o ko lākou.

¹⁰ ¶ Ua puka mai ke kolu o ka hailona ʻana no kā Zebuluna poʻe mamo ma muli o ko lākou mau ʻōhua; a ʻo ka mokuna o ko lākou ʻāina hoʻoili aia nō ia i Sarida.

¹¹ Ua moe aʻe ko lākou mokuna ma kai, a me Marala, ua pili ia i Dabaseta, a ua hiki lā i ka muliwai aia i mua o Iokeneama.

¹² A ua huli ia mai Sarida ma ka hikina kahi i puka mai ai ka lā, a hiki i ka mokuna ʻo Kiselo Tabora, a laila moe aʻela ia i Daberata, a piʻi i luna i Iapia.

¹³ A laila moe aʻela ia ma ka hikina i Gata Hepera a me ʻIta Kazina, a moe aʻela ma Rimona Metoara a hiki i Nea.

¹⁴ Ua pōʻai aʻela ka mokuna ma ka ʻākau a hiki i Hanatona; a ʻo kona wēlau aia ma ke awāwa ʻo Iipeta ʻEla.

¹⁵ ʻO Katata, a me Nahalala, a me Simerona, a me ʻIdala, a me Betelehema: he ʻumikumamālua kūlanakauhale, a me ko lākou mau kauhale.

¹⁶ ʻO ia ka ʻāina hoʻoili o nā keiki a Zebuluna ma ko lākou mau ʻōhua; ʻo ia hoʻi nā kūlanakauhale a me nā kauhale.

¹⁷ ¶ Ua puka mai ka hā o ka hailona ʻana no ʻIsakara, no nā mamo a ʻIsakara, ma muli o ko lākou poʻe ʻōhua.

¹⁸ ʻO ko lākou mokuna aia ma Iezereʻela, a me Kesulota, a me Sunema,

¹⁹ ʻo Haparaima, a me Sihona, a me ʻAnaharata,

²⁰ ʻo Rabita, a me Kisiona, a me ʻAbeza,

²¹ ʻo Remeta, a me ʻEne Ganima, a me ʻEne Hada, a me Bete Pazeza.

²² A ua pili ka mokuna i Tabora, a me Sahazima, a me Bete Semesa; a ʻo ka wēlau o ko lākou mokuna aia ma Ioredane: he ʻumikumamāono kūlanakauhale a me ko lākou mau kauhale.

²³ ʻO ia ka ʻāina hoʻoili o ka ʻohana a ʻIsakara ma muli o ko lākou poʻe ʻōhua; ʻo nā kūlanakauhale a me nā kauhale.

²⁴ ¶ Ua puka mai ka lima o ka hailona ʻana no ka ʻohana a ka poʻe mamo a ʻAsera, ma muli o ko lākou poʻe ʻōhua.

²⁵ ʻO ko lākou mokuna, ʻo Helekata, a me Hali, a me Betena, a me ʻAkesapa,

²⁶ ʻo ʻAlameleka, a me ʻAmada, a me Miseala; a ua moe aʻela ia i Karamela ma ke komohana, a me Sihora Libenata.

²⁷ A laila, huli ia i ka hikina i Bete Dagona, a pili ia i Zebuluna a me ke awāwa ʻo Iipeta ʻEla ma ka ʻākau o Bete ʻEmeka, a me Neiʻela, a hiki aku i Kabula ma ka ʻaoʻao hema;

²⁸ a ʻo Heberona, a me Rehoba, a me Hamona, a me Kana, a hiki i Zidona Nui.

²⁹ A huli ka mokuna i Rama, a i ke kūlanakauhale ikaika o Turo; a laila huli ka mokuna i Hosa; a ʻo kona wēlau aia ma ke Kai, mai kona ʻaoʻao a hiki i ʻAkeziba.

³⁰ ʻO ʻUma hoʻi a me ʻApeka, a me Rehoba: he iwakāluakumamālua kūlanakauhale, a me ko lākou mau kauhale.

³¹ ʻO ia ka ʻāina hoʻoili o ka ʻohana a ʻAsera ma muli o ko lākou poʻe ʻōhua, ʻo ia nā kūlanakauhale a me nā kauhale.

³² ¶ Ua puka mai ke ono o ka hailona ʻana no ka poʻe mamo a Napetali, no ka poʻe mamo a Napetali, ma muli o ko lākou poʻe ʻōhua.

³³ Aia ko lākou mokuna mai Halepa mai, mai ʻAlona hoʻi a i Zaʻananima a me ʻAdami Nekeba, a me Iabenela a hiki i Lakuma; a ʻo kona wēlau aia ma Ioredane.

³⁴ A laila, huli ka mokuna ma ke komohana i ʻAzenota Tabora, a ma laila aku hele ia i Hukoka, a moe aʻela ia i Zebuluna ma ka ʻaoʻao hema, a moe aʻela ia i ʻAsera ma ke komohana, a iā Iuda hoʻi ma Ioredane ma ka hikina o ka lā.

³⁵ Eia nā kūlanakauhale i paʻa i ka pā, ʻo Zidima, a me Zera, a me Hamata, ʻo Rakata, a me Kinareta,

³⁶ ʻo ʻAdama, a me Rama, a me Hazora,

³⁷ ʻo Kedesa, a me ʻEderei, a me ʻEne Hazora,

³⁸ ʻo ʻIrona, a me Migedala ʻEla, a me Horema, a me Beta ʻAnata, a me Bete Semesa: he ʻumikumamāiwa kūlanakauhale a me ko lākou mau kauhale.

³⁹ ʻO ia ka ʻāina hoʻoili o ka ʻohana a Napetali ma ko lākou poʻe ʻōhua; ʻo ia nā kūlanakauhale a me nā kauhale.

⁴⁰ ¶ Ua puka mai ka hiku o ka hailona ʻana no ka ʻohana a ka poʻe mamo a Dana, ma muli o ko lākou poʻe ʻōhua.

⁴¹ ʻO ka mokuna o ko lākou ʻāina hoʻoili, ʻo Zora a me ʻAsetaola, a me ʻIre Semesa,

⁴² ʻo Saʻalabina, a me ʻAialona, a me Ietela,

⁴³ ʻo ʻElona a me Timenata, a me ʻEkerona,

⁴⁴ ʻo ʻEleteka, a me Gibetona, a me Baʻalata,

⁴⁵ ʻo Iehuda, a me Bene-Beraka, a me Gata Rimona,

⁴⁶ ʻo Me Iarekona, a me Rakona, a me ka mokuna i mua o Iopa.

⁴⁷ Ua pilikia ka mokuna o nā keiki a Dana; no ia mea, piʻi akula nā keiki a Dana e kaua aku i ko Lesema, a pio ʻo ia iā lākou, a pepehi lākou ia wahi me ka maka o ka pahi kaua, a lilo mai ia iā lākou, a noho lākou i laila, a kapa aku lākou iā Lesema, ʻo Dana, ma muli o ka inoa ʻo Dana ʻo ko lākou makua kāne.

⁴⁸ ʻO ia ka ʻāina hoʻoili o ka ʻohana a ka poʻe mamo a Dana, ma muli o ko lākou poʻe ʻōhua; ʻo ia mau kūlanakauhale a me nā kauhale.

⁴⁹ ¶ A hoʻopau lākou i ka mahele ʻana i ka ʻāina no nā ʻāina hoʻoili, ma nā mokuna, ua hāʻawi akula ka poʻe mamo a ʻIseraʻela i ʻāina hoʻoili no Iosua ke keiki a Nuna, i waena o lākou.

⁵⁰ E like me ke kauoha a Iēhova, hāʻawi lākou nona i ke kūlanakauhale āna i noi mai ai, iā Timena Sera ma ka mauna ʻo ʻEperaima; a kūkulu ʻo ia i ke kūlanakauhale, a noho ma laila.

⁵¹ ¶ ʻO ia nā ʻāina hoʻoili a ʻEleazara ke kahuna, a me Iosua ke keiki a Nuna, a me ka poʻe koʻikoʻi o nā mākua o ka poʻe ʻohana a ʻIseraʻela, i mahele ai i ʻāina hoʻoili ma ka hailona ʻana, ma Silo, i mua o Iēhova, ma ka puka o ka halelewa o ke anaina kanaka. Pēlā i pau ai ka mahele ʻana i ka ʻāina.