KA BUKE A IOSUA 18 - Ka Baibala Hemolele

1 Ua kūkulu ʻia ka halelewa ma Silo. 4 Ua hōʻailona ʻia ka ʻāina i koe, a mahele ʻia ma ka hailona. 21 Nā kūlanakauhale o kā Beniamina.

MOKUNA XVIII.

¹ ¶ Ua hoʻākoakoa ʻia ke anaina kanaka o ka poʻe mamo a ʻIseraʻela ma Silo, a ma laila lākou i kūkulu ai i ka halelewa o ke anaina kanaka; a ua pio ko ka ʻāina, i mua o lākou.

² ʻEhiku ʻohana i koe iho o nā mamo a ʻIseraʻela, ʻaʻole i loaʻa iā lākou ko lākou ʻāina hoʻoili.

³ ʻŌlelo akula ʻo Iosua i nā mamo a ʻIseraʻela, “Pehea lā ka lōʻihi o ko ʻoukou moloā ʻana i ka hele e komo i ka ʻāina a Iēhova ke Akua o ko ʻoukou poʻe kūpuna i hāʻawi mai ai iā ʻoukou?

⁴ “E hāʻawi mai no waena o ʻoukou i mau kānaka pākolu o kēia ʻohana kēlā ʻohana, naʻu lākou e hoʻouna aku; a e kū lākou i luna, a e kaʻahele i ka ʻāina, a e hōʻailona iho e like me ko lākou ʻāina hoʻoili; a laila e hoʻi mai lākou i oʻu nei.

⁵ “A e mahele lākou ia mea i ʻehiku mokuna; a e noho ʻo Iuda ma ko lākou wahi ma ka hema; a ʻo ka hale o Iosepa e noho lākou ma ko lākou wahi ma ka ʻākau.

⁶ “A e kākau ʻoukou i ka ʻāina i ʻehiku mokuna, a e lawe mai ia mea iaʻu, i hāʻawi aku au iā ʻoukou ma ʻaneʻi ma ka hailona i mua o Iēhova ko kākou Akua.

⁷ “No ka mea, ʻaʻohe ʻāina no kā Levi i waena o ʻoukou; ʻo ka ʻoihana kahuna na Iēhova, ʻo ia kona ʻāina hoʻoili; a ʻo kā Gada, a me kā Reubena a me ka ʻohana hapa a Manase, ua loaʻa iā lākou ko lākou ʻāina hoʻoili, ma kēlā kapa o Ioredane ma ka hikina, ka mea a Mose ke kauwā a Iēhova i hāʻawi aku ai no lākou.”

⁸ ¶ A laila, kū i luna nā kānaka a hele akula; a kauoha akula ʻo Iosua i ka poʻe hele e kākau i ka ʻāina, ʻī akula, “E hele pōʻai i ka ʻāina, a e kākau iho, a e hoʻi mai iaʻu, i hāʻawi aku au iā ʻoukou ma ka hailona i mua o Iēhova ma Silo nei.”

⁹ A hele ua mau kānaka lā a pōʻai i ka ʻāina, a kākau lākou ia mea ma nā kūlanakauhale, i ʻehiku ʻāina i loko o ka buke; a hoʻi mai lākou i o Iosua lā ma kahi i hoʻomoana ai ma Silo.

¹⁰ A hailona ihola ʻo Iosua no lākou i mua o Iēhova ma Silo; a ma laila mahele aʻela ʻo Iosua i ka ʻāina no ka poʻe mamo a ʻIseraʻela ma muli o ko lākou mau papa.

¹¹ ¶ Ua hailona ʻia ka ʻohana a ka poʻe Beniamina ma muli o ko lākou mau hale; a ua moe aʻela ka mokuna o ko lākou ʻāina ma waena o ka poʻe mamo a Iuda, a ma waena o ka poʻe mamo a Iosepa.

¹² A ʻo ko lākou mokuna ma ka ʻaoʻao ʻākau, mai o Ioredane aʻe nō ia; a ua piʻi ka mokuna i ka ʻaoʻao o Ieriko ma ka ʻākau, a ua piʻi aʻela ma ka mauna ma ke komohana; a ʻo kona wēlau, aia ma ka wao nahele ʻo Bete ʻAvena.

¹³ A moe aʻela ka mokuna mai laila aku a hiki i Luza i ka ʻaoʻao o Luza, ma ka hema, ʻo Betela nō ia; a ua iho ka mokuna i ʻAtarota ʻAdara ma ka puʻu e pili ana i ka ʻaoʻao hema o Bete Horona lalo.

¹⁴ Ua kākau ʻia ka mokuna mai laila aku a huli ia i ke kihi o ke kai ma ka hema, mai ka puʻu mai aia i mua o Bete Horona ma ka hema; a ʻo kona wēlau aia ma Kiriata Baʻala, ʻo ia ʻo Kiriata Iearima, he kūlanakauhale o kā Iuda. ʻO ia ka ʻaoʻao komohana.

¹⁵ ʻO kona ʻaoʻao hema aia nō ia mai ke kihi o Kiriata Iearima, a hala aʻela kona mokuna i ke komohana, a moe aʻela ia a hiki i ka pūnāwai o Napetoa.

¹⁶ A iho ka mokuna i ke kihi o ka mauna, aia i mua o ke awāwa o ke keiki a Hinoma, aia ma ke awāwa o ka poʻe Repaima ma ka ʻākau, a ihola ia i ke awāwa a Hinoma a hiki i ka ʻaoʻao o Iebusa ma ka hema, a iho ia i ʻEne Rogela,

¹⁷ Ua kākau ʻia mai ka ʻākau a hiki aku i ʻEne Semesa, a moe aʻela ia i Gelilota kahi kokoke i ka piʻi ʻana o ʻAdumima, a iho ia i ka pōhaku o Bohana ke keiki a Reubena,

¹⁸ A hala aʻela i ka ʻaoʻao i mua o ʻAraba ma ka ʻākau, a iho ihola i ʻAraba.

¹⁹ A moe aʻela ka mokuna i ka ʻaoʻao o Bete Hogela ma ka ʻākau, a ʻo ka wēlau o kona mokuna aia ma ke kaikūʻono ʻākau o ka Moana Kai ma ka nuku o Ioredane. ʻO ia ka mokuna hema.

²⁰ ʻO Ioredane ʻo ia kona mokuna ma ka hikina; ʻo ia ka ʻāina hoʻoili o ka poʻe mamo o Beniamina, ma nā mokuna a puni ma muli o ko lākou poʻe ʻōhua.

²¹ ¶ ʻO nā kūlanakauhale o ka ʻohana a ka poʻe Beniamina ma muli o ko lākou mau hale, ʻo Ieriko a me Bete Hogela, a me ke awāwa ʻo Keziza,

²² ʻo Bete ʻAraba, a me Zemaraima, a me Betela,

²³ ʻo ʻAvima a me Para a me ʻOpera,

²⁴ ʻo Hepara Hamonai, a me ʻOpeni, a me Geba: he ʻumikumamālua kūlanakauhale, a me ko lākou mau kauhale;

²⁵ ʻo Gibeona a me Rama a me Beʻerota,

²⁶ ʻo Mizepa, a me Kepira, a me Moza,

²⁷ ʻo Rekema, a me ʻIrepeʻela, a me Tarala,

²⁸ ʻo Zela, a me ʻElepa, a me Iebusa, ʻo ia ʻo Ierusalema, a me Gibea, a me Kiriata: he ʻumikumamāhā kūlanakauhale a me ko lākou mau kauhale. ʻO ia ka ʻāina hoʻoili o nā keiki a Beniamina ma muli o ko lākou poʻe ʻōhua.